77
Tyicheꞌ jitzán tyúꞌmuaꞌtyij ɨ tɨ jɨn ɨ Dios tyíꞌmuarɨeꞌ
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Aꞌɨ́ɨn tɨ jaꞌaꞌrij ɨ Jedutún. Chuíicarij Asaf tɨ jaꞌaꞌrij
1 Aꞌɨ́jcɨ jimi nu ɨ Dios caꞌnyíin jɨn huatyényuusij
taꞌaj ij aꞌɨ́ɨn náanamuaj.
2 Tɨpuaꞌaj séej xɨcáj jitze nyényaxaamujrityaꞌaj aꞌɨ́j nu huoonyij ɨ Tavástaraꞌ,
nyajta quee jaatapuáꞌcɨtaj nyaj ajméjcaꞌtaxɨꞌɨn
nyatɨꞌɨjta tɨ́caꞌ tyényuusimeꞌen.
Capu ɨꞌríj tɨ huóosoꞌpeꞌen ɨ nyajúuricamej.
3 Aꞌɨ́j nu ootámuaꞌreerij ɨ Dios, nyajta jeꞌen nyeyiinyen,
nyajta jeꞌen uhuányamuaꞌtzɨj, aj nu nyij tányij huatányaxaahuataj.
4 Muáaj, Tavástaraꞌ, capáj nyatáꞌcaa nyej nyij ootyájcutyij;
¡canu cheꞌ jeꞌej jájtyoovej, ajta quee cheꞌ nyaɨꞌriityeꞌ nyaj tyuꞌtaxáj!
5 Aꞌɨ́j nu jitze tyiꞌriáꞌmuaꞌsij ɨ xɨcáj nyajta ɨ nyinyiꞌraꞌaj yatɨj jeꞌréꞌnyej,
6 nyaꞌtamuaꞌreꞌrii nyaj tɨ́caꞌ tyiꞌchuicacariaꞌaj.
Nyatzájtaꞌ nu aꞌyan tyiꞌriáꞌmuaꞌsij, nyajta jeꞌen aꞌyan tyuꞌtaꞌíhuoꞌsij tɨjɨn:
7 ¿Nyiquij jusén jɨmeꞌ nyuꞌcamuɨꞌɨj jaꞌmej ɨ Tavástaraꞌ?
¿Nyiquij quee cheꞌ tyámuaꞌ tojoꞌmuaꞌráaj jaꞌmej?
8 ¿Nyiquij arí huatyápuaꞌriacaꞌ ɨ tɨ jɨn taxɨeꞌvaꞌcaꞌaj?
¿Nyiquij arí jusén jɨmeꞌ huatyápuaꞌriacaꞌ ɨ tɨ jɨn tyaꞌtóoratziiriꞌ?
9 ¿Nyiquij arí ɨ Dios yoꞌhuáꞌxɨj ɨ tɨ jɨn tyámuaꞌ tyíꞌtyevistacaꞌaj?
¿Nyi arí huápuɨꞌɨj tyinyúꞌcacaꞌ, ajta jeꞌen quee cheꞌ táꞌcuꞌvej?
10 Ajta ɨ tɨ jéetzeꞌ jeꞌej puaꞌaj nyaꞌasej aꞌɨ́ɨ pu aꞌɨ́ɨn puéꞌeen ɨ nyaj aꞌyan tyíꞌmuaꞌajcaj
tɨ aꞌɨ́jna ɨ tɨ tajapuá jáꞌsejreꞌ quee cheꞌ aꞌɨ́ɨn puéꞌeen ityájma jimi.
11 Aꞌɨ́j nu tyoꞌtámuaꞌreerij ɨ tɨ naa tyihuáꞌsejratyeꞌ
ɨ tɨ anaquéej tyíꞌsejriaꞌcaꞌaj ɨ Tavástaraꞌ jimi,
12 aꞌɨ́j nu néijmiꞌi tyoꞌtámuaꞌreerij ɨ tɨ aꞌɨ́ɨn tyúꞌtaahuacaꞌ.
13 Taj Dios, muáaj paj néijmiꞌi jɨn tyámuaꞌ rɨcɨj jeꞌej paj tyiꞌtɨ́j uurej;
¿nyiquij ajtáhuaꞌaj sɨ́ɨj séejreꞌ ɨ dios tɨ aꞌyan een patɨꞌɨj muáaj?
14 ¡Muáaj paj aꞌɨ́ɨn puéꞌeen ɨ Dios ɨ tɨ aꞌɨ́j tyíꞌtaahuaj ɨ tɨ naa tyuꞌséꞌrin!
¡Muáaj paj huoꞌtaséjratyej néijmiꞌcaa ɨ tyeɨ́tyee ɨ paj néijmiꞌi jɨn putyíꞌuurej!
15 Pajta ɨ paj néijmiꞌi jɨn putyíꞌuurej aꞌɨ́j paj jɨn huaꞌ japua huatanyúj aꞌ tyeɨ́tyeristyamuaꞌ,
yójmuaꞌmuaꞌ aꞌɨ́jcɨ ɨ Jacob pajta aꞌɨ́j tyíꞌyojmuaꞌ ɨ José.
16 Taj Dios, tɨꞌɨj ɨ jájrij muaaséj, aꞌɨ́ɨ pu tyuꞌtátzɨɨn,
ajta huatóocaꞌtzɨj ɨ jájtyij tyétyeꞌ ɨmuáj tɨ jáꞌsejreꞌ,
17 majta ɨ jéetɨrij tyuꞌtáꞌ mej mij huatyéviiyej,
majta mu tyényuuveꞌej u tajapuá
majta néijmiꞌqueꞌ tyóonaꞌaxcavaꞌraꞌaj.
18 Ajta huatánamuajre maj tyényuuveꞌej aꞌájna joꞌtɨj jóꞌaacaj,
néijmiꞌqueꞌ pu ɨ cháanacaj japua huanyéeriꞌcɨriajraa aꞌɨ́jcɨ jɨmeꞌ ɨ maj tyánaꞌaxcavaꞌraꞌaj
ajta néijmiꞌi ɨ chuéj caꞌnyíin jɨn huatóocaꞌtzɨj.
19 Pajta tyuꞌtáꞌ maj antácɨɨnyej ɨ jájritzeꞌ,
muáaj paj antáraa ɨ jájtyij jitze,
ajta capu aꞌtɨ́j jáamuaꞌreeriꞌ joꞌpaj joꞌréꞌnyej.
20 Pahuóꞌviꞌtɨsimeꞌej aꞌtyéɨtyeristyamuaꞌ aꞌyájna matɨꞌɨj aꞌyaꞌmuáj,
aꞌɨ́ɨjma jitze maꞌcan ɨ Moisés ajta ɨ Aarón.