8
Maneno ga mwanamwali
1 Kalapho u mwenehu wa chilume,
mmwenga wa nyumba yehu,
phahi ningekudonera chingʼangʼa
na takungekala na mutu wa kuhuoloha na chala cha lawama.
2 Ningekuhala na kukulongoza kuphiya nyumbani kpwa mayo,
hadi chumbani kpwa ye yenivyala,
na kuko ningekupha uchi wangu wa zabibu uchiotiywa vilungo,
uchi wa makomamanga gangu.
3 Mkpwonoo wa kumotso ungekala tsini ya chitswa changu,
na mkpwonoo wa kulume unaniphaphasa.
4 Niapirani mwimwi achetu a Jerusalemu,
kukala tamundalamusa wala kugondomola mkpwatyo
hadi wakatiwe ufike.
Wira wa sita
Asichana a Jerusalemu
5 Ni ani yuya edzaye kula weruni,
achiyegadzamira wendewe?
Maneno ga mwanamwali
Phapho kolo ya mtofaa nakulamusa,
phapho ambapho mayoo wakala na utsungu wa kudzivugula,
phapho ambapho mayoo wakuvyala.
6 Andika dzina rangu phako moyoni,
dzirinde kpwa sababu yangu tu,
mana mendzwa ina nguvu dza nguvu za chifo!
Wivu ni mkali dza kuzimu,
nao unaaka dza moho mkali
na ukaliwe ni wa kuolaga.
7 Ela vidzuho vya madzi taviweza kuzimya moho wa mendzwa,
hata myuho mikulu taiweza kuuzimya.
Ichikala mutu angehumira maliye yosi kugula mendzwa,
atu angemʼbera tsetsetse!
Ndugu a chilume a Mwanamwali
8 Huna mwenehu wehu mchetu,
ambaye bado kadzangbwemera nyaho.
Hundamuhenderani mwenehu wehu,
ndiphokpwedzaposwa?
9 Ichikala ye mwenye ni ukuta,
hundampamba dza minara ya feza.
Ela achikala ni ryango,
phahi hundamrinda na mbao za muerezi.
Maneno ga mwanamwali
10 Mimi nákala dza ukuta,
na nyaho zangu kala zikaima dza minara!
Kpwa hivyo wende wangu anaphonilola
anaphaha amani na anaona kukala nkatosheka.
11 Selemani kala ana munda wa mizabibu hiko Baali-Hamoni,
ambao kala nkuukodi kpwa akurima.
Chila mmwenga kala nkuripha vipande elufu vya feza
bada ya kuvuna matunda gao.
12 Munda wangu wa mizabibu ni wangu mwenye,
uwe Selemani kala na elufuzo za feza,
na chila anayetundza matundage
naasale na maganage mairi.
13 Uwe usagalaye mundani,
ayangu anagodzera kusikira sautiyo,
ela mimi tu na nisikire rakaro!
Maneno ga mwanamwali
14 Henda wangbwi, wende wangu,
mairo dza ga chiphala,
ama chidzisa,
dzulu ya vidzango ambako vilungo nkumera!