11
Wɑhɑlɑ kɑntǝkɑɣɑ nyǝŋ
Mpʋɣʋlɛ Tɑcɑɑ heelɑ Moisi sɩ: Pǝ kɑɑsɑ-m wɑhɑlɑ kɑntǝkɑɣɑ nyǝŋ. Pǝ wɑɑlɩ kɛ́ pɑɑ yele-mɛ nɑ ɩ́ tɛɛ. Hɑlɩ pɑɑ tɩɩ tɔɣɔnɩ-mɛɣɛ kʋtɔɣɔnʋ kɛ́ nɑ ɩ́ lɩɩ cǝnɛ. Mpʋ tɔ heeli Ɩsɛɣɛlɩ nyǝ́mɑ ɑpɑlɑɑ nɑ ɑlɑɑ sɩ pɑ́ sǝlǝmɩ pɑ ɑsǝmɑɑ Icipiti nyǝ́mɑ kɛ wʋlɑ nɑ liɣitee nyǝɣǝtʋ pǝ wontu.
Ḿpʋ́ɣʋ́ Tɑcɑɑ lɑpɑ nɑ Ɩsɛɣɛlɩ nyǝ́mɑ kpɑɣɑ Icipiti nyǝ́mɑ nɑ nyʋɣʋ. Pǝ́cɔ́ pǝlɛ pǝ pɑɑsi, Moisi mɑɣɑmɑɣɑ nyʋɣʋ kɑ kʋlɑɑ kɛ́, nɑ Icipiti wulɑʋ tǝmlɛ nyǝ́mɑ nɑ Icipiti yǝlɑɑ tǝnɑ tʋkɑɣɑnɑ-ɩ.
Moisi kɑ tɛmɑ Icipiti wulɑʋ kɛ heeluɣu sɩ Tɑcɑɑ tɔmɑ sɩ ɩ kɑ́ cɔɔ Icipiti tɛtʋ tɔɔ kɛ ɑhoo hɛkɑ nɑ tɛtʋ tɑɑ kɑncɑɑlɑɣɑ piyɑ tǝnɑ kɑ́ sɩ. Pǝ kpɑɣɑʋ wulɑʋ nyɑ́, nyɑ́ pǝyɑɣɑ kɑncɑɑlɑɣɑ nyǝŋkɑ nɑ pǝ́ polo yom ɑlʋ nyǝŋ wei ɩ nɑŋǝɣɩ tɔ ɩ kɑncɑɑlɑɣɑ pǝyɑɣɑ, nɑ pǝ́ kpɛŋnɑ tɔlɑ nyǝnsɩ. Nɑ yǝlɑɑ kɑ wii lǝyɑɣɑ wulɑ wenɑ too nɔɣɔlʋ tɑ wiitɑ tɔ. Pǝyele nɔɣɔlʋ kɑɑ tɩɩ wii ɑ tɑkɑ tɔtɔ. Amɑ pǝ kɑɑsʋɣʋ Ɩsɛɣɛlɩ nyǝ́mɑ hɔɣɔlʋɣʋ tɑɑ tɔ, hɑɣɑ mɑɣɑmɑɣɑ kɑɑ tɩɩ kpesi. Tǝnɑɣɑ ɩ́ kɑ́ nyǝnɑ sɩ Tɑcɑɑ mɑ́, mɑ fɑkɩ Icipiti nyǝ́mɑ nɑ Ɩsɛɣɛlɩ nyǝ́mɑ. Ɩlɛnɑ Moisi tɑsɑ sɩ: Wɑɑtʋ ɩnǝɣɩ Icipiti wulɑʋ tǝmlɛ nyǝ́mɑ pɑnɛ pɑ tǝnɑ pɑɑ kɔɔ nɑ pɑ́ luŋ mɑ tɛɛ kɛ́ ɑkulɑ sɩ mɑ́ nɑ mɑ yǝlɑɑ tǝ́ lɩɩ. Ɩlɛnɑ mɑ́ɑ́ lɩɩ kpɑkpɑɑ ɩnɩ.
Pǝ wɑɑlɩ kɛ́ Moisi lɩɩnɑ pɑ́ɑ́nɑ́ sɔsɔɔnɑ kɛ Icipiti wulɑʋ tɛ.
Mpʋɣʋlɛ Tɑcɑɑ tɑsɑ Moisi kɛ heeluɣu sɩ: Ye Icipiti wulɑʋ tɑ nɩɩnɑ-mɛ, ɩlɛ mɑɑ tɑsɑ kɔkɔlɔ nyǝm pɑɣɑlɛ lɑpʋ kɛ Icipiti tɛtʋ tɑɑ.
10 Pǝyele Moisi nɑ Alɔŋ pɑɑ tɛmɑ-wǝɣɩ lɑpʋ kɛ tɔm pɑɣɑlɛ nɑ Icipiti wulɑʋ nɑ́. Pɑɑ nɑ mpʋ Ɩsɔ kɑ́ tʋ-ɩ lɑŋkpɩɩsǝŋ kɛ́, nɑ ɩ́ kisi sɩ Ɩsɛɣɛlɩ nyǝ́mɑ ɩ́ tɑɑ lɩɩ.