101
Tyiꞌtɨ́j tɨ jɨn ɨ rey tyaꞌtóoratziiriꞌ ɨ Dios jimi
Chuíicarij David tɨ jaꞌaꞌrij
1 Nyáaxɨeꞌveꞌ nyaj tyaatatyójtziꞌreꞌen ɨ tɨ jɨn taxɨeꞌveꞌ ajta ɨ tɨ jimi tyámuaꞌ een;
nyáaxɨeꞌveꞌ, Tavástaraꞌ, nyaj muéetzij jimi tyuꞌtáchuiicaj;
2 nyáaxɨeꞌveꞌ nyaj tyámuaꞌ naa tyíꞌchajca.
¿Aꞌnajnyí nye jimi mupoꞌvaꞌmaꞌaj puáꞌmej?
Canu tyiꞌtɨ́j jɨn aꞌɨtzéeriaꞌaj naꞌmej
canu nyajta tyiꞌtɨ́j jɨn ootyáꞌɨtzeereꞌej jóꞌnyaj jaꞌchej,
3 canu cheꞌ aꞌnáj jaꞌraséeraj naꞌmej
nyej nyij tyiꞌtɨ́j jɨn jeꞌej puaꞌaj tyaꞌtányaratyij.
Nyahuaꞌxanaꞌveꞌ aꞌɨ́ɨjma ɨ maj quee jaꞌastej ɨ Dios;
¡canu aꞌnáj tyuꞌtáꞌsij mej mij nye jimi ajtyáxɨɨrej!
4 Canu aꞌɨ́j jitze tyiꞌriaꞌmuaꞌsímeꞌej naꞌmej ɨ tɨ tyihuojóꞌjɨpuaj:
¡canu jaxɨeꞌveꞌ nyej nyij tyiꞌtɨ́j jɨn jeꞌej puaꞌaj rɨjcaj!
5 Canu huoꞌtaꞌsij mej mij tyíꞌxajtaj
maj xájtariꞌ jeꞌej puaꞌaj tyihuáꞌxajtaj ɨ juxaꞌaj tyeɨ́tyee;
¡canu huáꞌjaahuatyeꞌ ɨ maj óotzaahuatyeꞌ nusu ɨ maj aꞌyan tyúuxaj maj jéetzeꞌ tyámuaꞌ een mequée ɨ séecan!
6 Aꞌɨ́ɨjma nu jaahuatyeꞌen ɨ tyeɨ́tyee maj tyámuaꞌ tyityetyúuchaꞌɨj,
mej mij véjriꞌ nye jimi ajoꞌcháatɨmeꞌnyij;
aꞌɨ́ɨ puꞌuj nye jitze ajtyámaꞌcantaj jaꞌmej
ɨ tɨ tyámuaꞌ naa atyejeꞌchej.
7 Ajta quee jeꞌej tyiɨꞌríitaj jaꞌmej tɨ sɨ́ɨj nyaj jamuán ajaꞌséejriaꞌaj ɨ tɨ tyúꞌcuanamuaj;
capu sɨ́ɨj tɨ tyíꞌhueꞌtacaa nyej jimi ajaꞌ séeriaꞌaj jaꞌmej.
8 Aꞌnáj tɨnaꞌaj nu huoꞌtyápuaꞌrityeꞌsij mej mij quee jeꞌej tyáhuaasimeꞌen
néijmiꞌi aꞌɨ́ɨmaj ɨ maj jeꞌej puaꞌaj tyityetyúuchaꞌɨj;
¡nyajta huiꞌráhuaꞌxɨj aꞌájna a chájtaꞌnaj jitze Tavástaraꞌ tɨ jitze ajtyámaꞌcan
néijmiꞌcaa aꞌɨ́ɨjma ɨ maj tyiꞌtɨ́j jɨn jeꞌej puaꞌaj rɨcɨj!