Uloto gwa
Yohane
Ulongolelo
Kitabo chenje cha Uloto kikajhandikwe na ntenga Yohane Uloto, mu chula jha 1:1. Ndi kitabo cha kujhomolela kujhandikwa mu Lilaghano Liyono, na kijhandikwe muchaka cha makome ticha na nhwano pabhelwika njwe Yecho Kilichitu. Ntenga Yohane ndi jwakajhandike Lilobhe lya Mbone ngita chilijhandikwe na Yohane na baluwa henge itato ya 1Yohane na 2 Yohane na 3 Yohane. Hele Yohane jhonjo ndi jwamanyikina “Yecho jwakampahi hake,” Yohane, Yohane mu chula jha 13:23. Yohane ajhandika kitabo chenje pakibha mu kilendela cha ku Patimo, pakibha apungwitwe nhwalo gwa kutangachila bhando Lilobhe lya Mbone lya Yecho Kilichitu, Uloto mu chula jha 1:9.
Chikinkangita Yohane kujhandika kitabo chenje cha Uloto apata kwaleke mwojho bhibhachoma kitabo chenje bhajhendelele kunhobholela Yecho Kilichitu na kwape lihobholelo nhwalo kipende cha kubhujha kwake Kilichitu kubhandikile, mu chula jha 1:3, 22:7. Abhajhandikila bhando bhoha bhibhannyeketii Kilichitu achwa kwa malongo chaba gha bhando ghighannyeketii Kilichitu ngita chibhii Uloto mu chula jha 2-3. Jwenie Yohane ilonge majhandiko ghanga ndi ulondole, Uloto mu chula jha 1:3. Kabhele atumiya mawacho gha picha yamahele mu kitabo choha kuchimulila ilebhe yaiwene. Kitabo chenje kibhii na chula ilandana na ibhii mu Lilaghano lya makacho achwa kitabo cha Zakaliya 6:1-8. Mapenenga chaba na mabakule chaba yenio ilandana na mabulo gha Chapanga ghibhabhulitwa Akamichile, Kubhoka mu chula jha 7-9. Uloto uchimulii kujhomolela kwa nnema kubhehe Yecho ndi jwauhotwii na bhoha bhibhanyeketii natama nako machiko ghoha ghangapeta. Kwa yenio kitabo chenje kipwatalile na kumpe lihobholelo kubhehe Yecho abhandikii kuhika.
Ghughabhii mu kitabo
Yohane atumbuu kukilonge jwenio ndi ghane na chapoki uloto gwenio gwa ulondole, mu chula jha 1:1-1:20.
Yohane apoke lilobhe kubhoka kwa Yecho na kughapeleke malongo chaba gha bhando ghighannyeketii Kilichitu, mu chula jha 1:1-3:22.
Kabhele ichimulila nhwalo gwa minepo chaba. Na mu chula jha 8:6-11:19, mapenenga chaba, mu chula jha 4: 1-8:5 na 8:6-11:19.
Yohane ichumulila ngondo pakate jha mwana munalome na lijhoka lina mitwe chaba, mu chula jha 12:1-14:20.
Kabhele ichumulila mabakule chaba gha lilaka lya Chapanga, mu chula jha 15:1-16:18.
Kubhoke peniya Yohane ichimulila Chapanga chapakwahotola akangondwa bhake kunane kwa Chapanga, mu chula jha 17:1-20:15.
Kujhomolela ichimulila nhwalo gwa nnema nhyono na kunane kuyono ijhapakuhika kipinde chakujhomolela, mu chula jha 21:1-22:21.
1
1 Ghongo ndi uloto gwa Yecho Kilichitu gwapilwa na Chapanga abhalangii akatumiche bhake ilebhe ipalakupitii machiko ghighabhandikile. Kilichitu ngantumita ntumiche gwake jwa kunane kwa Chapanga anobholele ntumiche gwake Yohane ilebhe yenio.
2 Yohane ngalongila ghoha ghaghawene, nhwalo gwa lilobhe lya Chapanga na ghoha ghatehila Yecho Kilichitu na kulonge ndi uchakaka.
3 Jhuna mota mundo jwachoma kitabo chenje chikibhii na malobhe gha ulondole gwa Chapanga na bhina mota bhando bhibhajhoha na kughakamuu ghighajhandikwe mu kitabo chenje, nhwalo machiko ghighapala kupitii ilebhe henge ghabhandikile.
Malongo chaba gha bhando bhibhannyeketii Kilichitu ghijhambuchwa
4 Ne ndi Yohane nighajhandikila malongo chaba gha bhando bhibhannyeketii Kilichitu ghighabhii ku kilambo cha ku Asiya.
Ninyope umbone na uteeke kubhoka kwa Chapanga. Jwenio ndi jwakibha na jwabhile na jwapakuhika na kubhoka kwa ihuke chaba ibhii nnonge jha kigoda chake cha unahota nkolongwa,
5 na kuhumii kwa Yecho Kilichitu, ndi jwahobholika, jwatumbwila kuyokechwa kubhoka kwa bhibhawile, jwenio ndi kilongoche jwa akanahota akakolongwa bha pannema.
Na kubhoke kwa jwenio atupahile na atujhogwile kubhoka mu kipungo cha muhakaho kwa ndela jha miyahe jhake,
6 ngatubhekita twenga, tubhii mu unahota nkolongwa gwa akapiya matambiko, tutumikii Chapanga, Tate gwake. Kwa jwenio Kilichitu kubhehe na ukolo na makakala, machiko ghoha ghangapeta! Amina.
7 Nnola! Atenda kuhika mu mahunde! Kila mundo nammona, ata bhala bhibhanhochita, na bhando bhoha bha pannema nabhakokoleka kwa nhwalo gwake, yenio ndi chiipala kubhehe! Amina.
8 Bhambo Chapanga jhuna Makakala, jwabhile na jwakibha na jwapakuhika ilonge, “Nenga ndi Alufa na Omega,” yane jwakutumbula na jwakujhomolela kwa ilebhe yoha.
Maloto gha Yohane
9 Ne ndi Yohane, nnongo gwino mu kulombona na Kilichitu, mmi pamonga na mangota mu kuhimbilila malagho ghighankolela bhoha bhibhabhii munahota gwake nkolongwa. Nenga punikibha namela kupelekwa mu kilendela chu ku Patimo ngita napungwa, nhwalo nikibha natangachila bhando lilobhe lya Chapanga na kwalobholela uchakaka gwa ilebhe ya Yecho Kilichitu.
10 Bhahe, lichiko limo lichiko lya kunnyinamii Chapanga, Uhuke gwa Chapanga ngahikita panane jha nenga, nganyohina lilobhe likolongwa kunyuma jhango, ngita lilobhe lya lipenenga,
11 lilobhe lyenio lilongila, “Jhandika mu kitabo ghimaghabhona na mighapeleka kwa malongo chaba gha bhando bhibhannyeketii Kilichitu, ghighabhii ku Epecho na ku Chimilina na ku Peligamo na ku Tiyatila na ku Chalide na ku Filadefiya na ku Laodikiya.”
12 Ngang'alambwika nimone jwalonge na nenga. Ping'alambwika nganiibhonita inala chaba itengenichwe kwa chaabo yakubheke mule,
13 panakate jha inala chaba ya chaabo yukubheke mule yela nganammona jhumo jwakibha ngita Mwana gwa Mundo, awalite likanjo litandamaho ade mu magholo ghake puka na luhunga lwa chaabo lulupengehine panganga.
14 Majhunjo gha umuto gwake ghakibha mahuu mbuu ngita litonje na ngita theluji, miho ghake ghalangila ngita lulime lwa mwotu,
15 magholo ghake ghang'anyima ngita chaba jhing'alita na kukewa hake pa litanule lya mwotu na lilobhe lyake likibha ngita lilobhe lya mache palipupuma.
16 Mulubhoko lwake lwalelo akibha na ndondwa chaba na mu nnomo gwake mupita upanga ghutema kone na kone. Kumiho kwake kung'ala ngita lyobha likale lya muhe.
17 Pinimonita, ngang'wila pamagholo ghake ngita ndehi kuwegha. Ngamekila lubhoko lwake lwalelo, ngalongila: “Nkoto kujhoghopa! Nenga ndi jwindumbwila na jwa kujhomolela.
18 Nenga ndi jwenio jwabhii ghome! Nikibha hwile, nambo ngohe ne mmii naghome machiko ghoha ghangapeta. Ngwete pungulo mu kuwe na ku kilambo chibhawile.
19 Ngohe jhandika ilebhe imiwene, ilebhe ihenga ngoheno na yela ipakuhika.
20 Chile jha ndondwa chaba imiwene mu lubhoko lwango lwalelo na chile jha inala itengenichwe kwa chaba ya chaabo, yukebheke mule, ndondwa yela chaba ndi akatumiche bhibhajhemelela malongo gha bhando bhibhannyeketii Kilichitu na inala itengenichwe chaba ya chaabo yukubheke mule ndi gheniya malongo chaba gha bhando bhibhannyeketii Kilichitu.”