Baluwa jha
Yuda
Ulongolelo
Baluwa jhikemwa Yuda litoi liina lya jwajhandike. Yuda akichimulila jwenio kubhehe ndi nnongo jwa Yakobu, na hele nnongo jwa Yecho, mu nchitale gwa 1. Hele bhando bhakamanye kubhehe Yuda akibha nnongo jwa Yecho. Tumanyajhe anda ikibha baluwa jhenje ikajhandikwe kwa lilongo lende lilinyeketii Kilichitu, kabhele ibhonekina akachomi bhake bhibhalengita kutumbula bhakibha Akayahude, kwa kulengana na majhandiko kuhumii mu Lilaghano lya Makacho. Pamonga ibhonikina baluwa jhenje ijhandikwe kwa “Bhinkemitwe na Chapanga na bhimipalwa na Chapanga Tate gwito na kulondwa na Yecho Kilichitu,” mu nchitale gwa 1. Na baluwa jhene ibhonikine ikajhandikwe muchaka cha makome chita kuhumii pabhelwika Yecho Kilichitu.
Chikinkangita Yuda kujhandika baluwa jhenje kwa bhando bhubhanyeketii Kilichitu, kwakelebhuha kwa malobhe gha bhabhola bhuwange, mu nchitale gwa 4. Atumii malobhe na ilebhe kuhumii mu majhandiko gha Lilaghano lya Makacho. Helahela mu baluwa jhenje ibhii ilebhe ilandine na ilebhe ibhii mu baluwa jha Petile jha ubhele, kwakelebhuha malobhe gha bhabhola bhuwange mu nchitale gwa 4 na 2 Petile 2:1. Hele achimulila malobhe gha akatumiche bha kunane na ilebhe ya ku Sodoma na ku Gomola.
Ghughabhii mukitabo
Yuda atumbuu kwajhambucha bhando, nchitale gwa 1-2.
Yuda kabhele apiya nhwalo gwa kwajhandikila kwapwatalila panane jha akabhola bhuwange, mu nchitale gwa 3-4.
Kubhoka peniya abhapwatalila bhachomache bhake kwa kulonge ilebhe ibhapitile bhando mu Lilaghano lya Makacho, nchitale gwa 5-16.
Kabhele abhapwatalila na kwalobholela ilebhe yapala kuhenga kwa ghala ghibhakibholite, nchitale gwa 17-23.
Kubhoke kwa Yuda ijhomolela baluwa jhake kwa kunnomba Chapanga.
1
1 Ne Nayuda, ntumiche gwa Yecho Kilichitu na nnongo mundo Yakobu.
Ninnyandikila mangota bhinkemitwe na Chapanga na bhimipalwa na Chapanga Tate gwito na kulondwa na Yecho Kilichitu.
2 Ninnyope kwa Chapanga ampela twe kiya na uteeke na upalo.
Akabhola bhuwange
3 Akakoche bhango bhunimpahile, pung'aghita kunnyandikila nhwalo gwa ughombokeko gwito tabhoha, nambo nilola nipalwa kunnyandikila na kwaleke mwojho kupala kukikengelela kihobholelo chibhapekiwe bhando bha Chapanga mala jhimo tugha.
4 Nhwalo bhabhii bhando bhangannyinamila Chapanga bhajhingii kwa chile pakate jhito, na kughalambula malobhe ghanga gwa umbone gwa Chapanga bhajhambulile kwa tama yabhe yanganandela na kunkana Yecho Kilichitu jwabhii kanjika ndo kilongoche na Bhambo gwito. Nambo Majhandiko gha Chapanga ghakalonge kuhumii makacho luhadabulo lulupakwakolela kwa bhando bheniya.
5 Nambo ngohe nipala kunkombocha kilebhe chakiteno, mu kalobholilwe kuhumii pitutumbula. Nkombokela Bhambo chabhaghombwila bhando bhu ku Ichilahele kubhoka mu kilambo chu ku Michile, nambo palonge ngabhakomalikila bhala bhubhakanite kujheketela.
6 Nkombokela akatumiche bha kunane kwa Chapanga bhibhakalepelii kukamulii ukolongwa gwabhe na ngabhalekita itamo yabhe, Chapanga abhabhekite akatumiche bheniya mulubhendo na kwatabha machiko ghoha ghangapeta kwa minyololo kupala bhalendelela luhadabulo lwabhe kwa mu lichiko lela likolongwa.
7 Nkombokela hele ku Sodoma na ku Gomola na miche jha pahina jhake, bhando bhake bhakatei ngita bheniya akatumiche bha kunane kwa Chapanga, bhakatehi ngongola na ilebhe ibhatehila kuyeto na chela chibhapanginwe: Bhakahadabwilwe kwa mwotu gwangahimika machiko ghoha ghangapeta, kupala ghabhaha mabholo gha kwakelebhuwa bhando bhoha.
8 Yene, ndi chibhabhii bhando bhamba. Maloto ghabhe ghalongocha kuihakaa yegha jhabhe bheniya, kuupucha ukindendeke gwa Chapanga na kuligha ihumbe ina ukolo ya kunane kwa Chapanga.
9 Ata Mikaele, jhumo pakate jha akatumiche akakolongwa bha kunane kwa Chapanga, akatei jhe yenio. Pataungina na Limbembela nhwalo gwa yegha jha Mucha, Mikaele akajhighite jhe kunhadabuu Limbembela kwa maligho, nambo akalongii: “Bhambo jwenio apwatalile.”
10 Nambo bhando bhamba bhiligha chochoha changakimanya na ilebhe ibhaimanya kwa mawacho ghabhe bhene ngita inyama yangaholela malango, gheniya ghighakomelekeya.
11 Nabhalola choto! Bhando bhamba bhakengime lityangilo lelalela lya Kaine. Nhwalo gwa mbijha, bhakijhingii lilemo lya Balaamo. Bhalekite kujhokanikiya ngita Kola chalekita na bhene ngabhakomalikilwe ngita Kola chakomalikilwe.
12 Bhando bhamba bhabhii na ingobhahe pibhahika kulye pamonga na mangota paminyagho hino imuibheka kwa upalo, na kujhukuta changahone. Bhabhii ngita mahunde ghighapogwa na upepo changaleta hula. Hele bheniya ngita mikongo jhangapambika uhohe, jhitupwilwe na kujhoma na kuwe njwe.
13 Bhando bhamba bhilandana ngita matuhe gha umbwane ghighapiha lihulohulo yenio itendwa yabhe ya hone imanyikana mbegha ngita lihulohulo lilipita. Bhando bheniya ngita ndondwa chiijhenda kongo na kongo, bhabhekwite mulubhendo tyoo machiko ghoha ghangapeta.
14 Na jwenio Henoke, jwakibha ndi kibheluko cha chaba kubhoke Adamo, ngalondwila nhwalo gwa bhando bheniya alongila, “Nnyokonikiye! Bhambo ahika pamonga na bhanyahinyahi bhake bhamahele bhangabhalangika kuhumii kunane kwa Chapanga,
15 kwahadabuu bhando bhoha, na kwatyala bhangannyinamila Chapanga nhwalo gwa itendwa yabhe yanganandela ibhateile changanyokanikiya Chapanga, na nhwalo gwa malobhe ghabhe ghoha ghanganandela gha kunnigha Chapanga.”
16 Bhando bhamba bhikokoleka na kung'ola machiko ghoha, bhikengama tama yabhe yanganandela, na kulonge na kukikweya kwa bhando kupala bhalumbalila hake bhando bhange kwa nhwalo gwa kupala kupata chela chakighana kuhumii kwabhe.
Malobhe gha kupwata na malaghilo
17 Nambo akakoche bhango bhinimpahile nkomboka ghagha ghighalongilwa makacho na akatenga bha Bhambo gwito Yecho Kilichitu.
18 Bhakalongile: “Machiko gha kujhomolela, nabhapitila bhando nabhantendela chanake, bhando bheniya ndi bhibhakengama tama yabhe ibhakomelekeya.”
19 Bhando bheniya ndi bhibhileta mpechangano, bhando bhibhiwachila gha pannema, bhangabhehe na Uhuke gwa Chapanga.
20 Nambo mangota akakoche bhango bhunimpahile, mukikangamaliche mabhene mu kihobholelo chino chanyahinyahi. Munyope Chapanga kwa makakala gha Uhuke gwa Chapanga gwake,
21 na nhighalike mabhene muupalo gwa Chapanga, na kongo mwiilendelela kiya jha Bhambo gwito Yecho Kilichitu, annete muughome gwa machiko ghoha ghangapeta.
22 Mma na kiya kwa bhando bhubhabhii na mbwelelo,
23 mwaghombole kwa kwajhokola kubhoka pa mwotu. Nambo kwa bhange nkola na kiya pamonga na kukilolekeya, ata ngobho yabhe hina mabaka gha tama yabhe yanganandela mu ichimwangane.
Kunnumbalii Chapanga
24 Kwa jwenio Chapanga jwahoto kunnonda nkoto kugwe na kunneta mangota changa malemo ade palonge ya ukolo gwake kwa luhangano hake,
25 kwa jwenio jwabhii kanjika Chapanga, jwabhii Nkomboche gwito, ubhaha ukolongwa na makakala na ukindendeke kwa ndela jha Yecho Kilichitu Bhambo gwito, kutumbulii makacho na ngoheno na machiko ghoha ghangapeta! Amina.