10
Pɔɔlɩ tǝmlɛ tɑmpɑnɑ hʋlʋɣʋ
1 Pɔɔlɩ mɑ́, mɑ mɑɣɑmɑɣɑ tǝkpem mɑ wiikǝnnɑ-mɛ. Mɑ wei yǝlɑɑ yɔɣɔtǝɣɩ sɩ ye mɑ wɛ mǝ kiŋ ɩlɛ mɑ wɛ tǝhɛɛ. Amɑ ye mɑ fɛɩ mǝ kiŋ ɩlɛ mɑ ɑpɑlʋtʋ kpɑwɑɣɑlɛ. Mɑ tɛɛkǝɣɩ-mɛɣɛ Kilisiti kʋpɑntʋ nɑ ɩ leleŋ tɔɔ sɩ,
2 ɩ́ tɑɑ yele nɑ wɑɑtʋ wei mɑ kɔŋ mǝ tɛ tɔ mɑ́ hʋ́lɩ́ mɑ ɑpɑlʋtʋ. Pǝ tɑɣɑ pʋlʋ tɔɔ, mɑ hʋʋ teu sɩ mɑɑ hʋlɩ mɑ ɑpɑlʋtʋ kɛ mpɑ pɑ hʋʋ sɩ tǝ tǝŋǝɣɩ yʋlʋhʋwɛɛ kɛ yem tɔ.
3 Kʋpɑm tǝ wɛ tɑ́ yʋlʋtɔnʋɣʋ tɑɑ yɑɑ, ɩlɛ pǝ tɑɣɑ yʋlʋhʋwɛɛ kɛ yem kɛ́ tǝ tǝŋǝɣɩ nɑ tǝ́ yookinɑ.
4 Amɑ yoou wontu nti tɑ́ yoonɑ tɔ tǝ tɑ kɛ nti ɑntulinyɑ ɩnɛ ɩ yǝlɑɑ yoonɑ tɔ. Ɩsɔ yoou wontu nti tǝ pǝsǝɣɩ nɑ tǝ́ wɑkǝlɩ tǝcɔɔsǝlɛ toŋ nyǝntɛ tɔɣɔ tǝ yoonɑ. Tǝ wɑkǝlǝɣɩ pɔpɔtʋ lǝmɑɣɑsɛɛ.
5 Tǝ kpɛɛsǝɣǝnɑ pɑ tǝnɑ mpɑ pɑ lɑkɩ kɑlɑmpɑɑnɩ nɑ pɑ́ kɑɣɑtǝɣɩ sɩ pɑ́ tɑɑ nyɩ Ɩsɔ tɔ pɑ hʋwɛɛ. Tǝ kɛɛ yǝlɑɑ hʋwɛɛ tǝnɑ nɑ toŋ nɑ tǝ́ tʋɣɩ Kilisiti tɔɔ sɩ pɑ́ nɩɩnɑ-ɩ.
6 Ye mɩɩ kɔmɑ nɑ ɩ́ lɑ nɑ pǝ nɑ́ sɩ ɩ́ nɩɩnɑɑ tǝkpɑtɑɑ, ɩlɛ pǝ kɑɑsɑ mpɑ pɑ tǝnɑ nɑ pɑɑ cɑɑkɩ nɩɩnɑʋ tɔ tɑ́ sɔɔlʋ pɩɩwɑ sɩ tǝ́ hɔ pɑ ŋkpɑŋŋ.
7 Pɑɑ mpi, pǝ tɔnʋɣʋ tɔɔ kɛ́ mǝ nyǝnǝɣǝnɑ. Ye yʋlʋ nɔɣɔlʋ ɩ tɛŋ ɩ tɑɑ sɩ Kilisiti tǝnnɑ-ɩ, pʋntʋ ɩ́ mɑɣɑsɩ teu nɑ ɩ́ nɑ́ sɩ Kilisiti tɩ tɑ́ tɔtɔɣɔ, ɩsɩɩ ɩ tɩ ɩnɩ tɔ.
8 Pǝ tɑɣɑ pʋlʋ tɔɔ, pɑɑ mɑ sɑmɑ mɑ tɩ nɑ sɔsɔɔntʋ nti Tɑcɑɑ hɑ-tʋ tɔ, fɛɛlɛ ɩɩ kpɑɑ-m se. Pǝ hɑ-tʋɣʋ sɔsɔɔntʋ ntǝɣɩ sɩ pǝ́ lɑ nɑ ɩ́ tɛ mǝ tɑɑ nɑ Ɩsɔ kɛ́ sɔsɔm. Amɑ pǝ tɑɣɑ sɩ pǝ́ wɑkǝlɩ-mɛ.
9 Mɑ ŋmɑɑkʋɣʋ mɑ tɑkǝlɑsɩ tɔ, mɑɑ pɛɛkǝɣɩ sɩ mɑ́ kpɛɛtɩ mǝ pʋntʋ se.
10 Nti yǝlɑɑ yɔɣɔtǝɣɩ tɔɣɔlɛ sɩ: Pɔɔlɩ tɑkǝlɑsɩ tɑɑ tɔm wɛ toŋ nɑ ɑpɑlʋtʋ kɛ́. Amɑ wɑɑtʋ wei ɩ mɑɣɑmɑɣɑ ɩ wɛ tɑ́ hɛkʋ tɔ ɩ wɛɛ kɛ́ tǝhɛɛ nɑ ɩ yɔɣɔtɑɣɑ wɛ kʋnyɔŋ.
11 Ye wei ɩ yɔɣɔtǝɣɩ mpʋ pʋntʋ ɩ́ nyɩ teu sɩ nti tǝ ŋmɑɑ tɑ́ tɑkǝlɑsɩ tɑɑ kɛ́ wɑɑtʋ wei tǝ fɛɩ mǝ kiŋ nɑ nti tɩɩ lɑ wɑɑtʋ wei tɩɩ wɛɛ mǝ kiŋ tɔ, pǝ kɑɑ wɛɛ ŋkɑŋkɑ se.
12 Tǝ kɑɑ nɔkɩ nɑ tǝ́ kɛɛnɑ yɑɑ tǝ́ mɑɣɑsɩ tɑ́ tɩ nɑ lɛlɑɑ mpɑ pɑ mɑkɩ pɑ lɑŋɑ tɑɑ sɩ pɑ kɛ́ pʋlʋ tɔ. Pɑ kɛ́ ɩwɛɛŋ kɛ́, nɑ pɑ mɑɣɑmɑɣɑ pɑ cɑɑnɑ pɑ kʋmɑɣɑsʋɣʋ ŋku pɑɑ mɑɣɑsǝnɑ pɑ tɩ tɔ, nɑ pɑ tɑɑ pɑ tike kɛ pɑ kpɛɛsǝɣǝnɑ tǝmɑ.
13 Ye tɑ́, tɑ́ kɑɑ pǝsɩ nɑ tǝ́ sɑ tɑ́ tɩ nɑ pǝ́ tɛɛ cɑɑsɑ. Amɑ tǝ sɑŋ tɑ́ tɩ nɑ pǝ́ kɛɛsǝnɑ tǝmlɛ nte Ɩsɔ tʋ-tʋ tɔ tǝ tǝnɑɣɑ. Ɩsɔ hɑnɑ-tʋɣʋ mpɑɑʋ sɩ tǝ́ tɑlɑ mǝ tɛ.
14 Ɩsǝnɑ pɑ sɩɩnɑ-tʋ tɔ tɩɩ ŋmɑɑnɑ pǝ tɔɔ, ye tǝ tɑɑ kɔɔ mǝ tɛ ɩlɛ mpʋɣʋlɛ. Amɑ tǝ tɑlɑ mǝ tɛɣɛ teu nɑ tǝ́ heeli-mɛɣɛ Kilisiti tɔm Lɑɑpɑɑlɩ Kʋpɑŋ.
15 Pǝ tɔɔ kɛ́ tɩɩ ŋmɑɑnɑ ɩsǝnɑ pɑ sɩɩnɑ-tʋ tɔ pǝ tɔɔ. Tɩɩ sɑŋ tɑ́ tɩ nɑ lɛlɑɑ lɑpɑ tǝmɑ nnɑ tɔ. Amɑ tǝ cɑɑ kɛ́ sɩ mǝ tɑɑ tɛmnɑʋ kɛ Ɩsɔ ɩ́ sɔɔsɩ, ɩlɛnɑ tǝ́ pǝsɩ nɑ tǝ́ lɑ tǝmlɛ nte tǝ kǝlɑ lɔŋ nyǝntɛ tǝcɑɣɑcɑɣɑ tɔɣɔ mǝ hɛkʋ, nɑ tǝ tɑɑ ŋmɑɑnɑ ɩsǝnɑ Ɩsɔ sɩɩ-tʋ tɔ pǝ tɔɔ.
16 Pǝ wɑɑlɩ ɩlɛ tǝ pǝsǝɣɩ tǝ́ yɛlǝnɑ Lɑɑpɑɑlɩ Kʋpɑŋ kɛ tɛtʋnɑɑ mpɑ pɑ wɛ mǝ tɛ lɔlɔ tɔ pɑ tɑɑ, nɑ tǝ́ tɑɑ sɑ tɑ́ tɩ nɑ nti lɛlɑɑ tɛmɑ lɑpʋ kɛ pɑ tǝmɑ tɑɑ tɔ.
17 Pɑ ŋmɑɑ Ɩsɔ Tɔm tɑɑ sɩ: Ye wei ɩ́ cɑɑ ɩ sɑ ɩ tɩ, pʋntʋ ɩ́ sɑ ɩ tɩ nɑ nti Tɑcɑɑ lɑpɑ tɔ.
18 Kʋpɑm, pǝ tɑɣɑ yʋlʋ wei ɩ nyǝnǝɣɩ ɩ tɩ ɩsɩɩ ɩ kɛ́ pʋlʋ tɔ ɩnɩ ɩ sɑm yɑnɑ. Amɑ wei ɩ tɔɔ Tɑcɑɑ yɔɣɔtǝɣɩ kʋpɑntʋ tɔɣɔ.