15
Unabii chinyume cha Moabu
1 Huno ni ujumbe kuhusu Moabu:
Moabu ikasira,
mana mudzi wa Ari ukaangamizwa usiku mmwenga.
Moabu ikasira,
mana mudzi wa Kiri ukaangamizwa usiku mmwenga.
2 Atu a Diboni akaambuka
kuphiya mwatu mwa dzulu mwa ibada kpwendarira
Amoabu anaririra myango ya Nebo na Medeba.
Osi akanyolwa viphala
na kunyolwa vyeru vyao tsetsetse.
3 Atu barabarani akavwala magunia,
nao ario midzini
anarira na kusononeka.
4 Atu a Heshiboni na Eleale anarira sana
na sauti zao zinasikirwa hadi kufika Jahazi.
Kpwa sababu iyo anajeshi a Moabu achiotsukula silaha anakota kululu
kuno anakakama kpwa wuoga.
5 Moyo wangu unaririra Moabu
mana atue anachimbirira Soari
na Egilathi-Shelishiya.
Anjina anaambuka na barabara iphiyayo Luhithi
kuno anarira.
Anjina anazorera Horonaimu
kuno anarira kululu kusononekera kuangamizwa kpwao.
6 Chidzuho chiihwacho Nimurimu chikauma,
nyasi zikanyala
na mitse ikafwa
na taphana chochosi chimeracho.
7 Kpwa hivyo hizo mali zao arizoweza kudziikira,
andazitsetseza azivuse Dete ra Miandzi.
8 Mana chiriro chao chikagota Moabu yosi,
chikafika hadi Egilaimu
na chiriro chao cha sonono chikafika hadi Beeri-Elimu.
9 Muho urio phephi na mudzi wa Diboni ni milatso mihuphu
na bado Mlungu achere na tsukizi kali, kpwa ajili ya atu hinyo.
Simba andaindza atu a Moabu ariochimbira
phamwenga na hinyo ariosala.