7
Dǫ dıı haàtłǫ nàgıakwı̨ hǫt'e
1 Eyı tł'axǫǫ̀ yak'eet'ı̨į̀ dı̨ dıı nèk'e wedzıì dı̨ gòlaa gà nàgeèhza gìgoèht'į̀. Dèè gok'e, tı k'e eyıts'ǫ ts'ı ta nı̨hts'ı ade ha-le t'à nı̨hts'ı ı̨dè ts'ǫ̀ gıtǫ̀.
2 Eyı tł'axǫǫ̀ sa kàɂàa gots'ǫ yak'eet'ı̨į̀ eyıì-le naetłe wègoèht'į̀. Eyı yak'eet'ı̨į̀ sìı Nǫ̀htsı̨ Edaa wets'ǫ enı̨htł'è k'e nàts'eekwį̀ı̨ k'eɂa. Yak'eet'ı̨į̀ dı̨ tı eyıts'ǫ dèè tsį̀gehwhı ha gıghàhòt'ǫǫ sìı gots'ǫ̀ hòtł'ò naìdzeh hadı,
3 “Nǫ̀htsı̨ wecheekeè gıts'abeè k'e nàts'eekwį̀ gots'ǫ̀, dèè, tıcho eyıts'ǫ ts'ı tsį̀ahwhı-le,” gòhdı.
4 Eyı tł'axǫǫ̀ dıı hats'edıì hǫt'e, “Dǫ dıı haàtłǫǫ sìı nàgıakwı̨ hǫt'e: Israel got'ı̨į̀ ts'ǫ ı̨łèakw'eènǫ-daats'ǫ̀-dı̨ènǫ-daats'ǫ̀-dı̨-lemì (144,000).
5 Judah got'ı̨į̀ ts'ǫ hoònǫ-daats'ǫ̀-nàke-lemì (12,000),
Ruben got'ı̨į̀ ts'ǫ hoònǫ-daats'ǫ̀-nàke-lemì (12,000),
Gad got'ı̨į̀ ts'ǫ hoònǫ-daats'ǫ̀-nàke-lemì (12,000),
6 Aser got'ı̨į̀ ts'ǫ hoònǫ-daats'ǫ̀-nàke-lemì (12,000),
Naphtalı got'ı̨į̀ ts'ǫ hoònǫ-daats'ǫ̀-nàke-lemì (12,000),
Manaseh got'ı̨į̀ ts'ǫ hoònǫ-daats'ǫ̀-nàke-lemì (12,000),
7 Sımeyon got'ı̨į̀ ts'ǫ hoònǫ-daats'ǫ̀-nàke-lemì (12,000),
Levı got'ı̨į̀ ts'ǫ hoònǫ-daats'ǫ̀-nàke-lemì (12,000),
Isakar got'ı̨į̀ ts'ǫ hoònǫ-daats'ǫ̀-nàke-lemì (12,000),
8 Zebulun got'ı̨į̀ ts'ǫ hoònǫ-daats'ǫ̀-nàke-lemì (12,000),
Joseph got'ı̨į̀ ts'ǫ hoònǫ-daats'ǫ̀-nàke-lemì (12,000),
eyıts'ǫ Benjamın got'ı̨į̀ ts'ǫ hoònǫ-daats'ǫ̀-nàke-lemì (12,000).
Hazǫǫ̀ t'à dǫ haàtłǫǫ nàgıakwı̨ hǫt'e,” hats'edıì.
Dǫdeè ɂeh degoo nedèe yìı geèhkw'e
9 Eyı tł'axǫǫ̀ senadąą̀ dǫ łǫ t'à łǫ gìgoèht'į̀. Dǫ sıì łǫ t'à dǫ wı̨ı̨zìı goıhtà ha dìì. Dǫ hazǫǫ̀ xàɂaa, yatı hazǫǫ̀ xàɂaa eyıts'ǫ dıı nèk'e hazǫǫ̀ gots'ǫ dǫ agı̨ı̨t'e. Daèhchı̨cho eyıts'ǫ eyı Sahzǫ̀ą nadąą̀ nàgeèhza. ʔeh degoo nedèe yìı geèhkw'e eyıts'ǫ ɂorı dagıale.
10 Hòtł'ò hagedı:
“Gonǫ̀htsı̨ eyı daèhchı̨cho k'e whedaa eyıts'ǫ eyı sahzǫ̀ą edaxàgogı̨ı̨la hǫt'e,” gedıì gezeh.
11 Yak'eet'ı̨į̀ hazǫǫ̀ eyı daèhchı̨cho, ǫhdah naènǫ-daats'ǫ̀-dı̨ eyıts'ǫ t'asìı dı̨ godìı sìı gomǫǫ̀ nàgeèhza. Daèhchı̨cho wenadąą̀ nàgògı̨ı̨hgè, gınì dèè xèedìı xè Nǫ̀htsı̨ ghàsǫgeedı,
12 hagedı,
“Amen! Nǫ̀htsı̨ weghàsǫts'eedı xè welǫ whìle ts'ǫ̀ masì wets'ı̨ı̨hwhǫ.
Nǫ̀htsı̨ t'aats'ǫǫ̀ enıìyah t'à gǫǫzǫ xè nàtso wehòhɂǫ welè. Amen!” hagedı.
13 Eyı tł'axǫǫ̀ ǫhdah ı̨łè daseehke, “Eyı dǫ ɂeh degoo nedèe yìı geèhkw'ee sìı amìı agı̨ı̨t'e? Eyıts'ǫ edı̨į̀ gots'ǫ aget'ı̨?” sèhdı.
14 Eyıt'à wets'ǫ̀ haehsı̨, “K'àowo, nı̨ wek'èı̨zǫ hǫt'e.”
Sets'ǫ̀ hadı, “Eyı agı̨ı̨t'ee sìı hòtł'ò dagı̨ı̨ɂà hǫt'e. Sahzǫ̀ą wedoò t'à edeɂeè k'enagı̨ı̨htso t'à gıɂeè degoò agį̀į̀là hǫt'e.
15 Eyıt'à,
Nǫ̀htsı̨ wedaèhchı̨cho nadąą̀ nàgeèhza hǫt'e.
Dzęę̀, toò, Nǫ̀htsı̨kǫ̀-gocho goyìı gıgha eghàlaeda.
Eyı daèhchı̨cho k'e whedaa sìı edets'ǫ nı̨hbàa gok'e ayele ha.
16 Welǫ whìle ts'ǫ̀ degeèhdì ha-le eyıts'ǫ tı sı ghageewı ha-le.
Sadeè nàtsoo gık'e ade ha-le, eyıts'ǫ sıì edı t'à dagı̨ı̨ɂa ha-le.
17 Eyı sahzǫ̀ą daèhchı̨cho gà tanı nàwoo sìı sahzǫ̀ą-k'èdìı-dǫǫ̀ lanì gok'èdì ha.
Tı nı̨ı̨lı̨ı̨ wet'à ts'eedaa sìı ts'ǫ̀ agole ha.
Eyıts'ǫ Nǫ̀htsı̨ gonatì hazǫǫ̀ yedeedı ha,” ǫhdah hasèhdı.