12
Miliamu na Haluni womuwonela migongo Musa
Miliamu na Haluni wandusa kumulonga vihile Musa kwa ichimu cha imuke Mkushi iyamsolile. Walonga, “Vino Mndewa Mulungu kalonga kufosela Musa muhala? Halongile kufosela cheye iviya?” Mndewa Mulungu kahulika chiwalongile. Musa kakala munhu yoinyendanyenda ng'hani kufosa wanhu wamwenga wose muna iisi. Kwa kusinhukila Mndewa Mulungu kawalongela Musa na Haluni na Miliamu, “Mweye wose watatu laweni na mwize hana dihema da Mulungu.” Ivo watatu wawo wahita muna dihema da Mulungu. Mndewa Mulungu kahulumuka muna diwingu dilingile fana mhanda na kema hana ihanhu ha kwingilila muna dihema da Mulungu na kawatanga Haluni na Miliamu. Wose wakwenhuka kuulongozi. Maabaho kawalongela, “Tegelezeni mbuli zangu, kuhawa na mulotezi hagati yenu, niye Mndewa Mulungu nizailagusa kumwake muna yamalaguso, nizalonga nayo muna zinzozi. Mbali kwa Musa msang'hani wangu haili ivo, yeye kokwaminika muna iwanhu wangu wose. Nolonga nayo chihanga kwa chihanga, funhufunhu siyo kwa chifiso, koniwona niye Mndewa Mulungu vinili. Habali mweye hamudumbile kumulonga vihile Musa msang'hani wangu?” Mndewa Mulungu kawawonela ludoko na kasegela.
10 Maabaho wingu disegela uchanyha ya hema da Mulungu na Miliamu kawa na utamu wa mbende, mzelu fana pamba. Haluni kamulola Miliamu na kamuwona kana utamu wa mbende. 11 Haluni kamulongela Musa, “Mwenevale wangu cholamba sekeuchigaze kwaviya chitenda mbuli za chibozi na chitenda uhasanyi. 12 Sekeumtende yawe fana mwana yelekigwe yadanganike, yeli nusu ya lukuli lwake luwola.”
13 Musa kamulilila Mndewa Mulungu, kalonga, “Mulungu nokulamba umuhonye Miliamu!”
14 Mndewa Mulungu kamwidika, “Hata one tati yake kambwajulila mate muna ichihanga, sigambeyawone chinyala kwa siku saba? Kolondeka yafungigwe kunze ya lago siku saba, maabaho kezabwelezigwa mgati kaidi.” 15 Ivo Miliamu kakala kunze ya lago kwa siku saba na wanhu hawagendelele na umwanza mbaka Miliamu viyagaligwe mgati kaidi. 16 Maabaho wanhu wasegela Haselosi na weka lago kuna ichuwala cha Palani.