6
Tɑcɑɑ ɑtɑkɑɑ ponɑʋ kɛ Yosɑlɛm
(Kʋtɔɔsʋtʋ I 13:4-14)
1 Ḿpʋ́ɣʋ́ Tɑfiiti tɑsɑ Ɩsɛɣɛlɩ yoolɑɑ tɑɑ yoolɑɑ kɛ kpeɣeluɣu kɛ yǝlɑɑ ɩsɩɩ iyisi hiu nɑ nɑɑnʋwɑ (30000).
2 Ɩlɛnɑ pɑ́ tɛɛ timpi pɑ yɑɑ sɩ Pɑɑlɑ tɔɣɔ Yutɑ sɩ pɑ kpɑkǝɣɩ Ɩsɔ ɑtɑkɑɑ. Tɑcɑɑ Tomɑ tǝnɑ tʋ tǝnnɑ ɑtɑkɑɑ ɩnɩ nɑ ɩ tɔkɩ kɑwulɑɣɑ kɛ ɩsɔtɑɑ tɑŋlɑɑ tɔɔ.
3-4 Ḿpʋ́ɣʋ́ pɑ kpɑɣɑ Ɩsɔ ɑtɑkɑɑ kɛ́ Apinɑtɑpɩ tɛɣɛ pulɑɣɑ tɔɔ nɑ pɑ́ tʋ-ɩ kɛɛkɛ kʋfɑlʋ tɑɑ, nɑ Apinɑtɑpɩ pǝyɑlɑɑ Ahiyo kɛ lɔlɔ nɑ Yusɑ kɛ kɔŋkɔŋ tɔɔ nɑ pɑ́ pɑɑsǝɣǝnɑ-ɩ.
5 Nɑ pɑ́ mɑkɩ wontu nɑ hǝsɩ nɑ Tɑfiiti nɑ ɩ nyǝ́mɑ pɑ́ pɑɑkɩ.
6 Pɑ tɑlɑ tǝfɑllɛ nte tǝ wɛ timpi pɑ yɑɑ sɩ Nɑkɔŋ tɔ, ɩlɛnɑ nɑɑŋ kpilisi kɛɛkɛ nɑ Ɩsɔ ɑtɑkɑɑ tɑŋ hotuɣu nɑ Yusɑ temi-ɩ.
7 Tǝnɑɣɑlɛ Tɑcɑɑ mʋ-ɩ nɑ pɑ́ɑ́nɑ́ nɑ ɩ́ kʋ-ɩ tǝnɑɣɑ ɑtɑkɑɑ kite kɛ mpi pǝ tɔɔ ɩ tɑ nyɑnɑ Ɩsɔ ɑtɑkɑɑ tokinɑʋ tɔ.
8 Amɑ Tɑfiiti lɑŋlɛ tɑ hɛɛnɑ Yusɑ kʋɣʋ mpɩ, nɑ pɑ́ hɑ lonte ntɛɣɛ hǝtɛ sɩ Yusɑ tǝkʋlɛ. Nɑ pɑ́ yɑɑkɩ-tɛɣɛ ḿpʋ́ɣʋ́ hɑlǝnɑ sɑŋɑ.
9 Ḿpʋ́ɣʋ́ sɔɣɔntʋ kpɑ wulɑʋ nɑ ɩ́ tɔ sɩ: Ye mpʋ mɑɑ pǝsɩ mɑ ponɑ Ɩsɔ ɑtɑkɑɑ kɛ mɑ tɛɣɛlɛ?
10 Ɩlɛnɑ Tɑfiiti kisi Ɩsɔ ɑtɑkɑɑ ponɑʋ kɛ ɩ tɛ nɑ ɩ́ ponɑ-ɩ Kɑtɩ tʋ wei pɑ yɑɑ sɩ Opɛtɩ-Ɩtɔm tɔ ɩ tɛ.
11 Nɑ ɑtɑkɑɑ cɑɣɑ ɑpɑlʋ ɩnɩ ɩ tɛɣɛ ɩsɔtʋnɑɑ tooso. Ɩlɛnɑ Tɑcɑɑ nɑ́ɑ́ kooli ɩ́lɛ́ nɑ ɩ tǝyɑɣɑ nyǝ́mɑ tǝnɑɣɑ kʋpɑntʋ.
Ɩsɔ ɑtɑkɑɑ ponɑʋ kɛ Yosɑlɛm
(Kʋtɔɔsʋtʋ I 15:25–16:3)
12 Ɩlɛnɑ pɑ́ tɑɣɑsɩ Tɑfiiti sɩ Tɑcɑɑ koolɑ Opɛtɩ-Ɩtɔm nɑ ɩ nyǝ́mɑ tǝnɑɣɑ kʋpɑntʋ kɛ Ɩsɔ ɑtɑkɑɑ tɔɔ. Ntɛnɑ wulɑʋ polo Opɛtɩ-Ɩtɔm tɛ nɑ ɩ kpɑɣɑ Ɩsɔ ɑtɑkɑɑ nɑ pɑ́ ponɑ ɩ tɛ nɑ ɑŋmɑɑlɑ.
13 Atɑkɑɑ sǝɣǝllɑɑ ɩ́ kpɛsɑ nɔɔhɛɛ nɑɑtoso nɑ ɑlɑɑfǝyɑ, ɩlɛ kɔtǝlɑɑ lɑ nɑʋ nɑ nɑʋle nim nyǝntɛ kɛ kɔtɑɣɑ.
14 Ɩlɛnɑ Tɑfiiti fɛlɩ pɑɑlɛ kɛ teu kɛ ɑtɑkɑɑ ɩsɛntɑɑ nɑ ɩ́ suuwɑ kɔtǝlɑɑ toko tike.
15 Ḿpʋ́ɣʋ́ ɩ nɑ Ɩsɛɣɛlɩ nyǝ́mɑ tǝnɑ pɑ ponɑ Tɑcɑɑ ɑtɑkɑɑ kɛ Yosɑlɛm nɑ ɑkɑntɛɛ nɑ lɑŋhʋlʋmlɛ kɑkiisɑsɩ.
16 Pɑ tɔŋnɑ Ɩsɔ ɑtɑkɑɑ sʋʋnɑʋ kɛ wulɑʋ ɩcɑtɛ tɑɑ, ɩlɛ Tɑfiiti ɑlʋ Mikɑɑlɩ Sɑyuli pɛɛlɔ sǝŋnɑ pǝtote ntɛ́ nɑ ɩ́ nɑ́ ɩ pɑɑkɩ nɑ ɩ́ ŋmɑɑkɩ ɑtɑkɑɑ ɩsɛntɑɑ. Ḿpʋ́ɣʋ́ Mikɑɑlɩ tʋʋ Tɑfiiti kɛ ɩ tɑɑ.
17 Pɑ tɑnɑ Ɩsɔ ɑtɑkɑɑ ɩlɛnɑ pɑ́ sɩɩ-ɩ ɩ lonte tɑɑ kɛ́ cokǝle nte Tɑfiiti kɑ lɑpɑ tɔ tǝ tɑɑ, nɑ pɑ́ lɑ́ kɔtɑsɩ nsi kɔkɔ lusɑ sɩ tǝnɑ tɔ nɑ ciikuɣu nyǝnsɩ.
18 Pɑ tɛmɑ kɔtɑsɩ nsǝɣɩ lɑpʋ ɩlɛnɑ Tɑfiiti kooli yǝlɑɑ tǝnɑɣɑ kʋpɑntʋ kɛ Tomɑ tǝnɑ tʋ Tɑcɑɑ hǝtɛ tɑɑ.
19 Ɩlɛnɑ Tɑfiiti tɑlɑ ɑpɑlɑɑ nɑ ɑlɑɑ mpɑ pɑɑ kotɑ tǝnɑ tɔɣɔ tɔɣɔnɑɣɑ. Pɑɑ wei kɛ potopoto, nɑ nɑntʋɣʋ, nɑ sʋlʋm, nɑ pɑ́ kpe.
20 Tɑfiiti mǝlɑ tǝyɑɣɑ sɩ ɩ kooliɣi ɩ nyǝ́mɑ kɛ kʋpɑntʋ, ɩlɛnɑ Mikɑɑlɩ lɩɩ nɑ ɩ́ sǝŋɩ-ɩ nɑ ɩ́ tɔmɩ-ɩ sɩ: Amɑ Ɩsɛɣɛlɩ wulɑʋ teeli ɩnɛɣɛ sɑŋɑ pɔpɔtʋ kɛ́. N wɔɣɔsɑ nyɑ́ kɑwulɑɣɑ wontu nɑ ń pɑɑkɩ nyɑ́ wɑɑlɩ nyǝ́mɑ yomɑɑ ɑlʋ nyǝ́mɑ ɩsɛntɑɑ ɩsɩɩ yʋlʋ kɛ yem.
21 Ntɛnɑ Tɑfiiti cɔ-ɩ sɩ: Tɑcɑɑ wei ɩ kisɑ nyɑ́ cɑɑ nɑ ɩ́ lǝsɩ-m sɩ mɑ́ lɑ Ɩsɛɣɛlɩ nyǝ́mɑ wulɑʋ tɔ ɩ ɩsɛntɑɑ kɛ́ mɑ pɑɑwɑ.
22 Mɑ cɑɑ mɑ pɑsɑ mɑ tɩ nɑ mɑ́ pǝsɩ kpɛtɛ nɑ pǝ́ kǝlɩ mpʋ. Pɑɑ nɑ mpʋ tɔ, mɑ nyʋɣʋ kɑ́ kʋlɩ yomɑɑ ɑlʋ nyǝ́mɑ mpɑ n yɔɣɔtǝɣɩ tɔ pɑ ɩsɛntɑɑ kɛ́.
23 Sɑyuli pɛɛlɔ Mikɑɑlɩ nɑ ɩ sǝm tɔ ɩ tɑ lʋlɩ pǝyɑɣɑ.