102
I yoración jini tyʌcꞌlʌbil bʌ
1 C Yum, ubibeñon coración. Laꞌ cꞌotic c tꞌan yaꞌ baꞌ añet.
2 Mach a mʌcbeñon a wut como chʌncol cubin wocol.
Ñʌchꞌtyʌbeñon c tꞌan.
Cheꞌ mic pejcañet yom maꞌ waꞌ jacꞌbeñon.
3 Tyomocña miꞌ sʌc jilel j qꞌuin tyac cheꞌ bajcheꞌ butsꞌ.
Chʌncol i lejmel c bʌquel yubil, cheꞌ bajcheꞌ xutyuntyeꞌ chʌncol bʌ i pulel.
4 Cꞌun pañimil mi cubin. Tsaꞌix wen tyʌqui c pusicꞌal cheꞌ bajcheꞌ tyʌquin bʌ jam.
Mach bej comox uchꞌel ti caj i chꞌʌjyemlel c pusicꞌal.
5 Maꞌañix c bʌcꞌtyal. Tyojo bac jachix, ti caj cabʌl c pensal.
6 Añon tic bajñelil cheꞌ bajcheꞌ xmaꞌtyeꞌ mut muꞌ bʌ i yajñel ti tyʌquin bʌ joch lum.
Lajalon bajcheꞌ xcuj tꞌuchul bʌ tiꞌ jol jochol bʌ otyot.
7 Mach chꞌujbi c chaꞌlen wʌyel.
Lajalon bajcheꞌ xpurwoc bajñelil tꞌuchul bʌ tiꞌ jol otyot.
8 Ti jujumpꞌej qꞌuin miꞌ wajleñoñob jini j contrajob.
Miꞌ tꞌojtiꞌiñoñob jini muꞌ bʌ i michꞌ qꞌueloñob.
9 Chʌncol j cꞌux i tyʌñil cꞌajc yubil, i wenta c waj,
Xʌbʌl chʌncol cap yicꞌot i yaꞌlel c wut.
10 Chaꞌan ti caj wen michꞌet,
Ti a tyejcheyon, ti a chaꞌ chocoyon jubel.
11 Ora jach mi ñumel j qꞌuin tyac.
Mi tyamꞌan axñal tic pusicꞌal yubil, cheꞌ bajcheꞌ mi tyamꞌan ti ochꞌan qꞌuin.
Ti tyʌquiyon cheꞌ bajcheꞌ mi tyʌquin jam.
12 Jatyet, c Yum, maꞌan baꞌ bʌ ora mi quejel a jilel.
Mi quejel i bej sujbel a ñuclel ti pejtyelel ora.
13 Mi quejel a tyʌlel a pꞌuntyan Sión, jini chꞌujul bʌ lum.
Come jiñʌch i yorojlel ti a wʌ yajcʌ a pʌsꞌeñob a wutslel.
14 Jini ajtroñelob a chaꞌan miꞌ pꞌuntyañob jini i tyuñil tyac Sión.
Jinic tyo miꞌ mulan i tsꞌubejñal jini jejmen tyac bʌ otyot.
15 Ti caj maꞌ pꞌuntyan Sión, jini mach bʌ i chaꞌañobic Dios mi quejel i bʌcꞌñañob i cꞌabaꞌ lac Yum.
Ti pejtyelel jini yumʌlob ti mulawil mi quej i bʌcꞌñañetyob chaꞌan ti caj a ñuclel.
16 Lac Yum mi quejel i chaꞌ mel Sión.
Mi quej i pʌs i bʌ ti i ñuclel.
17 Miꞌ jacꞌbeñob i yoración jini pꞌumpꞌuñoꞌ bʌ,
Maꞌan miꞌ pꞌajbeñob i tꞌan.
18 Laꞌ tsꞌijbuntic ti jun bajcheꞌ miꞌ chaꞌlen lac Yum chaꞌan miꞌ qꞌuelob la calobilob, la quijob yicꞌot i yijob la quijob cꞌʌlʌ ti beleꞌ ora.
Jini max tyo bʌ baꞌan tiꞌ chꞌocʌyob mi quej i subob i ñuclel lac Yum.
19 Lac Yum am bʌ ti chꞌujul bʌ i yajnib yaꞌ ti panchan tiꞌ qꞌuele quixtyañujob ti mulawil.
20 Tsaꞌix yubibeyob i ʌjʌcñiyel jini cʌchʌloꞌ bʌ yubil,
Tsaꞌix i ñaꞌtyʌ i yʌcꞌob ti libre jini chʌncol bʌ i sajtyelob.
21 Quixtyañujob mi quejel i tsictisañob i ñuclel lac Yum yaꞌ ti Sión.
Mi quejel i subob i ñuclel lac Yum yaꞌ ti Jerusalén
22 Cheꞌ yaꞌ muchꞌquibilob tyʌlel, jini loqꞌuemoꞌ bʌ ti cabʌl lum tyac
Chaꞌan i chꞌujutisañob lac Yum.
23 Lac Yum tiꞌ jisʌ c pꞌʌtyʌlel ti xin bij yubil,
Tiꞌ comꞌisʌbeyon j qꞌuin tyac.
24 Tic sube: C Dios, mach a pʌyon majlel cheꞌ max tyo ñoxoñix.
Cuxulet ti pejtyelel ora. Junlajalet tiꞌ tyojlel calobilob,
quijob yicꞌot i yijob quijob cꞌʌlʌ ti beleꞌ ora.
25 Ti ñoj oniyix ti a waꞌchoco jini mulawil.
Jini chan i melbalʌch a cꞌʌb.
26 Mi quej i jilel majlel, pero bej cuxulet.
Mi quej i luꞌ tsuculiyel cheꞌ bajcheꞌ bujcʌl.
Mi quej i qꞌuextiyel cheꞌ bajcheꞌ mi laj qꞌuextyan lac bujc.
Mi quej i yʌjñel.
27 Pero mach cheꞌiquet, mach a wujil ñoxꞌan.
Mach jilet ti pejtyelel ora.
28 Xucꞌul mi quejel i bej ajñelob ti yij ti yij, i jiñʌjlelob jini ajtroñelob a chaꞌan. Mi quej a cotyañob.