19
Paul kǫ̀ta Ephesus nììtła
1 Apollos kǫ̀ta Corınth wheda ekò Paul tı̨lı k'èè kǫ̀ta Ephesus ts'ǫ̀ naèhtła. Ekǫ Nǫ̀htsı̨ wecheekeè mǫ̀hdaa goaɂı̨.
2 Eyıt'à dagoehke, “Naxıgha ehkw'ı-ahodıì ajà gots'ǫ Yedàyeh Nezı̨ı̨ naxık'e ajà nì?” Paul gòhdı.
“Į̀le, Yedàyeh Nezı̨ı̨ weghǫ ts'ıìkw'o whìle,” gedı.
3 Paul gots'ǫ̀ hadı, “Hanì-ı̨dè ayìı t'à naxık'ètaìdzǫ nǫǫ̀?” gòhdı.
“John-Baptıst wenàowoò k'ę̀ę̀ gok'ètaìdzǫ,” gedı.
4 Paul gots'ǫ̀ hadı, “John-Baptıst wenàowoò k'ę̀ę̀ gok'ètaìdzǫǫ sìı edek'ets'ı̨ı̨lı̨ gha hǫt'e. Dǫ yek'èè nììtła ha sìı ehkw'ı adı weahwhǫ ha hǫt'e gòhdı ı̨lè. Eyı sìı Zezì hǫt'e,” Paul gòhdı.
5 Nǫ̀htsı̨ wecheekeè Paul hadı gıìkw'o t'à Zezì wıızì t'à gık'ètaìdzǫǫ̀ agejà.
6 Paul edılà gok'e ayį̀į̀là t'à Yedàyeh Nezı̨ı̨ gık'e ajà. Yatı ładı̨ı̨ t'à gogedeè agejà eyıts'ǫ Yedàyeh Nezı̨ı̨ dahxà xàyagı̨ı̨htı.
7 Hazǫǫ̀ t'à dǫzhìı hoònǫ-daats'ǫ̀-nàke gıxè hagòjà.
8 Paul, ekǫ Israel got'ı̨į̀ gıts'ǫ ełègehdèe-kǫ̀ gòɂǫǫ goyaèhtła. Taı sa haı̨wa gots'ǫ̀ edèdaedı-le xè Nǫ̀htsı̨ wenàowoò ghǫ gots'ǫ̀ goı̨de t'à, dǫ gıgha ehkw'ı-ahodıì agejà.
9 Hanìkò dǫ mǫ̀hdaa Paul k'èch'a agı̨ı̨wǫ, gıgha ehkw'ı-ahodı ha gı̨ı̨wǫ-le eyıts'ǫ eyı nàowo k'èch'a dǫ ts'ǫ̀ gogede. Eyıt'à Paul Israel got'ı̨į̀ gots'ǫǫ̀ xàèhtła. Nǫ̀htsı̨ wecheekeè edexè goòwa. Eyı tł'axǫǫ̀ dzę taàt'eè Tyrannus wekǫ̀ gocho goyìı dǫ ts'ǫ̀ gode.
10 Nàke xo ts'ǫ̀ hanì Paul dǫ ts'ǫ̀ goı̨de. Eyı ts'ıhɂǫ̀ Israel got'ı̨į̀ eyıts'ǫ Greece got'ı̨į̀ hazǫǫ̀ Asıa nèk'e nàgedèe sìı gots'ǫ̀ K'àowo weyatıì gıìkw'oò agejà.
11 Nǫ̀htsı̨, Paul ts'àdı t'à enıìyah deè łǫ hòèhtsı̨.
12 Paul k'oòhchìa eyıts'ǫ jǫhtè t'à-at'ı̨ı̨ sìı eyı kò dǫ-eyaelı̨ı̨ ts'ǫ̀ agehɂı̨ nı̨dè k'aàt'ıì aget'į̀ eyıts'ǫ ı̨nìłı̨ı̨ gots'ǫǫ̀ xàgeedè.
13 Israel got'ı̨į̀ mǫ̀hdaa ı̨nìłı̨ı̨ xàdegeezhı ha dǫ ta k'egedè. Zezì wıızì t'à ı̨nìłı̨ı̨ xàdegeezhı ha hogeèhdzà, hagedı, “Paul, Zezì wıızì t'à godee sìı wedahxà xàahdè,” gedı.
14 Dǫ ı̨łè Sceva wìyeh, yahtıı-gha-k'àowo elı̨, eyı weza łǫ̀hdı̨ ededı̨ aget'ı̨.
15 Hanìkò ı̨łàà ı̨nìłı̨ı̨ gots'ǫ̀ hadı, “Zezì wek'èehsǫ eyıts'ǫ Paul sı wek'èehsǫ, hanìkò naxı̨ amìı aaht'e?” gòhdı.
16 Dǫ ı̨nìłı̨ı̨ wets'ǫ̀-èlı̨ı̨ sìı gok'e nıìko eyıts'ǫ sıì gokwǫ̀ǫyaà-gǫǫ̀là t'à hazǫǫ̀ godaèht'è, ı̨ht'edę eyıts'ǫ gıdoò at'ı̨ xè xàtı̨mǫgeède.
17 Israel got'ı̨į̀ eyıts'ǫ Greece got'ı̨į̀ kǫ̀ta Ephesus nàgedèe sìı eyı hagòjà ghǫ gıìkw'o t'à sıì geèhyeh. Gots'ǫ̀ K'àowo Zezì wıızì t'asìı nechàa awèts'edı nǫǫ̀, gı̨ı̨wǫǫ̀ agejà.
18 Dǫ gıgha ehkw'ı-ahodı łǫ dǫ hazǫǫ̀ gonadąą̀ edenàowołı̨ı̨ ghǫ hǫdegeedè.
19 Dǫ mǫ̀hdaa ı̨k'ǫǫ̀ k'alagı̨ı̨dèe sìı edenı̨htł'è łą̀ą nègı̨ı̨la gà dǫ gonadąą̀ gık'enı̨hk'ǫ. Eyı enı̨htł'è wesǫǫ̀mbaà nagıhtà nı̨dè hazǫǫ̀ t'à sı̨laènǫ-lemì (50,000) sǫǫ̀mba degoo haàtłǫ elı̨.
20 Eyı gıxè hagòjà ts'ıhɂǫ̀ gots'ǫ̀ K'àowo weyatıì hazǫǫ̀ nèk'e ts'ǫ̀ ajà eyıts'ǫ weyatıì dǫ xè nàtsoò agodaade.
21 Eyı hazǫǫ̀ hagòjà tł'axǫǫ̀ Paul kǫ̀ta Jerusalem ts'ǫ̀ anade ha nıwǫ. Eyıt'à Macedonıa nèk'e eyıts'ǫ Achaıa nèk'e gok'ıìtła. Paul hadı, “Jerusalem nàwhıhtła tł'axǫǫ̀-ı̨dè Rome sı nàhtła ha,” hadı.
22 Tımothy eyıts'ǫ Erastus, eyı nàke geet'eè Paul ts'àgedıı sìı Macedonıa nèk'e ts'ǫ̀ goèhɂà, ededı̨ t'aa Asıa nèk'e whaà-lea ts'ǫ̀ ekǫ aı̨t'è.
Kǫ̀ta Ephesus nàdahoowo
23 Ekìıyeè k'e Zezì wenàowoò ts'ıhɂǫ̀ dǫ łǫ gıxè nàdahoowo.
24 Dǫ ı̨łè Demetrıus wìyeh satsǫ̀ degoo t'à nǫ̀htsı̨ą yàèhtsı̨. Gıts'ǫ nǫ̀htsı̨ Artemıs wìyeh wek'ę̀ę̀ wègaat'ı̨ı̨ nǫ̀htsı̨ą łǫ whehtsı̨. Dǫ hanì gehtsı̨ı̨ sìı gıt'à sǫǫ̀mba łǫ gehtsı̨.
25 Dǫ gıxèht'eè eghàlageedaa sìı hazǫǫ̀ gokàehɂà, hagòhdı, “Goxı̨, goılaà t'à sǫǫ̀mba łǫ ts'ehtsı̨ wek'èahsǫ hǫt'e.
26 Eyı dǫ Paul wìyeh sìı dǫ łǫ gha ehkw'ı adı t'à goghǫ daèhnǫ wek'èts'eezǫ. Wets'ıhɂǫ̀ dǫ łǫ eładı̨ ts'ǫ̀ agejà, jǫ kǫ̀ta Ephesus zǫǫ̀-le, yeè Asıa nèk'e sı k'àhdzǫ dǫ hazǫǫ̀ ghǫ daèhnǫ hǫt'e. Dıı goılà t'à t'asìı hòèlı̨ı̨ sìı nǫ̀htsı̨ agı̨ı̨t'e nıìle, gòhdı.
27 Goılaà sìı dǫ gıgha wet'àaɂà-le ade ha sǫnı. Eyı zǫǫ̀-le, Artemıs wets'ǫ yahtıı-kǫ̀-gocho gòɂǫǫ sìı dǫ gıgha wet'àaɂà-le agode ha. Asıa nèk'e dǫ hazǫǫ̀ eyıts'ǫ dıı nèk'e hazǫǫ̀ ts'ǫ̀ Artemıs ts'ǫ̀ yagehtı hǫt'e, hanìkò eyı hagot'ı̨ ts'ıhɂǫ̀ t'asìı deè elı̨-le gı̨ı̨hwhǫ ha,” gòhdı.
28 Dǫ hazǫǫ̀ egıìkw'o ekò gìch'è t'à yagìzeh, “Artemıs, Ephesus got'ı̨į̀ gha nǫ̀htsı̨ deè elı̨ ne,” gedıì yagìzeh.
29 Whaà-le-t'ıì kǫ̀ta hazǫǫ̀ dǫ nìdahogı̨į̀hdè. Dǫ nàke Gaıus eyıts'ǫ Arıstarchus, Paul xè Macedonıa nàgedè ı̨lèe sìı dagogıachì. Ełegeèhdìı-k'è gǫchàa ts'ǫ̀ gogeèwa.
30 Paul ekǫ dǫ hazǫǫ̀ ts'ǫ̀ gode ha nıwǫ hanìkò dǫ yexè aget'ı̨ı̨ sìı ekǫ nàtła ha gı̨ı̨hwhǫ-le.
31 Eyı nèk'e gha k'aodèe mǫ̀hdaa Paul weàgı̨ą agı̨ı̨t'ee sìı ededı̨ kò yatı gıdanìı̨ɂǫ, hagıìhdı, “Neghǫ hoejı̨ t'à, ełegeèhdìı-k'è nàwı̨ı̨tła-le,” gedı gıghǫnàdaetì.
32 Ekǫ dǫ hazǫǫ̀ gıxè nàdahoowo t'à gıgha hok'èedzǫ-le hòɂǫǫ̀ agòjà. Dǫ mǫ̀hdaa t'asìı ghǫ gezeh, mǫ̀hdaa t'asìı eyıì-le ghǫ gezeh. Ayìı gha eyı nègı̨ı̨dee sìı gık'èezǫ-le.
33 Israel got'ı̨į̀ gı̨ı̨lı̨ı̨ sìı dǫ ı̨łè Alexander wìyeh dǫ hazǫǫ̀ nadąą̀ nàwoò agį̀į̀là. Dǫ mǫ̀hdaa gıts'ǫ̀ gezeh, dànì gode ha sìı gıts'ǫ̀ hadı. Alexander edèot'ı̨ gha gode ha nıwǫ t'à dǫ ts'èwhı̨į̀ agı̨ı̨t'e ha edılà t'à gogha nàɂeetsį̀.
34 Hanìkò ededı̨ Israel got'ı̨į̀ hǫt'e gık'èhoèhzà ekò nàke sadzeè haı̨wa ts'ǫ̀ dǫ hazǫǫ̀ ehghàà yagìzeh, hagedı, “Artemıs, Ephesus got'ı̨į̀ gha nǫ̀htsı̨ deè elı̨!” gedıì yagìzeh.
35 Nǫǫde kǫ̀ta gha k'àowo dǫ xè ts'èwhı̨į̀ hòɂǫǫ̀ ayį̀į̀là. Dǫ ts'ǫ̀ hadı, “Ephesus got'ı̨į̀, jǫ kǫ̀ta dǫ nàgedèe sìı Artemıs, nǫ̀htsı̨ deè, wets'ǫ yahtıı-kǫ̀-gocho k'ègedì agı̨ı̨t'e, dıı nèk'e dǫ hazǫǫ̀ gık'èezǫ hǫt'e. Eyıts'ǫ kwe wek'ę̀ę̀ wègaat'ı̨ı̨ sìı yak'e gots'ǫ hodàèhkw'o, eyı sı gık'èezǫ hǫt'e.
36 Ehkw'ı ats'edı-le gògedı ha dìì t'à ts'èwhı̨į̀ aaht'e eyıts'ǫ nàdahoahdè-le.
37 Dıı dǫ nàke naxıts'ǫ yahtıı-kǫ̀-gocho gots'ǫ egeèɂı̨-le eyıts'ǫ Artemıs k'èch'a xàyagı̨ı̨htı-le kò, jǫ nègıahła.
38 Demetrıus eyıts'ǫ dǫ wexèht'eè la gıts'ǫ sìı t'asìı ghǫ dǫ k'èch'a agı̨ı̨wǫ nı̨dè gıghǫ nàyaetıì agogııle. Ekǫ dǫ-sınìyaehtıı-dǫǫ̀ dèhkw'e hǫt'e, ekǫ dǫ k'e nìdahogeeɂà ha dìì-le.
39 Eyı wedę t'asìı eyıì-le ghǫ goahde ha dahwhǫ nı̨dè, dèe-ts'ǫ̀-k'àowo nàowoò k'ę̀ę̀ weghàlats'eeda ha hǫt'e.
40 Ekò dıı dzęę̀ k'e nàdahoowo ts'ıhɂǫ̀ dèe-ts'ǫ̀-k'àowo hoìla hots'ehtsı̨ gı̨ı̨wǫ ha sǫnı. T'asìı wet'àaɂà-le ghǫ agot'ı̨ ts'ıhɂǫ̀ edek'edats'eedı ha dìì,” k'àowo hadıì dǫ ts'ǫ̀ goı̨de.
41 Hadı tł'axǫǫ̀ dǫ hazǫǫ̀ nagoèhɂà.