25
Paul k'àowo Festus wenadąą̀ edek'edaedı
1 K'àowo Festus taı dzęę̀ t'à eyı nèk'e nììtła tł'axǫǫ̀ kǫ̀ta Caesarea gots'ǫ kǫ̀ta Jerusalem ts'ǫ̀ ajà.
2 Ekǫ t'aa yahtıı-gha-k'aodèe eyıts'ǫ Israel got'ı̨į̀ gha k'aodèe gı̨ı̨lı̨ı̨ sìı gıxè ełegıadì. Ayìıha Paul k'e nìdahogį̀ı̨ɂǫǫ ghǫ k'àowo Festus ts'ǫ̀ hagedı.
3 Israel got'ı̨į̀, k'àowo Festus gogha t'asìı hayele ha gı̨ı̨wǫ t'à dageehke. Paul Jerusalem ts'ǫ̀ geechı ha gı̨ı̨wǫ. Tı̨lı k'e nagıadè nı̨dè ekǫ ts'atà nàdegeeɂį̀ı̨ gà ełaàgıìhwhı ha gı̨ı̨wǫ.
4 Hanìkò k'àowo Festus gots'ǫ̀ hadı, “Paul, kǫ̀ta Caesarea ekǫ wedaàtǫ hǫt'e. Whaà-le-ı̨dè sı̨ ekǫ nàhtła ha.
5 Naxıts'ǫ̀ k'aodèe mǫ̀hdaa sexè agııde, dıı dǫ Paul ekǫ-le hòèhtsı̨ nı̨dè ekǫ nàyaetıı-kǫ̀ gık'e nìdahoeɂà ha dìì-le,” gòhdı.
6 K'àowo Festus ek'èdı̨ hanì-le-ı̨dè hoònǫ dzęę̀ ts'ǫ̀ Jerusalem goxè ı̨ı̨dà, eyı tł'axǫǫ̀ kǫ̀ta Caesarea ts'ǫ̀ anajà. Ek'èdaedzęę̀ k'e k'àowo Festus nàyaetı xèhoį̀hwho. Weyatıì k'e Paul yenadąą̀ nàwoò agı̨į̀là.
7 Paul eyı nègeèchì ekò Israel got'ı̨į̀ gha k'aodèe Jerusalem gots'ǫ eyı nègı̨ı̨dee sìı Paul wemǫǫ̀ nàgeèhza. Ekǫ-le hodeè łǫ eghàlaı̨dà gedı t'à gık'e nìdahòı̨ɂǫ, hanìkò asį̀į̀ ehkw'ı agedıı sìı wek'èhoedzǫǫ̀ agele ha dìì.
8 Eyıt'à Paul edegha gode, hadı, “Israel got'ı̨į̀ gınàowoò k'èch'a eghàlaıhdà nıìle, eyıts'ǫ Nǫ̀htsı̨kǫ̀-gocho eyıts'ǫ dèe-ts'ǫ̀-k'àowo Caesar k'èch'a hòwhıhtsı̨ nıìle,” gòhdı.
9 K'àowo Festus Israel got'ı̨į̀ gha k'aodèe gınì k'ę̀ę̀ k'ehoɂa ha nıwǫ t'à Paul ts'ǫ̀ hadı, “Ayìı nek'e nìdahogį̀ı̨ɂǫǫ sìı asį̀į̀ Jerusalem ekǫ nesınìyaetı ha neewǫ?” yèhdı.
10 Paul yets'ǫ̀ hadı, “Dèe-ts'ǫ̀-k'àowo Caesar gha dǫ-sınìyaehtıı-dǫǫ̀ dıì wenadąą̀ nàhwho hǫt'e, ehkw'ı ha nı̨dè jǫ sesınìyaetı ha ı̨lè. Israel got'ı̨į̀ gıts'ǫ̀ ekǫ-le eghàlaıhdà nıìle, nı̨ kò wek'èı̨zǫ hǫt'e.
11 Ekǫ-le hòwhıhtsı̨ k'èxa ełaehwhı ha nı̨dè, į̀le dehsı̨ ha nıìle. Hanìkò dıı Israel got'ı̨į̀ ayìı gha sek'e nìdahogį̀ı̨ɂǫǫ sìı ehkw'ı agedı-le nı̨dè dǫ wı̨ı̨zìı gotł'aàsehtè ha wegha hòɂǫ nıìle. Dèe-ts'ǫ̀-k'àowo Caesar wenadąą̀ sesınìyaetı ha dehwhǫ!” Paul k'àowo Festus ts'ǫ̀ hadı.
12 K'àowo Festus edecheekeè ts'ǫ̀ goı̨de tł'axǫǫ̀ hadı, “Dèe-ts'ǫ̀-k'àowo Caesar wenadąą̀ sesınìyaetı ha nı̨ı̨dı t'à, Caesar ts'ǫ̀ anedle ha,” yèhdı.
Festus k'àowocho Agrıppa ts'ǫ̀ gode
13 Nàke dzęę̀-le nı̨dè taı dzęę̀ k'ehǫǫwo tł'axǫǫ̀ k'àowocho Agrıppa eyıts'ǫ ts'èko Bernıce k'àowo Festus ts'àgede ha, kǫ̀ta Caesarea nègı̨ı̨de.
14 Łatsaa eyı agı̨ı̨t'e ha t'à k'àowo Festus, Paul ghǫ k'àowocho xè goado, hayèhdı, “Dǫ ı̨łè jǫ dǫ-danìı̨laa-kǫ̀ wheda. K'àowo Felıx jǫ yèhda ı̨lè.
15 Jerusalem ts'ǫ̀ ahjà ekò yahtıı-gha-k'aodèe eyıts'ǫ Israel got'ı̨į̀ gha k'aodèe sìı dıı dǫ k'e nìdahogį̀ı̨ɂǫ. Eyıt'à Paul ełaàwı gha wesınìyahtı ha segı̨ı̨hwhǫ.
16 “Hanìkò hagèehsı̨, ‘Dǫ weghǫ nàyaetı kwe-t'ıì dǫ tł'aàts'ehtè ha sìı Roman gınàowoò gha wets'àet'ǫ hǫt'e,’ gèehsı̨, ‘Dǫ wek'e nìdahoòt'ǫ nı̨dè amìı ayı̨į̀làa sìı t'akwełǫ̀ǫ̀ gonadąą̀ nàwo gà weghǫ nàyaetı ha hǫt'e, eyıts'ǫ edegha gode ha hǫt'e.’
17 Eyıt'à jǫ sexè nègı̨ı̨de ekò ekòet'ıì ek'èdaedzęę̀ k'e nàyaetı ahłà, eyıts'ǫ Paul gonadąą̀ nàwo awèhłà.
18 Israel got'ı̨į̀ gha k'aodèe gık'e nìdahòı̨ɂǫǫ sìı xàyagı̨ı̨htı, hoìla hòèhtsı̨ı̨ gıìhdı ha dehwhǫ ı̨lè hanìkò hanì-le nǫǫ̀.
19 Ayìı gıgha ehkw'ı-ahodı ghǫ eyıts'ǫ dǫ Zezì wìyeh ghǫ gık'èch'a gode. Eyı dǫ sìı ełaı̨wo ı̨lè hanìkò ı̨łaà eda ne Paul yı̨ı̨hwhǫ.
20 Eyı dǫ dànì wesınìyahtı ha wek'èehsǫ-le, eyıt'à dawııhke, ‘Nek'e nìdahogį̀ı̨ɂǫ t'à asį̀į̀ Jerusalem ekǫ sexè nesınìyaetı ha neewǫ?’ wèehsı̨.
21 Hanìkò Paul, dèe-ts'ǫ̀-k'àowo Caesar wenadąą̀ sesınìyaetı ha dı t'à, ekǫ ade gots'ǫ̀ jǫ dǫ-danìı̨laa-kǫ̀ wheda hǫt'e. Caesar ts'ǫ̀ awehłe gots'ǫ̀ eghǫǫ-dǫǫ̀ gık'èdì ahłà,” k'àowo Festus hadıì k'àowocho Agrıppa ts'ǫ̀ goı̨de.
22 Eyıt'à k'àowocho Agrıppa, Festus ts'ǫ̀ hadı, “Eyı dǫ weèhkw'ǫ ha dehwhǫ,” yèhdı. “Satsǫ-ı̨dè wǫǫ̀hkw'ǫ ha,” Festus yèhdı.
Paul k'àowocho Agrıppa wenadąą̀ edek'edaedı
23 Ek'èdaedzęę̀ k'e k'àowocho Agrıppa eyıts'ǫ Bernıce nàyaetıı-kǫ̀ goyageède, t'asìı wet'àaɂàa deè lanì goyagı̨ı̨de. Eghǫǫ-dǫǫ̀ gha k'aodèe eyıts'ǫ kǫ̀ta k'aodèe goxè aget'ı̨. K'àowo Festus weyatıì k'e Paul goyageèhchì.
24 Festus hadı, “K'àowocho Agrıppa, eyıts'ǫ dǫ hazǫǫ̀ jǫ dahkw'ee sìı dıı dǫ ghàahda. Israel got'ı̨į̀ hazǫǫ̀ kǫ̀ta Jerusalem eyıts'ǫ jǫ kǫ̀ta Caesarea gots'ǫ dıı dǫ k'e nìdahogį̀ı̨ɂǫ, eda ha-le, gedıì gezeh ı̨lè.
25 Hanìkò hoìla wı̨ı̨zìı hòèhtsı̨ nıìle, yek'èxa ełaàwı ha whìle. Dèe-ts'ǫ̀-k'àowo Caesar sesınìyaetı ha dı t'à, kǫ̀ta Rome ts'ǫ̀ awehłe ha.
26 Hanìkò dèe-ts'ǫ̀-k'àowo Caesar ts'ǫ̀ dànì weghǫ eehtł'è ha sìı ı̨łaà wek'èehsǫ-le. Eyıt'à jǫ naxınadąą̀ nàwo ahłà. K'àowocho Agrıppa nı̨ t'aa nenadąą̀ nèwııhtı̨ hǫt'e. Jǫ weghǫ ełets'eèhdìı t'à edahxǫ weghǫ t'asìı eehtł'è ade ha sǫnı.
27 Dǫ wedaètǫǫ sìı ayìı wek'e nìdahoòt'ǫ dek'enèts'ı̨ı̨tł'è-le et'ıì Caesar ts'ǫ̀ awets'ele ha dìì,” gòhdı.