14
Patsa junpalu chunca junpalu mili tsachila
1 Jun quiranari Opisa Nari Sion dubi wiruraminca quirayoe. Yabe duque tsachila pewiruralarae. Patsa junpalu chunca junpalu mili tsachila yabe pewiruralarae. Junni Opisa Nachi mumunnan, yachi Apachi mumunnan yalachi lesubi chuteca jolajoe.
2 Junni Diosichi tobi nechi ticato merajae. Duque pi derin polenamin cuwenta merajae. Cunta pánanun tsanni merajae. Duque arpa tsanni merajae.
3 Ya patsa junpalu chunca junpalu mili tsachilari casan canta quilaquinae. Diosi mantato chudinun caquele, junpaluca wiruraminlachi caquele, unicalachi caquele canta quilaquinae. Uyanla jun cansionca miino podeilaitue; yalasiri miino podeicala joe. Tote chuminlale nechi yalaca se larica joe.
4 Yala Diosica telaquepotuto, yacasiri tennaminla joe. Opisa Na nunchi nenasatiya yabe penenaminla joe. Yala tenchi pacara quito, tsachilale nechi yalaca se laricala joe. Jana ti waquecatiya casale cayaca Diosichi nasi cuwanun joe Yachi joe tito. Junni inla jun tsanquenan Diosichinan, Opisa Nachinan jolajoe.
5 Monantiya yalaca culpa quino podeilaitue nene paminla joeque. Diosi mantato chudinun caquele wirurato, culpa itonla joe.
Pemanca anjelilachi fiqui
6 Jun quiranari manca anjeli jamoca jajinaminca quirayoe. Tsarasi fiquica jerale tote chuminlaca, jerale tsachi bolonlaca, jerale fiqui paminlaca, micarichun tanjae. Ya fiqui numatotiya tsarasica joto polemin fiqui joe.
7 Ya anjeliri sonba pato, itsantie:
—Diosica jelerato respetailaina! tie. Yaca tsara sen joe tilatina! tie. Jeralelaca miino óra numa faca joe mo mo se lono jonunca. Junni yaca se tilatina! tie. Yari yoquidoca, tocanan, lamaricanan, pi bulananuncanan, jera quimin joe tie.
8 Jun anjeli polenunsi, manca anjeliman jato itsantie:
—Babilonia tinun wa pueblo numa yucapiyae tie. Tsara sen moso pueblo jomin jotonan, numa jera yucapiyaca joe tie. Jun pueblobi chuminla seiton jolajoe. Jana seiton sonala unilalaca bino cutsawoto winan suwato, jelenquira quimiyaminla joe. Junni Babilonia pueblobi chuminla jun tsanquenan seiton quimiyaminlae tie uyan tobi chuminlaca.
9-10 Junni jun anjeli polenunsi, manca anjeliman jae. Jerale nechi pemanca anjelila jalaie. Junni ya debi anjeli sonba pato itsantie:
—Animalichi cale telenhiminlaca Diosi duque pa jochunae tie. Lesubi o tedebi yachi marca iminlaca Diosi duque pa jochunae tie. Jana duque tsanba pin binoca jelecari sonba pin jochunae. Tsanca cuchiminla duque padeseilaichunae. Junni ya animalichi cale telenhiminlacanan Diosi jun cuwentanan duque padeseisa carichunae tie. Ninbe, asufrebe niyananunbi padeseilaichunae. Diosichi anjelilachi cale, Opisa Nachi cale padeseilaichunae tie.
11 Junni ninbi padeseilainasa, nin poyo numatotiya lanato polenachunae. Deituchunae. Quepen, malon jasaino podeilaituchunae tie. Animalichi cale telenhiminla, o yachi moldechi cale telenhiminla, o yachi mumun chudica junla, o yachi marcaiminla, tsanque numatotiya padeseito polelaichunae tie. Ya debi anjeli tsantie.
12 Jun tenchi Diosichi tsachila peleino itolajoyoe. Diosichi mantaca meráto nenaminlari, Jesuca tennato nenaminlari sonba tenca jonola joyoe peleituchun.
13 Junnasa quiranari Diosichi tobi nechi fiqui merajae. Pila chutede! tie. Amanale nechi Miya Jesuchi tsachila puyaca junla joto, duque pansi jolajochunaeque pila chutede! tie. Junni tsantinunsi, Diosichi Tenca pato, tsaracari pae tie. Yalari tenfenaminnan manjasaino podeilaichunae tie. Yala seque quimin jonun tenchi Diosichi tobi premio tsanca yalachi cuwachunae tie. Diosichi Tenca tsantie.
Piyanle tobi chuminla witabi waca jun cuwenta jolajoe tinunca
14 Jun quiranari fiba poyonca quirayoe. Junbi tsachi ica jun tinunnan quiran tsachi chue. Yachi misubi oroca quica jun corona pun joe. Yachi tedebi tsara teyan torincan machiteca tae.
15 Junni manca anjeli Diosichi yabi nechi lato pae. Poyobi chuminca sonba pato itsantie:
—Diosichi wita cuwenta jun tsachilaca cade! tie. Diosi waca junla jera seilaie tie. Waca junlaca mancano óra numa fee. Junni machite tsan poto, waca junlaca cade! tie.
16 Tsantinunsiri poyobi chumin tsachiri yachi machite tsanca tobi posi, jera Diosi waca junlaca cae. Jerale tote yalacari jera mancae.
17 Junni manca anjeli Diosichi yabi nechi lae. Jun yari Diosichi tobi chue. Junni ya anjelinan teyan torincan machite tsanca tae.
18 Ya janunsi, manca anjeliman lae. Yari Diosichi yabi nin ponun mesate nechi lae. Ya anjeliri ninca mantá tan joe. Yari machite tanca sonba pato itsantie:
—Weyan tsachilari uba cuwenta jolajochunae tie. Junni uba jera cantsan ica joe. Machite posi, ubaca jera cade! tie.
19 Junni anjeli machite tsanca tobi posi, ubaca jera cae. Junsi ubaca cato, dilanunbi quepoe. Diosi paito seitonlaca casticaquito dilanun joe.
20 Jun ubaca dilanunni pueblo dechi chue. Junni junbi jeralelaca dilaquee. Dilaito jelecari duque asan lae. Calu freno ponun tsansi jamobi wapunca asan joe peman patsa quilon fecári.