78
Jeꞌej tɨ ɨ Dios tyámuaꞌ tyíꞌuurej aꞌɨ́ɨjma jimi ɨ jutyéɨtyeristyamuaꞌ
Nyúucarij tɨ naa huánamuajrii Asaf tɨ jɨn tyihuoꞌmuáꞌtyej
1 Muaꞌaj mu siaj nyetyeɨ́ɨtyeristyamuaꞌ puéꞌeen, aꞌyaa xu huárɨnyij jeꞌej nyaj tyajaꞌmuamuaꞌtyej;
¡siataꞌaj ecóotutaxɨꞌɨn siaj sij tyámuaꞌ tyáanamuaj jeꞌej nyaj tyajáꞌmuaꞌixaatyeꞌ!
2 Séej nu nyúucarij jɨn tyajamuaatéꞌexaatyeꞌsij,
aꞌɨ́j nu tyuꞌtaxájtaj tyiꞌtɨ́j tɨ aviitziꞌhuacaꞌaj
tɨꞌɨj naꞌaj jájcuaj ɨmuáj yatɨj jeꞌréꞌnyej.
3 Tyiꞌtɨ́j tyaj huánamuajriꞌ tyajta jamuaꞌreej
majta ɨ tahuásimuaꞌcɨꞌɨj maj táaꞌixaaj,
4 catu huoꞌtyáꞌaviitzeꞌej aꞌɨ́ɨjma ɨ tayójmuaꞌ.
Aꞌɨ́ɨjma jitze maꞌcan ɨ maj tajitzé eerányesij aꞌɨ́ɨjma tu jɨn tyaatatyójtziꞌreꞌej ɨ Tavástaraꞌ
tyajta jaataxájtaj ɨ tɨ néijmiꞌi jɨn putyíꞌuurej ajta ɨ tɨ jɨn naa huaséꞌrin.
5 Dios pu nyúucarij huatyájto aꞌɨ́jcɨ jimi ɨ Jacob;
ajta tyiꞌtɨ́j jɨn tyuꞌtaꞌíjtacaꞌ aꞌájna a Israel,
ajta aꞌɨ́j jɨn tyihuoꞌtaꞌíj ɨ tahuásimuaꞌcɨꞌɨj
mej mij aꞌɨ́ɨmaj huoꞌmuaꞌtyej ɨ maj huaꞌ jitze eerányesij,
6 mej mij jáamuaꞌtyij ɨ maj majcaꞌhuáyee huaꞌ jitze eerányesij,
huaꞌ yojmuaꞌ ɨ maj nanɨeꞌhuan,
majta jeꞌen aꞌɨ́ɨmaj, aꞌɨ́ɨjma mu mijta muaꞌtyen ɨ juyójmuaꞌ,
7 mataꞌaj mij ɨ Dios jitze tyúꞌcaꞌnyej
majta jeꞌen quee yoꞌhuáꞌxɨj jeꞌej tɨ aꞌɨ́ɨn tyúꞌruuj,
ajta mej mij aꞌyan huárɨnyij jeꞌej tɨ tyiꞌtɨ́j jɨn tyuꞌtaꞌíjtacaꞌ
8 mej mij quee aꞌyan huárɨnyij matɨꞌɨj ɨ huaꞌ huásimuaꞌcɨꞌɨj,
ɨ maj quee tyihuojóꞌitej majta quee maꞌumuámuaꞌreꞌ,
majta quee tyámuaꞌ een ɨ juxɨéjnyuꞌcaa tzajtaꞌ nusu ɨ ju júuricamej jitze,
¡tyeɨ́tyee maj quee tyámuaꞌ tyityetyúuchaꞌɨɨcaꞌaj ɨ Dios jimi!
9 Aꞌɨ́ɨmaj ɨ tyeɨ́tyeristyamuaꞌmeꞌen aꞌɨ́jcɨ ɨ Efraín,
ɨ maj tyámuaꞌ eenyeꞌ aꞌɨ́jcɨ jɨmeꞌ ɨ túꞌnamuaꞌaj majta ɨꞌrɨ́j
aꞌɨ́ɨ mu huatóoꞌuj aꞌɨ́jcɨ xɨcáaraꞌ jitze matɨꞌɨj huatyéenyoꞌsej,
10 camu jaatyátzaahuatyej ɨ Dios tɨ jɨn tyaꞌtóoratziiriꞌ
camu majta jaataxɨéꞌvej maj jaꞌráꞌastej jeꞌej tɨ aꞌɨ́ɨn tyíꞌmuaꞌtaj.
11 Aꞌɨ́ɨ mu yoꞌhuáꞌxɨj jeꞌej tɨ aꞌɨ́ɨn huaꞌ jimi tyuꞌmuárɨej,
ajta ɨ tɨ naa tyuꞌséꞌrin aꞌɨ́ɨn tɨ tyihuoꞌtaséjratyej.
12 Dios pu tyihuoꞌtaséjratyej ɨ tɨ naa tyuꞌséꞌrin aꞌɨ́ɨjma ɨ jáꞌmuahuasimuaꞌcɨꞌɨj
aꞌáa tɨ huatacaꞌaj a Soan, aꞌáa tɨ jáꞌsejreꞌ a Egipto:
13 ajta huaꞌpuaquéj jájsɨɨrej ɨ jájrij, tɨꞌquij huoꞌtaꞌ maj antácɨɨnyej,
ajta aꞌɨ́ɨ pu juxaꞌaj aꞌyan jáaruuj tɨꞌɨj jáxuꞌuj tɨ ájtaavijhuacaꞌ.
14 Tújca pu jéetɨrij jɨn huoꞌviꞌtɨsimeꞌej,
ajta ɨ tɨ́caꞌ tɨéj pu jɨn huoꞌtátzaviꞌtyeꞌsimaꞌaj.
15 Ajta aꞌájna joꞌtɨj quee jáꞌtyiꞌtɨj aꞌɨ́ɨ pu tyetyéj tɨ veꞌéj jéꞌtaꞌ ootátaaracaꞌ,
ajta jeꞌen muiꞌcaa ɨ jájtyij huoꞌtaꞌ.
16 ¡Dios pu tyuꞌtáꞌ tɨ ɨ jájtyij eeráanyej aꞌɨ́jcɨ jitze ɨ tyetyéj
aꞌɨ́j puꞌij jɨn vaꞌtɨ́j ɨ jájtyij huatámuɨꞌyacaꞌ!
17 Majta aꞌɨ́ɨmaj móocheꞌ mu atyáꞌɨtzeꞌrihuaꞌaj ɨ Dios jimi,
camu jaatyátzaahuatyej aꞌɨ́jcɨ ɨ tajapuá tɨ jáꞌsejreꞌ matɨꞌɨj aꞌáa joꞌtyúꞌuucaꞌaj joꞌtɨj quee jáꞌtyiꞌtɨj.
18 Aꞌyaa mu tyáꞌxɨeꞌvaꞌcaꞌaj maj jaatyéesej
cueꞌráj metyiꞌhuooj aꞌɨ́ɨjma tɨ tyaꞌránajchicaꞌaj.
19 Jitzán mu rányuucaꞌaj, aꞌyan metyiꞌxáataj tɨjɨn:
“¿Nyi ɨ Dios mujoꞌvaꞌmaꞌaj jaꞌmej tɨꞌij méesaj japua tyitáacueꞌtyej aꞌyájna joꞌtɨj quee jáꞌtyiꞌtɨj?
20 Aꞌyaa pu tyiꞌjaꞌyájna tɨ ɨ Dios jaꞌcátaaracaꞌ ɨ tyetyéj,
ajta jeꞌen aꞌɨ́j jitze jájtyij eeráanyej tɨꞌɨj játyaꞌnaj,
aꞌɨ́j pu jɨn ɨ chuéj ajoꞌcájrupij,
ajta, ¿nyiquij páan ajta taatáꞌsij?
¿Nyiquij ajta hueꞌraꞌaj huoꞌtaꞌsij ɨ jutyéɨtyeristyamuaꞌ?”
21 Tɨꞌɨj ɨ Tavástaraꞌ aꞌíj huánamuajriꞌ, aꞌɨ́ɨ pu tyinyúꞌcacaꞌ;
¡ɨ tɨ jɨn nyúꞌcamuɨꞌ, aꞌyaa pu een tɨꞌɨj ɨ tɨéj,
aꞌɨ́j pu jimi tyinyúꞌcacaꞌ ɨ Jacob!
22 Jiꞌnye camu ɨ Dios jitze tyuꞌcáꞌan
camu majta tyáꞌantzaahuaj tɨ aꞌɨ́ɨn huoꞌtyáhuɨɨrej.
23 Ajta aꞌyájna, Dios pu tyihuoꞌtaꞌíj ɨ jéetɨrij
ajta jaꞌantacúj ɨ tɨ jɨn eetyánamiꞌ u tajapuá,
24 ¡ajta jeꞌen tyuꞌtáꞌ tɨ ajeꞌcáanyej ɨ cueꞌráj tɨ aꞌyan huatóomuaꞌaj tɨjɨn maná,
tɨ aꞌyan éenyeꞌej tɨꞌɨj tyeríicuj tajapuá tɨ jáꞌmaꞌcan, mej mij aꞌɨ́ɨmaj tyúꞌcuaꞌnyij!
25 ¡Aꞌɨ́ɨ pu tyévij jáacuaj ɨ tajapuá maj tyíꞌhuɨɨreꞌ maj jacuaꞌcaa!
¡Dios pu jéehua tyámuaꞌ naa tyihuoꞌcueꞌej!
26 Aꞌɨ́jna ɨ áacaj aꞌáa tɨ jeꞌréꞌnyej joꞌtɨj ɨ xɨcáj jéꞌejnyinyiij ajta áatyej pujmuaꞌ tɨ jeꞌtányinyii
aꞌɨ́ɨ mu tajapuá huatáꞌaacariacaꞌ,
¡Dios pu aꞌyan tyúꞌruuj aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej!
27 Ajta tyuꞌtáꞌ tɨ hueꞌraꞌaj huáviiyej huaꞌ japua ɨ jutyéɨtyeristyamuaꞌ;
aꞌɨ́jna jɨmeꞌ maj pínaꞌsee mueꞌtɨ́j ajeꞌcáanyej aꞌyájna tɨꞌɨj ɨ séj jájritzeꞌ tɨ séejreꞌ.
28 Dios pu tyuꞌtáꞌ maj aꞌáa jéꞌtaꞌ jaꞌrávatzɨj joꞌmaj aꞌɨ́ɨmaj tyojoꞌtyáꞌɨnaamuacaꞌaj
ajta joꞌtɨj tyojooꞌástɨmee ɨ tyihuaꞌ ɨnáamuaj.
29 Aꞌɨ́ɨ mu mij tyúꞌcuaa ꞌasta manaꞌaj quee tyámuaꞌ tyityaatajúꞌxaj,
aꞌyaa puꞌij ɨ Dios tyaꞌróoꞌastej tɨꞌij aꞌyan tyáꞌraꞌnyij jeꞌej maj aꞌɨ́ɨmaj tyaaxɨéꞌvaꞌcaꞌaj.
30 Ajta capu eexúj huatyápuaꞌriacaꞌaj jeꞌej maj aꞌɨ́ɨmaj tyáꞌxɨeꞌvaꞌcaꞌaj,
óocheꞌ pu huaꞌ tyenyij jitze séjriaꞌcaꞌaj ɨ cueꞌráj,
31 tɨꞌɨj ɨ Dios tɨ jɨn nyúꞌcamuɨꞌ huaꞌ japua rájve
ajta jeꞌen aꞌɨ́ɨjma huácuij ɨ tyétyacaa maj jéetzeꞌ uhuácacaꞌnyeꞌ.
¡Huoꞌcuij aꞌɨ́ɨjma ɨ tyétyacaa maj jéetzeꞌ tyámuaꞌ een Israel maj jitze ajtyámaꞌcan!
32 Tɨꞌɨj aꞌyan tyaꞌnáaraꞌaj, majtáhuaꞌaj mu huóoxanaꞌcɨrej;
camu tyáꞌantzaahuaj aꞌɨ́jcɨ jitze ɨ tɨ naa tyuꞌséꞌrin ɨ Dios jimi.
33 Aꞌɨ́j pu jɨn ɨ Dios jaꞌantyipuáꞌrij ɨ huáꞌjuuricamej
cuxáa maj séej manaꞌaj jɨn ucayáatɨraꞌnyij
aꞌɨ́jcɨ jitze ɨ tɨ huápuɨꞌɨj tzɨ́ɨnyiꞌsiꞌ huaséꞌrin.
34 Tɨpuaꞌaj ɨ Dios huaꞌcuiꞌijcaj, aj mu mij jahuoonyij;
majta jimi tyaꞌantzáꞌhuatyahuaꞌaj majta quee juxaahuataj jahuoocaꞌaj,
35 aj mumij jaꞌtamuáꞌreꞌrihuaꞌaj ɨ Dios tajapuá tɨ jáꞌsejreꞌ
ɨ tɨ huaꞌchaꞌɨɨcaꞌaj ajta huaꞌ japua nyuucaꞌaj.
36 Majta ɨ jutyényij jɨmeꞌ majta ɨ junyanúu jɨmeꞌ
jéehua mu huápuɨꞌɨj jacuanamuajcaꞌaj,
37 jiꞌnye camu aꞌnáj tzáahuatyiꞌraꞌaj jɨn jaatyátzaahuatyej
camu majta jɨꞌréꞌnyeꞌej séjriaꞌcaꞌaj aꞌɨ́jcɨ jitze ɨ tɨ jɨn tyaꞌtóoratziiriꞌ.
38 Ajta ɨ Dios pu huaꞌcuꞌvajcaꞌaj,
ajta tyihuáꞌuunyiꞌracaꞌaj ɨ maj jɨn jeꞌej puaꞌaj rɨjcaa ajta quee huaꞌantyipuaꞌrityahuaꞌaj,
mueꞌtɨ́j pu quee jaataxɨéꞌvej tɨ huaꞌ jimi tyinyúꞌcaj
ajta quee tyuꞌtáꞌ tɨ aꞌɨ́ɨn jaatyámueꞌtɨn ɨ tɨ jɨn nyúꞌcamuɨꞌ.
39 Dios pu joꞌtámuaꞌreeriꞌ maj tyeɨ́tyee manaꞌaj puéꞌeenyeꞌej;
maj aꞌyan een tɨꞌɨj ɨ áacaj, tɨ yujoꞌmej ajta quee cheꞌ pu ájvesij.
40 ¡Aꞌchunyéj puaꞌmáj mequee jáanamuajriꞌ ɨ Dios
majta jimi jeꞌej puaꞌaj huarɨ́j aꞌájna joꞌtɨj quee jáꞌtyiꞌtɨj!
41 Majta móocheꞌ mu jaxɨeꞌvaꞌcaꞌaj maj tyiꞌtɨ́j jɨn jaatyéesej;
aꞌɨ́ɨ mu jaxaamuɨjrityaꞌcaꞌaj aꞌɨ́jna ɨ tɨ jɨꞌréenyeꞌej séejreꞌ aꞌájna a Israel.
42 Camu joꞌtámuaꞌreeriꞌ aꞌɨ́jcɨ xɨcáaraꞌ
tɨꞌɨj ɨ Dios, aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej, huaꞌ japua huatanyúj aꞌɨ́ɨjma jimi ɨ maj huaꞌajchaꞌɨɨreꞌ;
43 tɨꞌɨj aꞌájna a Soan, aꞌáa tɨ jaꞌajtyámaꞌcan a Egipto,
vaꞌcán jɨn tyuꞌmuárɨej ajta ɨ maj jɨn jeꞌej tyoꞌtaséj,
44 tɨꞌɨj tyuꞌtáꞌ tɨ ɨ játyaꞌnaj xúureꞌej huatyóotaahuaj,
ajta jeꞌen quee cheꞌ huatáɨꞌriitariacaꞌ maj jaayéꞌen aꞌɨ́ɨmaj ɨ maj Egipto jáꞌmaꞌcan.
45 Ajta xɨeꞌrúj maj tyúꞌchaꞌvacaa aꞌɨ́ɨjma jimi huataꞌítyacaꞌ ajta taachuísee,
maj néijmiꞌi tyuꞌriáꞌxɨhuaaj majta tyojóꞌjɨpuaj,
46 ajta aꞌɨ́ɨjma ɨ vítziꞌcɨɨ huatáꞌ ɨ tɨ tyúꞌcɨɨriacaꞌ
aꞌɨ́ɨmaj maj tyuꞌmuárɨeꞌcaꞌaj.
47 Ajta tyéetyee jɨmeꞌ ajta séerij
aꞌɨ́j pu jɨn jaꞌantyipuáꞌrij ɨ xápuaꞌ maj jahuastyaꞌcaꞌaj ajta ɨ úuvaj.
48 Majta ɨ huáꞌyaꞌmuaj ɨ huáacasij majta ɨ cányaꞌxɨɨ aꞌɨ́ɨ mu huácuij
aꞌɨ́jcɨ jɨmeꞌ maj tyéetyee huavátzɨj majta ɨ víityee maj huoꞌcájtzej.
49 Dios pu aꞌɨ́ɨjma jimi uyoꞌtaꞌítyacaꞌ ɨ tɨ jɨn huápuɨꞌɨj nyúꞌcamuɨꞌ:
ɨ tɨ jɨn nyúꞌcamuɨꞌ, puéjtzij ajta ɨ maj jɨn jeꞌej tyityoꞌtóomuaꞌtyij,
aꞌyájna tɨꞌɨj ɨ maj jitzán jáamuaꞌreej tɨ jeꞌej puaꞌaj tyeꞌmej.
50 ¡Aꞌɨ́ɨ pu tyuꞌtáꞌ tɨ huataséjreꞌen ɨ tɨ jɨn nyúꞌcamuɨꞌ!
Capu tyaatúꞌuunyiꞌriꞌ ɨ huaꞌ júuricamej,
sulu aꞌɨ́ɨ pu tyuꞌtáꞌ mej mij huácuiꞌnyij,
51 ¡aꞌáa puꞌuj tánaꞌaj huojoꞌcuii aꞌájna a Egipto
aꞌɨ́ɨjma ɨ huaꞌyojmuaꞌ ɨ maj tyétyacaa maj anáatyaꞌaj huanánɨeꞌhuacaꞌ majta aꞌáa jaꞌajtyámaꞌcantacaꞌaj a Egipto!
52 Ajta aꞌɨ́ɨjma eeráaviꞌtɨj ɨ Israel maj jitze ajtyámaꞌcan tɨꞌɨj cányaꞌxɨɨ maj puéꞌeenyeꞌ;
aꞌɨ́ɨ puꞌij tyámuaꞌ tyihuóꞌviꞌtɨsimeꞌej aꞌájna joꞌtɨj quee jáꞌtyiꞌtɨj.
53 Tyámuaꞌ pu tyihuaꞌchaꞌɨ́ɨj huoꞌviꞌtɨsimeꞌej,
mej mij aꞌɨ́ɨmaj quee tyíꞌtzɨɨnyeꞌej,
ajta aꞌɨ́ɨjma ɨ maj huaꞌajchaꞌɨɨreꞌ aꞌáa mu jaꞌtyájcuii a jájritzeꞌ.
54 Dios pu huojoꞌvíꞌtɨj ɨ jutyéɨtyeristyamuaꞌ aꞌájna a chuéj japua aꞌɨ́ɨn tɨ jaꞌantyíhuoj,
¡ajta ɨ jɨríj aꞌɨ́ɨn tɨ jaamuéꞌtɨj mej mij ɨ tyeɨ́tyeristyamuaꞌmeꞌen jaꞌancuriáꞌan!
55 Huaꞌantyipuaꞌrij ɨ maj quee tyáꞌtzaahuatyeꞌ aꞌɨ́ɨmaj metyiꞌséeracaj ɨ Israel maj jitze ajtyámaꞌcan,
ajta ɨ chuéj aꞌɨ́ɨjma pu huatátuii ɨ jutyéɨtyeristyamuaꞌ,
ajta huoꞌtaꞌ mej mij aꞌáa joꞌcháatɨmeꞌnyij ɨ tyihuaꞌ ɨnáamuaj tzajtaꞌ.
56 Ajta aꞌɨ́ɨmaj mu jaatyéesej aꞌɨ́jcɨ ɨ Dios tajapuá tɨ jáꞌsejreꞌ
aꞌɨ́jcɨ jɨmeꞌ maj quee jaatyátzaahuatyej
majta quee aꞌyan huarɨ́j jeꞌej tɨ aꞌɨ́ɨn tyuꞌtaꞌíjtacaꞌ,
57 jiꞌnye, aꞌyájna matɨꞌɨj ɨ huaꞌ huásimuaꞌ
aꞌɨ́ɨ mu majta jimi ajtacɨ́j majta jeꞌej puaꞌaj huarɨ́j,
¡aꞌɨ́ɨ mu majta antyúutuuxɨj tɨꞌɨj ɨ túꞌnamuaꞌaj tɨ quee tyámuaꞌ tyíꞌtaavijhua!
58 Aꞌɨ́ɨ mu jajaaxɨejtyeꞌ aꞌɨ́jcɨ jɨmeꞌ maj tyiꞌtɨ́j ájtaahuaxɨj,
mej mij aꞌɨ́j japua sáanturij huatyáanajchej, aꞌyaa mu mij tyuꞌtáꞌ tɨ aꞌɨ́ɨn huáꞌanchueereꞌen.
59 Dios puꞌij tyinyúꞌcacaꞌ tɨꞌɨj aꞌɨ́j huaséj,
ajta néijmiꞌcaa huareꞌityacaꞌ ɨ Israel maj jitze ajtyámaꞌcan,
60 ajta ayoorɨej ɨ tyeyúuj aꞌáa tɨ jáꞌsejriaꞌcaꞌaj aꞌájna chájtaꞌ Siló,
ɨ tɨ chiꞌraꞌan puéꞌeenyeꞌ ɨ tyeɨ́tyee tzajtaꞌ.
61 Tyuꞌtáꞌ mej mij aꞌɨ́ɨmaj ɨ maj jájchaꞌɨɨreꞌ jaatyéeviꞌ
aꞌɨ́jcɨ ɨ tɨ jɨn naa huaséꞌrin ajta ɨ tɨ néijmiꞌi jɨn putyíꞌuurej.
62 Huápuɨꞌɨj pu nyuꞌcamuɨꞌcaꞌaj aꞌɨ́ɨjma jimi ɨ jutyéɨtyeristyamuaꞌ,
aꞌɨ́j pu jɨn tyuꞌtáꞌ maj chúun jɨn huóꞌcuiꞌnyij aꞌɨ́ɨmaj ɨ maj huaꞌajchaꞌɨɨreꞌ.
63 Ɨ tyáamua mu huácuij matɨéeriꞌhuaj,
camu cheꞌ tyuꞌtáchuiicacaꞌ mej mij ɨ íimuaa huáhuɨɨchej.
64 Aꞌɨ́ɨmaj mu ɨ puaaríij huácuiꞌiihuacaꞌ ɨ chúun jɨmeꞌ,
majta ɨ úucaa ɨ maj antyúujɨɨmuaꞌastariacaꞌ camu huoꞌyiinyacaꞌ.
65 Ajta ɨ Tavástaraꞌ pu huájɨj, tɨꞌɨj ɨ tɨ tyiꞌtyámaarasimaꞌaj,
tɨꞌɨj ɨ tɨ nyoꞌsii tɨ huatyájtahue ajta jeꞌen arí otóomuaꞌreeriꞌ,
66 ajta jeꞌen huaꞌantyimueꞌtɨj ɨ maj jájchaꞌɨɨreꞌ, huoꞌtaꞌ mej mij huatóoꞌuunaj,
¡ajta tyéviꞌsiꞌ huoꞌtaꞌséjratacaꞌ jusén jɨmeꞌ!
67 Ajta ahuojóohuaꞌxɨj ɨ José maj jamuán ajáꞌchajcaꞌaj,
ajta quee aꞌɨ́ɨjma antyíhuo ɨ Efraín maj jitze ajtyámaꞌcan;
68 sulu aꞌɨ́ɨjma pu antyíhuo ɨ Judá maj jitze ajtyámaꞌcan,
ajta aꞌɨ́jcɨ ɨ jɨríj tɨ jéehua jaxɨeꞌveꞌ Sión tɨ ántyapuaj.
69 Ajta tyeyúuj ájtaahuacaꞌ, aꞌyan ajtyéeviꞌcan tɨꞌɨj tajapuá tɨ séejreꞌ,
ajta jusén jɨmeꞌ tyámuaꞌ tyeetyájtoo, aꞌyájna tɨꞌɨj ɨ cháanacaj.
70 Aꞌɨ́j pu antyíhuo ɨ David tɨ aꞌɨ́ɨn puéꞌeen ɨ tɨ jahuɨɨreꞌ,
aꞌɨ́jna ɨ cányaꞌxɨɨ tɨ sɨɨriaꞌcaꞌaj,
71 capu cheꞌ jaatáꞌ tɨ cányaꞌxɨɨ sɨɨreꞌej,
sulu tɨꞌij ɨ tyeɨ́tyeristyamuaꞌmeꞌen huáchaꞌɨɨn,
tɨꞌij aꞌɨ́ɨn huaꞌajséejra ɨ Israel maj jitze ajtyámaꞌcan.
72 David puꞌij tyámuaꞌ tyihuóꞌchaꞌɨj ɨ tyeɨ́tyeristyamuaꞌmeꞌen ɨ Dios,
aꞌɨ́ɨ pu huóꞌchaꞌɨj ajta tyámuaꞌ tyihuoꞌcájuyetyej
jumuácaꞌ jɨn tyámuaꞌ tyiꞌuuriáaj ajta juxɨéjnyuꞌcaa tzajtaꞌ tyámuaꞌ éenyeꞌej.