13
ጾሳ ኑን ዎት ናሸቻናዉ በስንቶ
1 ህንተንቱ እሻቱዋ ሲቅያዋ አጎፕተ።
2 እማꬃ ሞክያዋካ ዶጎፕተ። አያዉ ጎፐ፥ ያትያዋን እት እት አሳይ ኤረናን ኪታንቻቱዋ ሞኬዳ።
3 ቃሾ ጎለን ደእያዋንቱባ ህንተንቱካ ኡንቱንቱና እትፐ ቃሾ ጎለን ደእያዋዳን ቆፕተ፤ ቃይ ህንተንቱ ህንተንቱ ሁጰዉ ዋየትያዋዳን፥ ዋየትያዋንቱባ ቆፕተ።
4 አክያዋነ ገልያዋ አሳይ ኡባይ ቦንቻናዉ በሴ፤ ቃይ አስናይነ ማቻታ እቱ እቶ አማነታናዉ በሴ፤ አያዉ ጎፐ፥ ጾሳይ ዎሹማናዉ ካጄልያዋንታነ ዎሹምያዋንታ ፕርዳና።
5 ሚሻ ሲቁዋፐ ህንተንታ ናግተ፤ ህንተንቶ ደእያዌ ህንተንቶ ግዶ። አያዉ ጎፐ፥ ጾሳይ ባረ ሁጰዉ፥
“ታን ኔና ኡባካ የግከ
ዎይ አግከ”
ያጌዳ።
6 ሄዋ ድራዉ፥ ኑን ጻሊደ፥
“ጎዳይ ታና ማድያዋ፤
ታን ያይከ።
አሳይ ታና አይ ኦꬂ?”
ያጌቶ።
7 ጾሳ ቃላ ህንተንቶ ኦዴዳ ህንተንታ ካለꬄዳዋንታ ሀሳይተ፤ ኡንቱንቱ ዋን ደኤድኖንቶነ ሀሳይተ፤ ቃይ ኡንቱንቱዋዳን አማንተ።
8 የሱስ ክርስቶስ ዝኖካ ሀቼካ መꬍናዉካ ላመተና።
9 ዱማ ዱማ ኦራꬃ ትምርትያን ዎራ ቦፕተ። ኑ ዎዛናይ ጾሳ አꬎ ኬካተꬃን ምኖፐ ሎኦ ግድያዋፐ አትን፥ ቁማ ዎጋቶ አዛዘትያዋ ግደና፤ ሄዎ አዛዘቴዳዋንቱካ ማደትበይክኖ።
10 ኑዉ ያርሽያሳይ ደኤ፤ ዱንካንያ ግዶን ኦꬅያዋንቱ ሄ ያርሽያ ሳፐ ማናዉ ኡንቱንቶ ማታይ ባዋ።
11 ቄሳቱዋ ኡባቱዋ ካፑ ናጋራ ድራዉ፥ መህያ ሱꬃ ያርሻናዉ ኡባፐ አꬍያ ጌሻ ሳኣ አፌ፤ ሽን ሄ መህያ አሹዋ ቃይ ድርሳፐ ካረና ጉዴ።
12 ሄዋ ድራዉ፥ የሱስካ ቃይ ናጋራፐ አሳ ባረ ሱꬃን ጌሻናዉ፥ ካታማ ፐንግያፐ ካረና ዋየቴዳ።
13 ስም ኑን እ ቦረቴዳ ቦርያ አኪደ፥ ድርሳፐ ካረ አኮ ከሶይተ።
14 አያዉ ጎፐ፥ ኑዉ ሀዋን መꬍናዉ ደእያ ካታማይ ባዋ፤ ሽን ኑን ያና ካታማ ናጌቶ።
15 ስም ጾሳዉ የሱሳ ባጋና ኡባ ዎደ ጋላታ ያርሹዋ እሞይተ፤ ሄዋ ግያዌ መተርሻይ አ ሱንꬃዉ እምያ ጋላታ ግያዋ።
16 ሎኦባ ኦꬅያዋነ እቱ እቱዋ ማድያዋ ዶጎፕተ። አያዉ ጎፐ፥ ጾሳ ናሸችያዌ ሄዋ ማላ ያርሹዋ።
17 ህንተና ካለꬅያዋንቶ አዛዘትተ፤ ቃይ ኡንቱንቱ አዛዝያዋካ ኦꬅተ። ኡንቱንቱ ባረንቱ ኦꬄዳዋ ጾሳዉ ኦዳና ድራዉ፥ ህንተንቱ ሸምፑዋ ሎይꬅ ናጊኖ፤ ህንተንቱ ኡንቱንቶ አዛዘቶፐ፥ ባረንቱ ኦሱዋ ናሸቲደ ኦꬃና፤ ሄዌ ꬋዮፐ፥ ኡንቱንቱ ይሎቲደ ኦꬃና፤ ሄዌ ህንተንታ አይነ ማደና።
18 ኑዉ ጾሳ ዎስተ። ኑን ኡባ ዎደ ሎኦባ ኦꬃናዉ ኮይያ ድራዉ፥ ኑና ዞርያ ሎኦ ዎዛናይ ኑዉ ደኤ።
19 ጾሳይ ታና ህንተንቱኮ ኤለካ ዛራና ማላ፥ ጾሳ ህንተንቱ ሎይꬅ ዎሳናዳን፥ ታን ህንተንታ ሎይꬃ ዎሳይ።
ዎሳ
20 ሳሮተꬃ ጾሳይ፥ ኑ ጎዳ የሱሳ፥ ዶርሳቱዋ ሄንꬃንቻ ዎልቃማ፥ መꬍና ጫቁዋ ሱꬃን ሀይቁዋፐ ደንꬄዳ።
21 ጾሳይ የሱስ ክርስቶሳ ባጋና ባረ ስንꬃን ባረና ናሸችያዋ ህንተንታ ኦስሲደ፥ ህንተንቱካ እ ኮዬዳዋ ኦꬃና ማላ፥ ሎኦ ኦሱዋ ኡባን ህንተንታ እ ጊግሶ፤ ጾሳይ መꬍ መꬍናዉ ቦንቼቶ። አመንእ።
ቁተꬃ ቃላ
22 ታናዳን አማንያዋንቶ፥ ታን ሀ ዳብዳቢያ ህንተንቶ ቃንꬃን ጻፌዳ ድራዉ፥ ህንተንቱ ሀ ዞርያ ሳለተናን ስሳና ማላ፥ ታን ህንተንታ ዎሳይ።
23 ኑ እሻይ፥ ጽሞቶስ ቃሹዋፐ ብለቴዳዋ ኤርተ። ኤሌል እ ሃ ዮፐ፥ ታን አናና ባደ ህንተንታ በአና።
24 ህንተና ካለꬅያ ኡባቱዋነ ጾሳ አሳቱዋ ኡባ ሳሮ ሳሮ ጊተ። ጻልያፐ ዬዳ አማንያዋንቱ ህንተንታ ሳሮ ሳሮ ጊኖ።
25 አꬎ ኬካተꬃይ ህንተናና ኡባና እትፐ ግዶ። አመንእ።