61
Tyicheꞌ aꞌɨ́j jitze tyúꞌcaꞌnyej ɨ Dios tɨ jɨn taatyáhuɨɨreꞌej
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jitzán tyíꞌcuiꞌnacaa tɨ tyeꞌejvivin. David tɨ jaꞌaꞌrij
1 Nyaj Dios, huánamuajriꞌ jeꞌej nyaj tyíꞌnyeyiin aꞌɨ́jcɨ jɨmeꞌ ɨ tɨ nyacuiꞌ,
¡pajta aꞌyan huárɨnyij jeꞌej nyaj aꞌjimi tyáꞌhuoo!
2 Muéetzij jimi nu huatyéenyuj aꞌájna ɨmuáj joꞌtɨj ɨ chuéj jóoꞌasej,
jiꞌnye ɨ nyaxɨéjnyuꞌcaa pu quee cheꞌ jucaꞌnyej.
Aꞌáa paj tyámuaꞌ tyinyojóꞌchaꞌɨɨn joꞌpaj muáaj jáꞌsejreꞌ,
3 jiꞌnye muáaj paj aꞌɨ́ɨn puéꞌeen ɨ tɨ naatyáhuɨɨreꞌej.
¡Aꞌyaa paj een tɨꞌɨj tyiꞌtɨ́j tɨ ájtaavijhuacaꞌ tɨ ajta tyámuaꞌ tyúucaꞌnyej
muáaj pej pij nyajapuáj huatányuusij aꞌɨ́jcɨ jimi ɨ tɨ nyéjchaꞌɨɨreꞌ!
4 Nyáaxɨeꞌveꞌ nyaj jusén jɨn aꞌáa joꞌquéej náꞌraꞌnyij joꞌpaj muáaj jaꞌchej,
tyámuaꞌ nyetyiꞌchaꞌɨɨriꞌhuaj aꞌ anáj jityej muéetzij.
5 Muáaj, nyaj Dios, papuꞌríj jáanamuajriꞌ jeꞌej nyaj tyaꞌtányaratziiriꞌ,
pajta naatáꞌ aꞌɨ́jna ɨ tɨ nyéetzij nyacɨꞌpuaj
ɨ paj tyámuaꞌ jáaruuj aꞌɨ́ɨjma jimi ɨ maj muéetzij muaꞌtzaahuatyeꞌ.
6 Huatáꞌ tɨꞌij áꞌtyeeviꞌin aꞌɨ́jna ɨ rey tɨ jɨn tyiꞌtyéjvee;
cheꞌ jéehua áꞌtyeeviꞌin, mueꞌtɨj nyinyiꞌraꞌaj jɨmeꞌ,
7 ajta aꞌɨ́jna jɨn tyuꞌtaꞌíjtaj ɨ paj jɨn muáaj tyámuaꞌ tyaꞌtáꞌcaa.
Tyámuaꞌ paj tyéechaꞌɨɨn aꞌɨ́jcɨ jɨmeꞌ ɨ paj taxɨeꞌveꞌ pajta ɨ paj jɨn tyámuaꞌ een,
8 aꞌyaa nu aꞌnáj tɨnaꞌaj muéetzij jimi tyiꞌchuíicaj naꞌmej
nyajta aꞌnáj tɨnaꞌaj arányaꞌastesij jeꞌej nyaj tyiꞌtɨ́j jɨn tyaꞌtányaratziiraj.