4
Diosichi tobi Diosica se tilatinanunca
1 Junte nechi la Juan quirato, Diosichi tobi winun tamolanca quirayoe. Tamolan lasarae. Junte fiqui meranayoe. Casale pánanun fiquica tutu tsanni manmeranayoe. Junni ya itsantie: Laca inchi lade! tie. Manca mate niyan ino jonunca nuchi quirawochinayoe tie.
2 Tsantinasaleri la Diosichi Tencabe jera cayaiyanue. Junni Diosichi tobi mantamin chudinunca quirayoe. Tiyato jun chudinunbi chue.
3 Junbi chumin uraran sunan quiran joe. Jaspe tinun sunan quiran, cornalina tinun sunan quiran joe. Junni jun chudinun awinta suyunnan quiran joe. Yanan uraran joe esmeralda tinun sunan quiran.
4 Junni ya fe mantaminchi chudinun awinta palu chunca junpaluca mantaminlachi chudinun joe. Junbi palu chunca junpaluca unicala chularae. Fibaquin camisa pun unicala, misubi óroca quica jun coronaca pun jolajoe.
5 Junsi fe mantaminchi chudinunbi nechi cunta pinda lonae. Fiquinan, cuntanan quiran mera joe. Junni chudinun caquele sieteca tseno chue. Ya Diosichi sieteca Tenca joe.
6 Junsi chudinun caquele lamari tsanni quiran joe. Tsebacan bidrioca quica junnan quiran joe. Chudinun man nanchi man nanchi junpaluca ti animalilato wiruralarae. Duque caca punla joe. Cáchinan, bene nanchinan caca punla joe.
7 Caque wiruraminca quiranari, yari luquelanan quiran joe. Manca wiruraminca quiranari, yari wala nanan quiran joe. Manca wiruraminchi caforori tsachi caforonan quiran joe. Manan debi wiruraminca quiranari, yari jajimin parinquinan quiran joe.
8 Ya junpalucala sotaqui sotaqui panpe chunla joe. Duque cacanan punla joe. Jera pucalete, junsi tenpenan caca punla joe. Aman junsi quepen, malon canta quilaquinae. Itsantilatinae:
Diosi tsara sen, tsara sen, Miya Diosi tsara sen joe latinae.
Ticatiya quino podeimin joe.
Matunan jomin joto, amananan joto, inanan cajochunae latinae.
9 Ya junpalucalari Diosica tsantiminla joe. Yari mantaminchi chudinunbi chumin joto, numatotiya sonnato polechunae. Junni ya junpalucalari Diosica tsanque tsara sen joeque, acradeseiyoeque palaquinasanan,
10 ya palu chunca junpaluca unicalari jun chudinunbi chuminchi cale telenhilainae. Numatotiya sonnato poleminca se tilatinae. Yalachi coronaca Diosi chudinun cale walalaquinae ya fe mantá tan joe tito. Junto itsanque canta quilaquinae:
11 Miya Diosi, nu sen joto, jera ticatiya quica joe tilatinae.
Ticatiya quino munaranunca quiniquinue.
Nu munaratumanpari, tinantiya itono jomin jonhoe tilatinae.
Jun tenchi nuca tsaracari sen joe; jera respetaintsan joe tilatiyoe latinae.
Jun tenchi nu jera mantano joe tilatiyoe latinae.