4
1 Mɑ heeliɣi-ŋ nɑ ɩsǝlɛ kʋsɛɛmlɛ kɛ Ɩsɔ nɑ Yesu Kilisiti wei ɩ kɑ́ hʋʋnɑ weesuɣu nyǝ́mɑ nɑ sǝtɑɑ kɛ tɔm tɔ pɑ ɩsɛntɑɑ, nɑ Yesu Kilisiti ɩnɩ ɩ kɔntɛ nɑ ɩ kɑwulɑɣɑ pǝ tɔɔ sɩ,
2 ń lɑkɩ Ɩsɔ wɑɑsʋ, nyɑɑ sɛɛsɩ ɩsǝlɛ te, pɑɑ pǝ mɑɣɑ-ŋ pɑɑ pǝ tɑ mɑɣɑ-ŋ. Kɑɑnɑ-wɛ nɑ ń lɑ nɑ pɑ́ mʋ-tɩ. Kɑlǝɣǝnɑ-wɛɣɛ timpi timpi pɑ pǝntǝɣɩ tɔ. Sɛɣɛsǝɣɩ-wɛ nɑ suulu sɔsɔ nɑ pǝ́ sɔɔsɩ-wɛɣɛ ɑpɑlʋtʋ.
3 Pǝ tɑɣɑ pʋlʋ tɔɔ, pɩɩ kɔɔ nɑ pǝ́ kɛɛsɩ wɑɑtʋ nɔɣɔlʋ tɔ, yǝlɑɑ kɑɑ cɑɑ sɩ pɑ́ tɑsɑ sɛɣɛsǝŋ kʋpɑŋ wei ɩ wɑɑsǝɣɩ yǝlɑɑ tɔɣɔ mʋɣʋ tɔtɔ. Amɑ pɑ mɑɣɑmɑɣɑ pɑ kʋnyɩɩlǝŋ kɛ pɑɑ tǝŋǝɣɩ, nɑ pɑ́ koti sɛɣɛsǝlɑɑ pɑɣɑlɛ nɑ pɛlɛ pɑ́ sɛɣɛsɩ-wɛɣɛ ntiwɛ ntiwɛ pɑ cɑɑ pɑ́ nɩɩkɩ tɔ.
4 Pɑɑ kisi tɔm tɑmpɑnɑ nyǝntʋ, nɑ pɑ́ pɑɑsǝnɑ sɔsɑɑ tɑɑ kpɑɩ tɔmnɑɑ.
5 Amɑ nyɑ́ ɩlɛ, kpɑ nyɑ́ tǝɣɩ pǝ tǝnɑ pǝ tɑɑ. Kɑntǝlǝɣɩ kʋnyɔntɔɣɔlɛnɑɑ tɑɑ. Lɑ Lɑɑpɑɑlɩ Kʋpɑŋ kpɑɑllʋ tǝmlɛ. Pɑɑsǝnɑ nyɑ́ tǝmlɛ tǝnɑɣɑ teu tǝtetete ɩsɩɩ Ɩsɔ tǝmlɛ tʋ lɑkɩ tɔ.
6 Tɔʋ, ye mɑ ɩlɛ wule nte pɑɑ lɑnɑ-m kɔtɑɣɑ tɔ tǝ tɑlɑɑ kɛ́, mɑ kʋyɑkʋ kʋkpemuɣu tɑlɑɑ.
7 Mɑ yoowɑ tǝcɑm. Mɑ sewɑ nɑ mɑ́ tɑlɑ mɑ tǝnɑɣɑ. Ɩsɔ kɛ́ mɑ tɛmnɑ mɑ tɑɑ kɛ́ tɑm.
8 Nɑ pǝnɛntɛ tɑmpɑnɑ tǝŋlɑɑ teeli ntenuɣu tɑŋnɑ-m, ŋkʋɣʋ Tɑcɑɑ wei ɩ tǝŋǝɣɩ tɑmpɑnɑ nɑ ɩ́ hʋʋkǝnɑ tɔ ɩ kɑ́ hɑ-m kʋyɑkʋ ŋkʋ kʋ wule. Nɑ pǝ tɑɣɑ mɑ tike kɛ ɩ kɑ́ hɑ, ɑmɑ nɑ pɑ tǝnɑ mpɑ pɑ cɑɣɑɑ nɑ pɑ́ nyɩɩlǝɣɩ ɩ kɔntɛ wule tɔ.
Pɔɔlɩ lɔlɑɑ nɑ ɩ tɔkǝlɑɑ
9 Lɑ kookɑlɩ nɑ ń kɔɔ mɑ kiŋ kɛ lɔŋ.
10 Mpi tɔ Temɑsɩ sɔɔlɑ kɑɣɑnɑ ɑntulinyɑ ɩnɛ ɩ nyǝntʋ kɛ́ nɑ ɩ́ lɔ-m nɑ ɩ́ tɛɛnɑ Tɛsɑlonikɩ. Kǝlɛɛsɑŋ nɑ́ tɛɛnɑ Kɑlɑtɩ nɑ Titʋ ɩlɛɣɛ Tɑlɑmɑtii.
11 Luku tike kɛ pǝ yelinɑ-m. Ye n kɔŋ kpɛŋnɑ Mɑlǝkɩ nɑ nyɑ́ nɑ-ɩ ɩ́ kɔɔ, ɩ kɑ sǝŋnɑ-m mɑ tǝmlɛ.
12 Mɑ tilɑ Tisikɩ ɩlɛɣɛ Ɩfeesu.
13 Mɑ yelɑ mɑ kpɑɩ kɛ Kɑlǝpusɩ tɛɣɛ Tʋlʋwɑsɩ, ye n kɔŋ ɩlɛ n kpɛŋnɑ nɑ ń kɔnɑ. Kpɛŋnɑ tɔtɔɣɔ mɑ tɑkǝlɑsɩ, nɑ nsi mɑ tɩɩ kǝlɑ nyɩɩlʋɣʋ tɔɣɔlɛ tɔnǝŋ nyǝnsɩ.