5
Pilaquidobe opisa nabe
1 Junni lari Diosica yachi chudinunbi chuminca quirato, yachi tsa tedechi pilaquido tiwica quicaca chumiranunca quirayoe. Pilaquido tenpenan, uratenan pila quica jun joe. Junni sieteca seyochi doca jun joe.
2 Junsi sonban anjelica quirayoe. Yari sonba pato itsantie:
—¿Mo duque sen joto, jun seyoca boleto, pilaquidoca woleno jun? tie.
3 Junni monantiya jun pilaquidoca woleno podeitulajoyoe. Diosichi tobi, nin tote, nin to tenpe, monantiya junca wolen, nin quiran, quino podeitulajoyoe.
4 Lari wari duque wareyoe monantiya pilaquidoca woleto quirano michi sen itolajoyoeque.
5 Junni unica manca labe itsantie:
—Waretude! tie. Quirade! tie. Tsachi manca jun pilaquidoca woleno podeichunae. Yari Judachi alica tsachi joe. Duque poden jonan, yaca Luquela timinla joe. Matu to miya Davichi alicanan joe. Ya fe loca joto, seyoca boleto, pilaquidoca woleno podeichunae tie.
6 Junni ya tsantinunsi, Diosi chudinun minu quiraereto, Opisa Náca quirayoe. Diosi chudinunle, junpaluca wiruraminlachi quitsale rae unicalachite. Yari opisa na toteca jun jominnan quiran joe. Sieteca cachi chun, sieteca caca pun, joe. Diosichi Tenca sieteca Tencala tsannan joto, cachí tsanni quiran, caca tsanni quiran ica joe. Ya Tencala jerale tote ereca jun nenalarae.
7 Junni ya Opisa Nari jun chuminchica jito, ya pilaquido tiwicaca cae. Junbi chuminchi tsa tedebi taminca cae.
8 Junni pilaquido tiwicaca canunsiri, junpaluca wiruraminlanan, palu chunca junpaluca unicalanan, jeralela Opisa Nachi cale telenhilaie. Yalari jeralela arpa tan jolajoe. Junsi óroca quica jun tason tsanca talarae. Jun tasonbi insienso lucu poe. Ya insiensoca tenca cato, yari Diosichi tsachila yabe rocaica fiqui joeque tenhintsan joe.
9 Ya tason tanlari Opisa Náca casan canta quilaquinae. Itsanque canta quilaquinae:
Nuri ya seyoca boleno michi sen joe latinae.
Nu totaito nuchi asanchi tsachilaca Diosichi tenchi se laricae latinae.
Nu se larica junla jerale tsachi bolonbi nechi, jerale fiqui paminlale nechi, jerale tobi chuminlale nechi jolajoe latinae.
10 Yalaca chiquilachi Diosichi mantate mantamin miyala suwaca joe latinae.
Diosichi patelela cuwenta suwaca joe latinae.
Jerale tote yala mantalaqueyanae latinae.
11 Junni tsanque canta quinunsile quiranari, manca cantacaman meráyoe. Diosi chudinun, junsi junpaluca wiruraminla, junsi palu chunca junpaluca unicala jeralela junte chularae. Junni yalachi awinta canta quilaquinae. Jun awinta duque animali anjelila canta quilaquinae. Duque mili miyon jolajoe.
12 Junni yalari sonba pato itsantilatinae:
Totaica jun Opisa Na duque sen joe latinae.
Ya sen jonan, yaca mantá tan joe tin, jera tan joe tin, miramin joe tin, sonban joe tin, jelerantsan joe tin, duque sen joe tin, se tinun joe tin, tintsan joe tilatinae.
13 Jununsi piyanlela palaquee. Diosichibi, in tote, to tenpe, lamaribi, jeralete chuminla piyanlela pato itsanlatinaminca meráyoe:
Diosi yachi chudinunbi chumincanan, Opisa Nácanan duque seque pantsan joe latie.
Yaca jelerato, tsara sen joe tin, tsara sonba joe tin, tintsan joe latie.
Numatotiya tsantito polentsan joe latie.
14 Junni jeralela tsanlatinunbi, ya junpaluca wiruraminlari tsanque joe tinan, unicala telenhito, numatotiya sonnato polemin Diosica se tilatie.