103
Cabʌl i yutslel i pusicꞌal Dios
1 Laꞌ c chꞌujutisan c Yum ti pejtyelel c pusicꞌal.
Laꞌ c chꞌujutisan jini chꞌujul bʌ i cꞌabaꞌ ti pejtyelel c pꞌʌtyʌlel.
2 Laꞌ c chꞌujutisan c Yum ti pejtyelel c pusicꞌal.
Machꞌan mi saj ñajʌyel tic pusicꞌal chʌ bʌ yes mi yʌqꞌueñonla.
3 Jiñʌch muꞌ bʌ i ñusʌbeñon pejtyelel c mul.
Miꞌ lajmisʌbeñon pejtyelel j cꞌamꞌan tyac.
4 Miꞌ mʌñon loqꞌuel baꞌ colel c sajtyel.
Miꞌ ñoj pʌsꞌeñon i pꞌuntyaya yicꞌot i yutslel.
5 Miꞌ tijicñisañon ti wen tyac bʌ c majtyan wʌꞌ ti mulawil chaꞌan mic chaꞌ pꞌʌtyʌliyel cheꞌ bajcheꞌ xiyeꞌ.
6 Lac Yum miꞌ mel ti tyoj jini tyʌcꞌlʌbiloꞌ bʌ.
Mi quej i qꞌuextyʌbeñob i mul jini simaroñoꞌ bʌ.
7 Tiꞌ pʌsꞌe Moisés chʌ bʌ chʌncol i ñaꞌtyan tiꞌ pusicꞌal.
Tiꞌ pʌsꞌeyob israelob i chaꞌlibal.
8 Lac yum miꞌ chaꞌlen pꞌuntyaya, uts i pusicꞌal.
Jal mi michꞌan. Cabʌl miꞌ pꞌuntyañonla.
9 Mach ti pejtyelel ora mi quej i ticꞌonla.
Maꞌix mi quejel i michꞌqꞌuelonla ti beleꞌ ora.
10 Maꞌan ti yʌcꞌonla wocol cheꞌ bajcheꞌ cꞌamel an lac mul
Maꞌan tiꞌ qꞌuextyʌ lac mul cheꞌ bajcheꞌ cꞌamel an.
11 Como cabʌlʌch i yutslel i pusicꞌal cheꞌ bajcheꞌ i chañʌlel panchan
Tiꞌ tyojlel jini muꞌ bʌ i bʌcꞌñañob.
12 Cheꞌ bajcheꞌ i ñajtlel mulawil cꞌʌlʌl ti pasoꞌ qꞌuin cꞌʌlʌl ti pꞌʌjquib qꞌuin,
Chʌꞌʌch i ñajtlel tiꞌ chocbeyonla majlel lac mul.
13 Cheꞌ bajcheꞌ tyatyʌlob miꞌ pꞌuntyan i yalobilob,
Cheꞌ jeꞌel lac Yum miꞌ pꞌuntyan jini muꞌ bʌ i bʌcꞌñañob.
14 Como yujil cꞌuñonla, yujil melbilonla ti tsꞌubejn.
15 Poj jumucꞌ jach cuxulonla cheꞌ bajcheꞌ jam.
Jumucꞌ jach cuxulonla cheꞌ bajcheꞌ i ñich pimel.
16 Cheꞌ mi ñumel icꞌ mi yajlel.
Mach bej tsiquilix.
17 Pero an i yutslel lac Yum ti pejtyelel ora.
Lac Yum miꞌ pʌsꞌeñob i yutslel yicꞌot i tyojel jini muꞌ bʌ i bʌcꞌñañob yicꞌot jeꞌel i yalobilob, i yijob, yicꞌot i yijob i yijob cꞌʌlʌ ti beleꞌ ora.
18 Miꞌ pʌsꞌeñob i yutslel lac Yum.
Cheꞌ bajcheꞌ jaytiquil miꞌ chꞌujbibeñob jini trato bʌ i tꞌan
Muꞌ bʌ i yʌcꞌob tiꞌ pusicꞌal i chaꞌlen bajcheꞌ tsꞌijbubil ti mandar tyac.
19 Lac Yum tsaꞌix i waꞌchoco i yumintyel yaꞌ ti panchan
Miꞌ chaꞌlen yumʌl ti pejtyelel mulawil.
20 Chꞌujutisanla lac Yum, jatyetla ajtroñelet bʌ la i chaꞌan chꞌoyolet bʌ la ti panchan. An cabʌl laꞌ pꞌʌtyʌlel.
Chꞌujbibenla i tꞌan.
Melbenla chʌ bʌ mi xiqꞌuetla laꞌ mel.
21 Chꞌujutisanla lac Yum, jatyetla ajtroñelet bʌ la i chaꞌan
Muꞌ bʌ laꞌ chaꞌlen chʌ bʌ yom Dios.
22 Chꞌujutisan lac Yum ti pejtyelel i melbal,
Ti jujumpꞌej lum am bʌ tiꞌ wenta,
Laꞌ c chꞌujutisan c Yum ti pejtyelel c pusicꞌal.