14
Tɑcɑɑ kʋyɑkʋ
1 Tɑcɑɑ pɑ́ɑ́nɑ́ kʋyɑkʋ kpɛɣɛtənɑ ntɔ. Yosɑlɛm nyə́mɑ mɛ, pɑɑ tɑlɑ mə kʋpɑm nɑ ɩ́ nyənəɣɩ.
2 Tɑmpɑnɑ tɔɔ,
Tɑcɑɑ kɑ́ kpeɣeli piitimnɑɑ.
Pɑɑ kʋlɩ Yosɑlɛm tɔɔ nɑ pɑ́ lɛɛkɩ-tɛ.
Pɑɑ kuu tɛɛsɩ tɑɑ wontu, nɑ pɑ́ kpi ɑlɑɑ.
Pɑɑ kuu yəlɑɑ hɔɣɔlʋɣʋ nɑ pɑ́ tɛɛnɑ.
Amɑ pɩɩ yele kʋkɑɑsɑɑ kɛ ɩcɑtɛ tɑɑ.
3 Pə wɑɑlɩ kɛ́ Tɑcɑɑ kɑ́ yoonɑ piitimnɑɑ mɛ,
ɩsɩɩ too ɩ tɩɩ lɑkʋɣʋ yoou wɑɑtʋ tɑɑ tɔ.
4 Wɑɑtʋ ɩnəɣɩ ɩ kɑ́ tənɩ ɩ nɔɔhəlɛ kɛ
Olifinɑɑ pulɑɣɑ tɔɔ kɛ́ Yosɑlɛm kiŋ kɛ ilim təlɩɩlɛ tɔɔ.
Pulɑɣɑ kɑ́ fɑɣɑ nɑ kɑ́ təŋ ilim.
Ɩlɛnɑ hɔɣɔlʋɣʋ lɛŋkʋ nɑ́ɑ́ məŋnɑ
ilim mpətəŋ nɑ lɛŋkʋ nɑ pə ntɔɣɔŋ.
5 Pulɑɣɑ tɛtɛkəlɛ ńtɛ́ tɩɩ wɛɛ ḿpʋɣʋ hɑlənɑ Asɑɑlɩ ɩcɑtɛ.
Ntɛɣɛ ɩ́ kɑ́ təŋ nɑ ɩ́ se,
ɩsɩɩ mə lɔŋcɛnɑɑ kɑ lɑpʋ pənɑɣɑ ŋkɑ
tɛtʋ selɑ Yutɑ wulɑʋ Osiyɑsɩ pɔɔlɛ tɑɑ tɔ.
Wɑɑtʋ ɩnəɣɩ Tɑcɑɑ Ɩsɔ nɑ ɩsɔtɑɑ tillɑɑ pɑɑ tɑlɑ. pə nəɣəsənɑ kɛ́ ɩsɩɩ ɩcɑtɛ hətɛ. Ɩlɛ tɑ́ tʋ Ləkpɑ tɑɑ sɩ ɩcɑtɛ.
6-7 Pə kpɑɣɑʋ wɑɑtʋ ɩnɩ tɔ,
pə fɛɩ sɩ ilim ntɔ ɑhoo ntɔ.
Səkpɛtʋɣʋ kɑ́ mʋkɩ kɛ́ nɑ nyɑɑləm wɛɛ tɑm tɔɔ.
Tɑcɑɑ tike nyəmnɑ kʋyɑkʋ ŋkʋ.
8 Wɑɑtʋ ɩnɩ ɩ tɑɑ sɛɛlʋ kɑ́ lɩɩ Yosɑlɛm
nɑ ɩ lʋm lɛmpɩ kpeŋ Teŋku Kʋsəpʋ tɑɑ,
nɑ lɛmpɩ kɛ Metitelɑnee Teŋku tɑɑ.
Pɩɩ kpe ḿpʋɣʋ tɑm kɛ́,
pɑɑ lʋŋlɛ pɑɑ yolumɑ.
9 Tɑcɑɑ tike kɑ́ tɔɣɔnɑ kɑwulɑɣɑ kɛ tɛtʋ tənɑ tɑɑ.
Nyɑ́ tike təkoŋ kɛ́ yəlɑɑ tənɑ kɑ́ nyɩ nɑ pɑ́ sɛɛkɩ-ŋ.
10 Pə cɔɔnɑʋ Yosɑlɛm tɔ pɩɩ pəsɩ ɩsɩɩ tɛtɛkəlɛ.
Pə kpɑɣɑʋ Kepɑ ɩcɑtɛ kɛ ilim ntɔɣɔŋ tɔɔ tɔ,
nɑ pə́ polo pə mpətəŋ tɔɔ kɛ Limɔŋ ɩcɑtɛ tɔ.
Yosɑlɛm kɑ́ kəlɩ ɩ cɔlɔ ɑcɑlɛɛ kɛ kʋŋkʋlʋməŋ.
Ɩcɑtɛ wɑŋ kɑ́ kpɑɣɑ Pɛncɑmɛɛ nɔnɔɣɔ,
hɑlənɑ nɔnɔɣɔ kʋpənɑɣɑ kɛ ŋkuluŋɑ tɑɑ.
Ɩlɛnɑ pə́ polo Hɑnɑneyɛɛlɩ kutuluɣu sɔsɔɔʋ.
Hɑlənɑ wulɑʋ lɛsɛŋ tənyɑɑsəlɛ.
Ɩlɛnɑ tɛtɛkəlɛ nɑ́ɑ́ kpɑɣɑ Kipeyɑ nɑ tə́ polo Limɔŋ.
11 Ɩ́ kɑ́ cɑɣɑ tə tɑɑ təpɑmm,
nɔɣɔlʋ kɑɑ nyɑɑsɩ-tɛ nɑ yɔkʋɣʋ.
12 Ye pə kɑɑsɑ piitimnɑɑ mpɑ mɛ
ɩ polɑ Yosɑlɛm kɛ yoonɑʋ tɔ.
Mpi mpi Tɑcɑɑ kɑ́ lɑ-mɛ tɔɣɔlɔ.
Mə nɑntʋ kɑ́ tɑsənɑ mə ɩsɛ.
Mə ɩsəpee kɑ́ tɑsɑ ɑ pɔɣɔləŋ tɑɑ.
Mə nsəmɑ kɑ́ tɑsɑ mə nɔɔsɩ tɑɑ.
13 Wɑɑtʋ ɩnɩ ɩ tɑɑ kɛ́ Tɑcɑɑ
kɑ́ yele nɑ sɔɣɔntʋ ɑnɑɑm kpɑ-mɛ,
nɑ ɩ́ kʋlɩ təmɑ tɔɔ.
14 Yutɑ nyə́mɑ kɑ́ yoonɑ Yosɑlɛm nɔɣɔ,
pɑɑ lɛɛkɩ piitimnɑɑ lɛmpɑ wɛnɑʋ.
Pə kpɑɣɑʋ wʋlɑ, nɑ liɣitee nyəɣətʋ tɔ,
nɑ wontu kɛ tuutuumɑ.
15 Kʋtɔŋ ŋku kʋ kpɑɑ kolontunɑɑ tɔ,
kɩɩ kpɑ pɑ tɔlɑ kɛ teitei kɛ́ ḿpʋɣʋ.
16 Wɑɑtʋ ɩnɩ ɩ tɑɑ kɛ́ Yosɑlɛm
kolontunɑɑ kɑkɑɑsɑɣɑ kɑ́ puki Yosɑlɛm tɑɑ kɛ́
pɑɑ pənɑɣɑ ŋkɑɣɑ Pə tənɑ pə tʋ Tɑcɑɑ wulɑʋ kɛ sɛɛʋ.
Ɩ́ kɑ́ tɔkɩ cokɑ ɑcimɑ.
17 Ye tɛtʋ yəlɑɑ mpɑ pɑ tɑ polo
Yosɑlɛm kɛ Tɑcɑɑ sɛɛʋ,
tɛʋ kɑɑ nɩɩ pɛlɛ pɑ tɛ.
18 Ye Icipiti nyə́mɑ mɛ ɩ́ kisɑ Yosɑlɛm
kɛ pote sɩ ɩ́ tɔɣɔ cokɑ ɑcimɑ,
wɑhɑlɑnɑɑ kɑ́ mɑɣɑnɑ-mɛ ɩsɩɩ piitimnɑɑ
lɛmpɑ mpɑ pɑɑ puki ɑcimɑ ɑnɩ tɔ.
19 Ḿpʋɣʋ pɩɩ hɔnɑ mə nɑ piitimnɑɑ mpɑ
pɑɑ kisi ɑcimɑ ɑnɩ ɑ tɔɣɔʋ tɔ mə ŋkpɑŋŋ.
20 Wɑɑtʋ ɩnɩ ɩ tɑɑ, pɑɑ ŋmɑɑ nɑ pɑ́ kpɛŋnɑ
kpɑɣɑnəŋ luuŋ tɛɛ kɑŋkoŋlee tɔɔ sɩ:
Tɑcɑɑ tənnɑ.
Hɑlɩ Ɩsɔ təsɛɛlɛ tɑɑ tiipee kpɑɩ nyənɑ kɑ́ pəsɩ ɩsɩɩ
cɑləm poosiyɑnɑɑ mpɑ pɑ sɩɩ kɔtɑɣɑ təlɑtɛ tɔ.
21 Yosɑlɛm nɑ Yutɑ tɑɑ tiipee tənɑ kɑ́ pəsɩ Tɑcɑɑ nyənɑ.
A tɑɑ kɛ́ kɔtəlɑɑ tənɑ kɑ́ təsɩ pɑ nɑntʋ.
Pɑɣɑtəlɑɑ kɑɑ tɑsɑ wɛɛʋ kɛ Pə tənɑ pə tʋ Tɑcɑɑ
Ɩsɔ təsɛɛlɛ tɑɑ kɛ́ wɑɑtʋ ɩnɩ ɩ tɑɑ.