9
Yutɑ ɩsɔ sɛɛlɑɑ tem
1 Pǝ tɑɣɑ ɩsɩɩ mɑɑ nɔkɩ nɑ mɑ ŋmɑɑ-mɛɣɛ tɑkǝlɑɣɑ nɑ mɑ́ heeli-mɛɣɛ Ɩsɔ yǝlɑɑ mpɑ pɑ wɛ Yutɑ tɔ pɑ sǝnɑʋ tɔm ntǝɣɩ kʋheelu.
2 Mɑ nyǝmɑ́ ɩsǝnɑ ɩ́ lɑkǝnɑ luɣu kʋlʋmʋɣʋ tɔ mɛɛ, hɑlǝnɑ mɑ sɑmɑ-mɛɣɛ Mɑsetoni nyǝ́mɑ kiŋ, sɩ tɑ́ tɑɑpɑlɑɑ kɛ Akɑyi tɛtʋ tɑɑ nyɔɔsɑ pɑ tǝɣɩ sǝnɑʋ tɔm tɑɑ kɛ́ tuu pǝnte. Ɩ́ sɛɛsʋɣʋ ḿpʋ́ɣʋ́ ɩsǝlɛ tɔ pǝ nyɔmtǝɣɩ pɑ tɑɑ pɑɣɑlɛ kɛ́.
3 Pɑɑ nɑ mpʋ mɑ tiliɣi tɑ́ tɑɑpɑlɑɑ pɑnɛɣɛ mǝ tɛ, pǝ́cɔ́ pʋɣʋlʋɣʋ mpi tǝ pʋɣʋlɑ-mɛɣɛ tɔm tǝnɛ tǝ tɑɑ tɔ, pɑ́ nɑnɑ pɑ ɩsɛ. Mɑ cɑɑ kɛ́ sɩ tɑmpɑnɑ pɑ́ mɑɣɑnɑ ɩ́ nyɔɔsɑ mǝ tǝɣɩ teu nɑ pǝ́ lɑ teitei nɑ nti mɑɑ heelɑɣɑ-wɛ tɔ.
4 Ye pǝ tɑɣɑ mpʋ, mɑ nɑ Mɑsetoni nyǝ́mɑ tǝ́ kɔmɑ nɑ tǝ́ mɑɣɑnɑ ɩ́ tɑ nyɔɔsɩ mǝ tɩ, tɑɣɑ pǝ tʋ fɛɛlɛ. Mpi tɔ ɩ́ yelɑɑ nɑ tǝ́ tɛ-mɛ nɑ tɑ́ tɑɑ kɛ́ teu. Nɑ ye mǝ nyǝntɛ tɔm ɩlɛ pɑɑ yɔɣɔtǝɣɩ tǝlɛ.
5 Mɑ mɑɣɑsɑɑ nɑ mɑ nɑ́ sɩ pǝ kǝlɑ teu sɩ mɑ́ wiinɑ tɑ́ tɑɑpɑlɑɑ pɑnɛ nɑ pɑ́ tɛɛ nɔɣɔ nɑ pɑ́ polo mǝ tɛ, nɑ pɑ́ tɑɣɑnǝɣɩ kʋcɔɔʋ kʋpɑŋkʋ ŋku ɩ́ tɔmɑ sɩ ɩ́ kɑ́ lɑ tɔ. Mɑɑ kɔɔ nɑ mɑ́ kɔŋ tɔ, pǝ tǝnɑ pǝ nyɔɔsɑɑ tǝkeŋkeŋ nɑ pǝ́ hʋ́lɩ́ sɩ luɣu kʋlʋmʋɣʋ kɛ ɩ́ lɑpǝnɑɑ, pǝ tɑɣɑ kʋcɑɑlʋɣʋ nɑkʋlɩ.
6 Ɩ́ tɔɔsɩ teu sɩ ye wei ɩ tuu pǝcɔ, pǝcɔɣɔ ɩ kɑ́ kʋ, nɑ wei ɩ́ tuu sɔsɔm, sɔsɔm kɛ ɩ kɔŋ kʋm.
7 Ye mpʋ pɑɑ wei ɩ́ hɑ ɩsǝnɑ pǝ hɑ-ɩ tɔ, ɩ́ tɑɑ hɑnɑ wulɑ yɑɑ kʋcɑɑlʋɣʋ. Pǝ tɑɣɑ pʋlʋ tɔɔ, wei ɩ hɑɑnɑ lɑŋhʋlʋmlɛ tɔɣɔ Ɩsɔ sɔɔlɑɑ.
8 Nɑ Ɩsɔ wɛnɑ pǝsʋɣʋ sɩ ɩ́ hɑ-mɛɣɛ kʋpɑntʋ kɛ sɔsɔm, pǝ́cɔ́ ɩ́ tɑɑ lɑŋ mpi mpi ɩ́ nyɩɩlǝɣɩ tɔ. Amɑ ɩ́ hiki, nɑ hɑlǝnɑ pǝ́ kɑɑsɩ nɑ ɩ́ lɑnɑ tǝmɑ kʋpɑnɑ.
9 Pɑ ŋmɑɑ Ɩsɔ Tɔm tɑɑ sɩ:
Ɩ hɑɑ kʋnyɔntʋnɑɑ nɑ luɣu kʋlʋmʋɣʋ.
Ɩ kʋpɑntʋ ɩɩ tɛŋ.
10 Ɩsɔ wei ɩ hɑɑ tuulu kɛ kʋtutuum nɑ ɩ́ hɑɑ-ɩ tɔɣɔnɑɣɑ sɩ ɩ́ tɔɔnɑ ɩ tɩ tɔ, Ɩsɔ ɩnɩ ɩ kɑ́ hɑ-mɛɣɛ kʋtutuum tǝnɑ mpi ɩ́ nyɩɩlǝɣɩ tɔ. Ɩsɔ ɩnɩ, ɩ kɑ́ lɑ nɑ pǝ pɩɩ, nɑ mǝ kʋpɑntʋ huki sɔsɔm.
11 Ɩsɔ kɑ́ tʋ mǝ niŋ tɑɑ kɛ́ ɩsǝnɑ mpi pǝ wɛɛ tɔɣɔ tɑm nɑ pǝ́cɔ́ mɩɩ pǝsɩ nɑ ɩ́ lɑkɩ kʋpɑntʋ kɛ tɑm. Ɩlɛ pɑɣɑlɛ kɑ́ sɛɛ Ɩsɔ kɛ́ ɩ́ nɑ tǝmlɛ kɛ kʋcɔɔŋ wei ɩ́ lɑkɩ nɑ tǝ́ pukinɑ tɔ ɩ tɔɔ.
12 Pǝ tɑɣɑ pʋlʋ tɔɔ, kookɑlɩ wei ɩ́ lɑkɩ ɩsǝntɔ tɔ pǝ tɑɣɑ Ɩsɔ yǝlɑɑ sǝnɑʋ tɔɔ tike. Amɑ pǝ yeki tɔtɔɣɔ nɑ yǝlɑɑ sɛɛ Ɩsɔ kɛ́ ɩ́ nɑ tǝmlɛ.
13 Kookɑlɩ ɩnɛ ɩ lɑpʋ tɑɑ kɛ́ pɩɩ hʋ́lɩ́ mpi ɩ́ kɛwɑ tɔ, nɑ yǝlɑɑ pɑɣɑlɛ kɑ́ sɑnɑ Ɩsɔ kɛ́ ɩsǝnɑ mpi ɩ́ nɩɩnɑɑ nɑ ɩ́ lɑkɩ sɩ pǝ́ hʋ́lɩ́ sɩ ɩ́ tɛmɑ mǝ tɑɑ nɑ Kilisiti Lɑɑpɑɑlɩ Kʋpɑŋ tɔ. Nɑ pɑɑ sɑ Ɩsɔ tɔtɔɣɔ ɩsǝnɑ mpi mǝ nɑ-wɛ nɑ lɛlɑɑ ɩ́ tɑlʋɣʋ mǝ kʋpɑm nɑ luɣu kʋlʋmʋɣʋ tɔ.
14 Nɑ pɑɑ sǝlǝmǝɣǝnɑ-mɛ nɑ Ɩsɔ, nɑ pɑɑ sɔɔlɩ-mɛɣɛ sɔsɔm kɛ pɛɛlɛɛ tɑɑ pɛɛlɛɛ nnɑ Ɩsɔ lɑpɑ-mɛ tɔ ɑ tɔɔ.
15 Ɩsɔ fɔɔ, nyɑ́ kʋcɔɔʋ fɛɩ kɛɛsʋɣʋ.