13
Pɑpiloni tomle
1 Pɑpiloni tɔm nti Tɑcɑɑ hʋlɑ Amɔtɩ pǝyɑlʋ Ɩsɑyii kɛ toosee tɑkɑ tɑɑ tɔɣɔlɔ.
2 Ḿpʋ́ɣʋ́ Tɑcɑɑ yɔɣɔtɑɑ sɩ:
Ɩ́ kpɑɑsɩ tuutɑ kɛ pʋɣʋ ŋku
kʋ tɔɔ fɛɩ pʋlʋ tɔ kʋ tɔɔ.
Ɩ́ tɔ́ yoolɑɑ kɛ úúú.
Ɩ́ hɑtɩ-wɛɣɛ niŋ sɩ pɑ́ sʋʋnɑ ŋmɑkǝllɑɑ nɔnɔɣɔ.
3 Mɑ mɑɣɑmɑɣɑ mɑ kɔmtǝɣǝnɑ yǝlɑɑ mpɑ
pǝ tʋ mɑ niŋ tɑɑ tɔ.
Mɑ yɑɑwɑ mɑ yoolɑɑ tɑɑ yoolɑɑ mpɑ pɑ yɔɔlǝɣǝnɑ
mɑ sɔsɔɔntʋ nɑ pɑ́ hʋlǝɣɩ mɑ pɑ́ɑ́nɑ́ tɔ.
4 Yǝlɑɑ kɔkɔtɛ nɩɩkɩ pɔɔŋ tɑɑ,
ɩsɩɩ sɑmɑɑ tuutuumɑ.
Piitimnɑɑ kɑwulɑsɩ kotɑɑ nɑ pɑ kɔkɔtɛ nɩɩkɩ.
Pǝ tǝnɑ pǝ tʋ Tɑcɑɑ mɑ́ mɑ kɑlǝɣɩ
mɑ yoolɑɑ mpɑ mɑɑ yoonɑ tɔ.
5 Tɑcɑɑ nɑ mpɑ ɩ hʋlǝɣǝnɑ ɩ pɑ́ɑ́nɑ́ tɔ
ɑntulinyɑ tǝnɑsɩ kɛ pɑ lɩɩnɑ hɑtoo pooluŋ tɑɑ,
nɑ pɑ́ kɔɔ sɩ pɑ kpiisiɣi tɛtʋ tǝnɑ.
6 Mǝ lɑŋɑ ɩ́ wɑkǝlɩ nɑ ɩ́ wii.
Mpi tɔ, Tɑcɑɑ kʋyɑkʋ kpɛɣɛtɑɑ kɛ́.
Kʋ kɔŋ kɛ́ ɩsɩɩ Ɩsɔ Tomɑ tǝnɑ tʋ wɑkǝlʋɣʋ.
7 Pǝ tɔɔ kɛ́ yǝlɑɑ ɑpɑlʋtʋ
hoowɑ nɑ pɑ́ pǝsɩ ɑcɑmɑɑ.
8 Sɔɣɔntʋ sɔsɔɔntʋ pɩɩ-wɛ,
nɑ pɑ́ mǝlǝntǝɣɩ pɑ tɩ, ɩsɩɩ
lʋlʋɣʋ wʋsɑsɩ tɑkʋɣʋ ɑlʋ tɔ.
Nɑ pɑ́ nyǝnǝɣɩ tǝmɑ nɑ sɔɣɔntʋ.
9 Tɑcɑɑ hʋʋlɛ kʋyɑkʋ kɔŋnɑ ntɛ́.
Kʋ wule kɛ ɩ kɑ́ hʋlɩ ɩ pɑ́ɑ́nɑ́ sɔsɔɔnɑ,
ɩ kɑɑ wɛɛnɑ pǝtɔɔtǝlɛ.
Kʋyɑkʋ ŋkʋɣʋ ɩ kɑ kpiisi ɑsɑɣɑɑ,
nɑ ɩ́ pǝsɩ tɛtʋ kɛ wʋlɑɣɑ nyǝntʋ.
10 Ɩsɔtʋlʋŋɑsɩ nɑ sɩ loosi tǝnɑ kɑɑ tɑsɑ lɩɩʋ.
Ilim ɩ́ lɩɩ kpɑkpɑɑ pǝlɛ pǝ sɩ.
Pǝyele ɩsɔtʋ nɑ́ kɑɑ hʋlʋmɩ.
11 Mɑɑ hɔ ɑntulinyɑ ŋkpɑŋʋɣʋ kɛ ɩ kɑwɑlɑɣɑ tɔɔ,
nɑ mɑ́ hɔ ɑsɑɣɑɑ ŋkpɑŋŋ kɛ pɛlɛ pɑ kʋpǝntǝŋ tɔɔ.
Mɑɑ tisi mpɑ pɑ hɔŋ pɑ tɩ tɔ,
nɑ mɑ́ yɔkɩ ŋmɑkǝllɑɑ kɑlɑmpɑɑnɩ.
12 Mɑɑ yele nɑ yǝlɑɑ lɑŋ tɛtʋ tɑɑ
nɑ pǝ́ kǝlɩ ɩsɩɩ wʋlɑ kʋpɑŋ.
Pɑɑ lɑŋ tɛtʋ tɑɑ nɑ pǝ́ kǝlɩ ɩsɩɩ Ofii tɛtʋ wʋlɑ.
13 Pǝ tɔɔ kɛ́ Pǝ tǝnɑ pǝ tʋ
Tɑcɑɑ pɑ́ɑ́nɑ́ sɔsɔɔnɑ kʋyɑkʋ
wule ɩ kɑ ciɣiti ɩsɔtɔnʋɣʋ,
nɑ tɛtʋ nɑ́ɑ́ sele tǝ kite tɔɔ.
14 Ɩsɩɩ sɔɣɔntʋ kpɑɑkʋɣʋ nɑm
nɑ ɩ́ seeki tɔ,
ḿpʋ́ɣʋ́ pɑɑ wei ɩ kɑ́ se nɑ ɩ́ mǝlǝɣǝnɑ
ɩ tɛtʋ tɑɑ.
Ɩsɩɩ heeŋ lɑŋʋɣʋ tiikilu nɑ ɩ yɑ tɔ,
ḿpʋ́ɣʋ́ Pɑpiloni nyǝ́mɑ ɩ́ kɑ́ yɑ yem yem
nɑ ɩ́ mǝlǝɣǝnɑ mǝ yǝlɑɑ kiŋ.
15 Ye pɑ hikɑ mǝ tɑɑ wei pɑ cʋtǝtɩ-ɩ nyǝmɑ́,
nɑ pɑ́ kpɑ mǝ tɑɑ wei pɑ kʋ ɩ́lɛ́ nɑ lɑɣɑtɛ.
16 Pɑɑ tɔtǝlɩ mǝ piyɑ nɑ pɑ́ kuu mǝ tɛɛsɩ tɑɑ wontu
nɑ pɑ́ kpi mǝ ɑlɑɑ nɑ ɩ́ nyǝnǝɣɩ.
17 Ḿpʋ́ɣʋ́ Tɑcɑɑ yɔɣɔtɑɑ sɩ:
Mɑɑ yele nɑ Mɛtɩ nyǝmɑ mʋ-mɛ nɑ pɑ́ɑ́nɑ́.
Pɑɑ ɩ́ hɑ-wɛɣɛ liɣitee, yɑɑ wʋlɑ, pɛlɛ pɑ kɑɑ nyǝnnɑ tǝnɑ.
18 Pɑɑ yɑɣɑ mǝ ɩfepiyɑ kɛ nyǝmɑ́, pɑ kɑɑ cɔlɔ ɑhʋlʋmnɑɑ.
Pǝyele pɑ kɑɑ wɛɛnɑ piyɑ pǝtɔɔtǝlɛ.
19 Pɑpiloni kɑ wɛ kɛ́ ɩsɩɩ Kɑlǝtee
nyǝ́mɑ kɑwulɑsɩ kɑcɔkɑ pʋlʋpʋ.
Ɩsɔ kɑ́ wɑkǝlɩ-mɛ, ɩsɩɩ ɩ kɑ lɑpʋ Sɔtɔm
nɑ Kɔmɔɔ pǝ nyǝmɑ tɔ.
20 Pɩɩ kpiisi Pɑpiloni tɛtʋ kɛ tɑm tɔɔ kɛ́,
nɔɣɔlʋ kɑɑ wɛɛ tǝ tɑɑ.
Pɑɑ mpɑtɔntɑɑ mɑɣɑmɑɣɑ, pɛlɛ pɑ kɑɑ hɛlɩ,
pǝyele tiikilɑɑ nɑ pɑ kɑlǝkǝŋ pɑ kɑɑ sǝŋ tǝnɑ.
21 Amɑ tɑɑlɛ wontu kɑ́ lɛɛtǝnɑ,
nɑ kpiisiŋ nɑɑ sʋʋkɩ mǝ tɛɛsɩ tɑɑ,
nɑ tɑɑtɑɑnɑɑ nɑ́ɑ́ pǝsɩ tǝnɑɣɑ pɑ tɛ.
Ɩlɛnɑ pǝŋtʋlʋŋ nɑ́ɑ́ ŋmɑɑlǝɣɩ ncɑɑ tɑɑ.
22 Sʋnsʋmǝŋ kɑ́ sʋʋnɑ mǝ ɩcɑtɛ kutuluŋ kʋpɑŋ tɑɑ,
nɑ tɑɑlɛ hɑsɩ kɛ mǝ kutuluŋ wei ɩ tɑɑ
ɩ́ tɔkɑɣɑ nɑ ɩ́ nyɔɔkɩ tɔ.
Pǝ tɛmɑ Pɑpiloni ɩcɑtɛ kʋyɑkʋ sɩɩʋ kɛ́ nɑ kʋ kpɛɣɛtɑɑ.