62
Aꞌɨ́ɨ puꞌuj ɨ Dios aꞌɨ́ɨn puéꞌeen ɨ tɨ taatyáhuɨɨreꞌej
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Jedutún tɨ jaꞌaꞌrij. Chuíicarij David tɨ joꞌyúꞌxacaꞌ
1 Aꞌɨ́j nuꞌuj ɨ Dios jimi jatyoovej nyej nyij huányasoꞌpeꞌen;;
aꞌɨ́j pu jimi joꞌvéꞌmej ɨ tɨ nyajapuáj huatányuusij.
2 Aꞌɨ́ɨ puꞌuj naatyáhuɨɨreꞌej ajta tyámuaꞌ tyíꞌnyechaꞌɨj.
Canu tyiꞌtɨ́j jɨn ootyáꞌɨtzeereꞌej, jiꞌnye aꞌɨ́ɨ pu aꞌɨ́ɨn puéꞌeen ɨ tɨ naatyáhuɨɨreꞌej.
3 ¿Aꞌnáj nyij muaꞌaj siatapuáꞌcɨtaj siaj sij quee cheꞌ nyenyoꞌsiꞌtyaꞌaj
ajta ɨ siaj jaxɨeꞌveꞌ siaj jɨn náꞌxaahuataj,
cuxáa nyaj jáxuꞌuj puéꞌeenyeꞌ ɨ maj jaꞌajtaahuacaꞌ ajta arí áꞌvesij
nusu tɨꞌɨj ɨ cúraaj tɨ ajta arí tɨn huatyuꞌuunyij?
4 Aꞌɨ́j muꞌuj curiaꞌmuaꞌsij jeꞌej maj tyinaꞌantyipuáꞌrityeꞌen,
ajta aꞌɨ́ɨn huápuɨꞌɨj naa huaꞌasej ɨ tɨ hueꞌtzij puéꞌeen.
Jutyényij mu jɨn tyámuaꞌ naa tyíꞌnyaxaj,
majta ɨ jumuaꞌtzíiraꞌaj mu jɨn jeꞌej puaꞌaj tyíꞌnyaxaj.
5 Aꞌɨ́j nuꞌuj ɨ Dios jimi jatyoovej nyej nyij huányasoꞌpeꞌen,
jiꞌnye aꞌɨ́j pu jimi joꞌvéꞌmej ɨ nyaj jɨn tyiꞌijchóꞌveꞌej.
6 Aꞌɨ́ɨ puꞌuj naatyáhuɨɨreꞌej ajta tyámuaꞌ tyíꞌnyechaꞌɨj.
Canu tyiꞌtɨ́j jɨn ootyáꞌɨtzeereꞌej, jiꞌnye aꞌɨ́ɨ pu aꞌɨ́ɨn puéꞌeen ɨ tɨ nyahuɨɨreꞌ.
7 Dios pu jimi jáꞌmaꞌcan ɨ tɨ nyahuɨɨreꞌ ajta ɨ nyaj jɨn nyáaj tyámuaꞌ een;
aꞌɨ́ɨ pu aꞌɨ́ɨn puéꞌeen ɨ tɨ tyámuaꞌ tyíꞌnyechaꞌɨj ajta ɨ tɨ naatyáhuɨɨreꞌej.
8 ¡Nye chájtaꞌnaj siaj jitze ajtyámaꞌcan, aꞌnáj tɨnaꞌaj xu aꞌɨ́j jitze tyúꞌcaꞌnyej!
¡Siajta jimi huatyényuunyij tyámuaꞌ naa jitzán setyiꞌcaꞌnyéej!
¡Dios pu aꞌɨ́ɨn puéꞌeen ɨ tɨ taatyáhuɨɨreꞌej!
9 Capu ɨ tyévij tyiꞌtɨ́j jɨn jeꞌej aꞌyaa puꞌuj tɨꞌɨj séej tɨ ucayáatɨraꞌnyij,
tɨpuaꞌaj ɨ tɨquee jeꞌej tyéejviicueꞌ nusu ɨ tɨ chíjtyaanyiꞌ puéꞌeen;
tɨpuaꞌaj néijmiꞌcaa tyiꞌtɨ́j jitze mahuaꞌcáꞌiteen
aꞌyaa puꞌuj cuxáa tɨquee tyiꞌtɨ́j aráacaj.
10 Capáj aꞌɨ́j jitze tyíꞌcaꞌnyej ɨ paj jɨn jeꞌej puaꞌaj tyiꞌtyíaꞌchaꞌɨj,
¡capáj pajta aꞌɨ́j jitze tyiꞌijchóꞌveꞌej ɨ paj tyíꞌnahuaꞌ!
Ajta tɨpuaꞌaj siahuoochíjtyaanyiꞌtaj,
caxu aꞌɨ́j jitze tyíꞌcaꞌnyej ɨ túmii.
11-12 Nuꞌríj mueꞌtɨ́j aꞌyan tyáanamuajriꞌ
aꞌíjna ɨ Dios tɨ aꞌyan tyaataxájtacaꞌ tɨjɨn:
aꞌɨ́jna ɨ tɨ néijmiꞌi putyíꞌuurej ajta ɨ tɨ jɨn taxɨeꞌveꞌ aꞌɨ́ɨ pu jaꞌaꞌrij,
tɨ ajta aꞌɨ́ɨn aꞌyan tyihuáꞌnajchityeꞌen séej ajta séej
jeꞌej tɨ sɨ́ɨj tyiꞌtɨ́j jɨn huarɨ́j.