7
Ɩsɔ sɩɩwɑ nɔɣɔ kɛ Tɑfiiti nɑ ɩ tǝyɑɣɑ nyǝ́mɑ
(Kʋtɔɔsʋtʋ I 17:1-15)
1 Tɑcɑɑ yɑpɑ wulɑʋ kɛ ɩ kolontunɑɑ niŋ tɑɑ, ɩlɛnɑ ɩ́ mǝlɩ ɩ kɑwulɑɣɑ tǝyɑɣɑ kʋfɑlɑɣɑ tɑɑ nɑ hɛɛsʋɣʋ.
2 Ḿpʋ́ɣʋ́ kʋyɑkʋ nɑkʋlɩ ɩ tɔmɑ Ɩsɔ kʋyɔɣɔtʋtʋ tɛlǝsʋlʋ Nɑtɑŋ sɩ: Pǝ tɑ mʋnɑ sɩ mɑ́ɑ́ wɛɛ kutuluɣu kʋpɑŋkʋ tɑɑ nɑ Ɩsɔ ɑtɑkɑɑ nɑ́ɑ́ wɛ cokǝle tɑɑ.
3 Ntɛnɑ Nɑtɑŋ cɔ wulɑʋ sɩ: Polo nɑ ń lɑ pǝ tǝnɑ mpi n mɑɣɑsǝɣɩ nyɑ́ tɑɑ tɔ. Mpi tɔ, Tɑcɑɑ wɛ nyɑ́ wɑɑlɩ kɛ́.
4 Ahoo yuwɑ ɩlɛnɑ Tɑcɑɑ tɔ Nɑtɑŋ sɩ:
5 Polo nɑ ń heeli mɑ pǝyɑlʋ Tɑfiiti sɩ pǝ tɑɣɑ ɩnɩ ɩ kɑ ŋmɑnɑ-m tǝyɑɣɑ ŋkɑ kɑ tɑɑ mɑɑ cɑɣɑ tɔ.
6 Hɑtoo mɑ lǝsʋɣʋ Ɩsɛɣɛlɩ nyǝ́mɑ kɛ Icipiti tɑɑ nɑ pǝ́ sɩɩnɑ sɑŋɑ tɔ mɑ tɑ sʋʋtɑ kutuluɣu tɑɑ. Cokǝle tɑɑ kɛ́ mɑ wɛ mpʋ.
7 Too mɑ nɑ Ɩsɛɣɛlɩ nyǝ́mɑ tǝ lɩɩʋ tɔ, mɑ tɑ pɔɔsǝtɑ pɑ nyʋɣʋ nyǝ́mɑ mpɑ mɑ lǝsɑɑ tɔ pɑ tɑɑ nɔɣɔlʋ sɩ pepe tɔɔ kɛ́ pɑ tɑ ŋmɑ-m kutuluɣu kʋpɑŋkʋ.
8 Mpʋ tɔ, heeli mɑ pǝyɑlʋ Tɑfiiti sɩ Tomɑ tǝnɑ tʋ Tɑcɑɑ mɑ́, mɑ yɔɣɔtɑɑ sɩ ntiɣile tɑɑ kɛ́ mɑ kpɑɣɑ-ɩ heeŋ wɑɑlɩ sɩ ɩ́ lɑ mɑ Ɩsɛɣɛlɩ nyǝ́mɑ wulɑʋ
9 nɑ mɑ́ɑ́ wɛ ɩ wɑɑlɩ kɛ́ ɩ tɔntɛ tǝnɑ tɑɑ. Ɩlɛnɑ mɑ́ kpiisi ɩ kolontunɑɑ tǝnɑ nɑ mɑ́ kʋsɩ ɩ nyʋɣʋ ɩsɩɩ ɑtɛ sɔsɑɑ lɛlɑɑ.
10 Ɩlɛnɑ mɑ́ hɑ mɑ Ɩsɛɣɛlɩ nyǝ́mɑ kɛ tǝcɑɣɑlɛ sɩ pɑ́ cɑɣɑ teu nɑ pʋlʋ ɩ́ tɑɑ peɣeli-wɛ. Yǝlɑɑ ɑsɑɣɑɑ ɩ́ tɑɑ tɔɣɔ pɑ ɩsɛ,
11 ɩsɩɩ sɑɑ wei mɑɑ kpɑ pɑɑsǝnlɑɑ kɛ mɑ yǝlɑɑ Ɩsɛɣɛlɩ nyǝ́mɑ tɔɔ tɔ. Pǝyele mɑ yɑpɑ-ɩ ɩ kolontunɑɑ tǝnɑ niŋ tɑɑ sɩ ɩ́ hɛɛsɩ. Tɑcɑɑ sɩ: Pʋntʋ ɩnɩ ɩ kɑ sɩɩnɑ-m tǝyɑɣɑ, pǝ tɑɣɑ Tɑfiiti kɑ́ ŋmɑnɑ-kɛ.
12 Ye pǝ tɑlɑ nyɑ́ kʋyɑkʋ nɑ n sǝpɑ ɩlɛ mɑɑ lǝsɩ nyɑ́ piyɑ mpɑ n lʋlǝnɑ nyɑ́ tɑpʋɣʋ tɔ pɑ tɑɑ nɔɣɔlʋ nɑ mɑ́ kpɑ-ɩ wulɑʋ.
13 Ɩnɩ ɩ kɑ́ ŋmɑnɑ-m tǝyɑɣɑ nɑ mɑɑ yele nɑ ɩ kɑwulɑɣɑ kumte wɛɛ tɑm tɔɔ.
14 Ɩ kɑ́ nyǝnǝɣɩ-m ɩ cɑɑ nɑ mɑɑ nyǝnǝɣɩ-ɩ mɑ pǝyɑɣɑ. Ye ɩ pǝntǝnɑ-m mɑɑ hɔ ɩ kpɑŋʋɣʋ ɩsɩɩ pɑ lɑkʋɣʋ pǝyɑɣɑ tɔ.
15 Amɑ mɑ kɑɑ yele-ɩ pɛɛlɛɛ hʋlʋɣʋ ɩsɩɩ mɑ lɑpʋ Sɑyuli nɑ mɑ́ lɔ-ɩ nɑ mɑ́ lɛɛtɩ-ŋ ɩ lonte tɔ.
16 Nyɑ́ kɑwulɑɣɑ nɑ nyɑ́ kumte nɑ nyɑ́ piitim pɩɩ wɛɛ tɑm tɔɔ kɛ́.
17 Nti nti Ɩsɔ heelɑ Tɑfiiti nɑ Ɩsɔ kʋyɔɣɔtʋtʋ tɛlǝsʋlʋ Nɑtɑŋ nɔɣɔ tɔɣɔlɛ.
Tɑfiiti sɛɛʋ kɛ Ɩsɔ
(Kʋtɔɔsʋtʋ I 17:16-27)
18 Mpʋɣʋlɛ Tɑfiiti polɑ Ɩsɔ cokǝle tɑɑ nɑ ɩ́ yɔɣɔtǝnɑ Ɩsɔ sɩ: Hɑɩ, Tɑcɑɑ tɑ Ɩsɔ, mɑ́ nɑ mɑ tǝyɑɣɑ tǝ kɛ́ we nɑ ń kɔŋnɑ-m timpi tɑɑ mɑ wɛ ɩsǝntɔ tɔ?
19 Pǝlɛ pǝ pɑɑsi nɑ ń tɑsǝɣɩ mɑ tǝyɑɣɑ sɩɩʋ tɔm nɑ? Ye pǝ tɑɣɑ Ɩsɔ, yʋlʋ kɑɑ pǝsɩ nɑ ɩ́ yɔɣɔtɩ mpʋ pǝ tɑkɑ.
20 Wentiɣi mɑ tɑkɑ mɑ wɛnɑ sɩ mɑ heeliɣi-ŋ? N nyǝmɑ-m kɛ́.
21 Nyɑ́ mɑɣɑmɑɣɑ n sɔɔlǝnɑ nɑ ń lɑ tǝmɑ sɔsɔɔnɑ ɑnɛ, nɑ ń kuli-m tɔm tǝnɛ tǝ tɔɔ ɩsɩɩ n kɑ yɔɣɔtʋɣʋ tɔ.
22 Tɑcɑɑ Ɩsɔ n kɛ́ Sɔsɔ kɛ́. Mpi tɔ, nɔɣɔlʋ tɑ nǝɣǝsǝnɑ-ŋ. Ye tǝ kɛɛsǝnɑ nti ɩnɩ tǝ nɩɩnɑ tɑ ŋkpɑŋŋ tɔ nɔɣɔlʋ ɩ fɛɩ ɩsɩɩ nyɑ́.
23 Piitim nɑpǝlɩ pǝ fɛɩ nɑ pǝ́ nǝɣǝsǝnɑ nyɑ́ yǝlɑɑ Ɩsɛɣɛlɩ nyǝ́mɑ mpɑ n kɔmɑ nɑ ń yɑ sɩ tǝ pǝsɩ nyɑ́ nyǝ́mɑ nɑ nyɑ́ hǝtɛ yɑɑ nɑ ń lɑ-tʋɣʋ piti tǝmɑ nɑ kɔkɔlɔ nyǝm nɑ ń yɑ-tʋɣʋ Icipiti tɑɑ nɑ ń tɔɣɔnɩ piitimnɑɑ lɛlɑɑ nɑ pɑ tɩɩŋ.
24 Nɑ tǝ pǝsɩ nyɑ́ nyǝ́mɑ kɛ tɑm tɔɔ, nɑ nyɑɑ pǝsɩ tɑ Ɩsɔ.
25 Mpʋ tɔ, Tɑcɑɑ Ɩsɔ yele nɑ tɔm nti n yɔɣɔtɑ mɑ nɑ mɑ tǝyɑɣɑ tɑ́ tɔɔ tɔ tǝ́ lɑ nɑ tǝ́ wɛɛ ḿpʋ́ɣʋ́ tɑm tɔɔ.
26 Nyɑ́ hǝtɛ ɩ́ wɛɛ sɔsɔɔlɛ nɑ yǝlɑɑ pʋɣʋlǝɣɩ tɑm sɩ: Ɩsɛɣɛlɩ nyǝ́mɑ Ɩsɔ kɛlɛ Tomɑ tǝnɑ tʋ Tɑcɑɑ nɑ ń pɑɑsǝɣǝnɑ mɑ tǝyɑɣɑ.
27 Mpi tɔ, Tɑcɑɑ Ɩsɛɣɛlɩ nyǝ́mɑ Ɩsɔ, nyɑ́ tʋnɑ nyɑ́ tɔm kɛ mɑ ŋkpɑŋŋ tɑɑ sɩ n kɑ́ sɩɩ mɑ tǝyɑɣɑ. Pǝ tɔɔ kɛ́ mɑ kɑɑsɑ mɑ tɩ nɑ mɑ́ sǝlǝmɩ-ŋ sǝlǝmʋɣʋ kʋnɛ.
28 Tɑcɑɑ Ɩsɔ, n kɛ́ Ɩsɔ kɛ́. Nɑ ń yɔɣɔtɑ nti n lɑkɩ-tǝɣɩ. Nyɑ́ kɛɛsǝnɑ-m nyɑ́ kʋpɑntʋ tǝnɛ tǝ tɔm.
29 Kooli mɑ tǝyɑɣɑ kɛ kʋpɑntʋ nɑ kɑ́ wɛɛ tɑm tɔɔ ɩsɩɩ n yɔɣɔtʋɣʋ tɔ, nɑ kʋpɑntʋ ntɩ tǝ́ wɛɛ kɑ tɔɔ kɛ́ tɑm.