11
Kulongelela kuchuwala
1 Wanhu wandusa kulongelela kwa Mndewa Mulungu kwa manhesa yawo. Mndewa Mulungu viyahulike, kehilwa na kawagalila moto. Moto uwo waka hagati yawo na utimbula ubanzi umwe wa lago.
2 Wanhu wamulilila Musa, nayo Musa kampula Mndewa Mulungu, na moto uja ufa.
3 Ivo hanhu baho hatangigwa Tabela, kwaviya moto wa Mndewa Mulungu waka hagati yawo.
Musa kosagula walangulizi malongo saba
4 Hagati ya Waisilaili kukala na bumbila dimwenga dikala na hamu ng'hulu. Waisilaili walila kaidi, walonga, “Muhavu chipate nyama imwenga ya kuja!
5 Chokumbuka somba wochidile Misili bila kuliha, na yaja matanga na matikiti na vitunguu va mayani na vitunguu na vitunguu saumu.
6 Mbali sambi chabule hamu ya kuja, habule chinhu chimwenga cha kuja ila mana muhala.”
7 Mana iyo ilinga fana mhule za ng'halasi, iwoneka fana nzelu chidogo.
8 Wanhu wazunguluka na kuiduganya, maabaho waidunda kwa mabwe ya kudundila, hebu kuitwanga muna yamatuli, maabaho kuitogosa muna zinongo na kusasala magate, umulile wake ulinga fana maandazi yambikigwe na mavuta.
9 Nhungwe viilagale uchanyha ya lago ichilo, mana ilagala na nhungwe iyo.
10 Musa kawahulika wanhu wolila muna zing'holo zawo zose, chila munhu hana ihanhu ha kwingilila muna dihema jake, Mndewa Mulungu kawona ludoko ng'hani, Musa nayo kawona viha.
11 Musa kamulongela Mndewa Mulungu, “Habali kunitendela vihile niye msang'hani wako? Habali hunogelwe na niye mbaka kuning'ha mbahasha ya wanhu wano wose?
12 Vino niye niweng'ha zinda wanhu wano wose? Vino niye niiyo niweleke? Habali kulonga niweke hachaha yangu fana mama viyokong'heza ching'hele, na kuwagala mbaka kuna iisi iuwalahile kuweng'ha wasaho zawo?
13 Kulihi kondanipate nyama ya kuweng'ha wanhu wano wose? Mana wanililila, walonga, ‘Ching'he nyama chije!’
14 Sidaha kuwapapa wanhu wano wose niidumwe, kwaviya mbahasha iyo izama ng'hani kumwangu.
15 One wahanitenda vino, muhavu unikome sambi. One uhanitogolela, sekeunileke muna yamagayo yangu.”
16 Mndewa Mulungu kamulongela Musa, “Niduganyile walume malongo saba kulawa mwa walangulizi wa Isilaili, waja weye kuwamanya kuwa niiwawo walangulizi wa wanhu wawo, uwagale hana dihema da Mulungu, weme hamwe na weye.
17 Niye nizahulumuka na kulonga na weye uko, nizasola hanhu ha muhe unikwing'hile, nizaweng'ha wanhu wawo. Nawo wezakutaza kupapa mbahasha za wanhu wano muladi sekeupape wiidumwe.
18 Walongele wanhu, ‘Muisafye kwaviya igolo mwizakuja nyama, kwaviya mumulilila Mndewa Mulungu, mulonga, “Yelihi yondayaching'he nyama chije? Mana kuja Misili chikala na muhavu.” Ivo kwa ichimu icho Mndewa Mulungu kezamwing'hani nyama muje.
19 Hamwizakuja siku dimwe hebu siku mbili hebu siku tano hebu siku longo hebu siku malongo maidi,
20 mbali mwizakuja mwezi mgima mbaka nyama iyo vondailawe muna zimhula zenu. Mwizating'hwa, kwaviya mumulema Mndewa Mulungu yeli hagati yenu na mulila haulongozi wake, mulonga, “Habali chisegela Misili?” ’ ”
21 Mbali Musa kalonga, “Wanhu wano nili hagati yawo ni wanhu 600,000 wowogenda kwa migulu, weye kulonga, ‘Nizaweng'ha nyama waje mwezi mgima.
22 Vino mabumbila ya ng'hondolo na ng'ombe yezachinjigwa kwa ichimu chawo? Vino somba wose muna ibahali wezavuwigwa kwa ichimu chawo?’ ”
23 Mndewa Mulungu kamulongela Musa, “Vino udahi wangu uhunguka? Lelo kwizawona fana mbuli yangu izalawilila kumwako hebu haizalawilila.”
24 Ivo Musa kalawa kunze na kuwalongela wanhu mbuli iyalongile Mndewa Mulungu. Maabaho kawaduganya walangulizi malongo saba na kawemiza kuzunguluka hema.
25 Mndewa Mulungu kahulumuka kulawa muna diwingu na kulonga nayo. Kasola hanhu ha muhe uli uchanyha yake na kauguma uchanyha ya walangulizi waja malongo saba. Muhe uwo viuwahulumukile, wandusa kulonga fana walotezi. Mbali watenda ivo mwanza umwe muhala.
26 Walangulizi waidi mwa waja walangulizi malongo saba wasigala muna dilago, imwe katangigwa Elidadi na imwenga Medadi. Muhe ukala uchanyha yawo, nawo wakala mwa waja wapetigwe. Kwaviya hawalawile kuhita kuna dihema, wandusa kulonga fana walotezi muna dilago.
27 Mbwanga imwe kakimbila kahita kumulongela Musa, “Elidadi na Medadi walonga fana walotezi muna dilago.”
28 Maabaho Yoshua mwana wa Nuni yakalile msang'hani wa Musa kwandusila viyakalile mbwanga, kedika na kalonga, “Musa, mwenevale wangu, walemese!”
29 Mbali Musa kedika, “Weye kowona migongo kwa ichimu changu? Ihawile vinoga wanhu wose wa Mndewa Mulungu wahawile walotezi na one Mndewa Mulungu yahawagumile muhe wake!”
30 Maabaho Musa na walangulizi wa Isilaili wabwela kuna dilago.
Mndewa Mulungu kogala ng'hwale
31 Maabaho Mndewa Mulungu kagala beho najo digala ng'hwale kulawa muibahali. Diwaleka walagalila habehi na lago, siku dimwe ubanzi uno na siku dimwenga ubanzi umwenga kuzunguluka lago. Wakala wotayaya mita imwe uchanyha ya isi.
32 Wanhu wasegela imisi iyo yose na ichilo chose na igolo yake yose, waduganya ng'hwale. Yapatile wadodo ng'hani kapata chilo 1,000. Maabaho wawanika wose mumgwazo wa lago kuzunguluka banzi zose.
33 Mbali viwakalile hawanakomeleza kuja nyama, Mndewa Mulungu kawehila wanhu na kawagalila hulo kulu.
34 Hanhu haja hatangigwa Kibilosi Hataava, kwaviya baho wawawanda wanhu wamelo.
35 Kulawa Kibilosi Hataava wanhu wagenda mbaka Haselosi, wakala uko.