ያዪቆቢ
ፃፌዳ ኪታ
ጌሉዋ
ሃ ኪታ ፃፌዳ ያዪቆቢ ጎዳ ዬሱሳ ኢሻፔ ኣቲን ታማኔ ላዑ ዬሱሳ ካሊያዋንቱፔ ኢቱዋ ጊዴና። ኢካ ዬሩሳላሜን ዴዒያ ኣማኒያ ኣሳ ካሌꬂያ ጪማ (ጋል 2፡9)። ሃ ኪታይ ፃፌቴዳዌ ኢቲ ዎሳ ጎላቲው ጊዴናን ሮሜ ካዉቴꬃ ጊዶን ላሌቴዳ ኣዪሁዳ ኣማኒያዋንቱ ኡባቱዋሳ ጊዲዴ፥ ኑናካ ሃቼ ሃቼ ዴዑዋ ካሌꬂያ ቆፋቱዋ ኦይቄዳ። ፃፌቴዳዌካ «ኣላሚያ ኡባን ላሌቴዳ ፆሳ ኣሳሳ»። ሃ ማፃፋ ፃፌዳዌ ኣꬌዳ ኤራቴꬃ ኑኒ ኦሱዋን ፔሺያ ሂላኔ ኣማኒያ ኣሳ ኤሻኔ ሃኖታ ታማሪሲያ ኦጊያ ካሌሱዋ ኢሚያ ዬዋቱዋ ሚሲሊያዳን ቆንጪያን ቤሴ።
ሂዬሳቴꬃባ፥ ዱሬቴꬃባ፥ ፓጪያባ፥ ሎዖ ኤሻባ፥ ቃናቲያባ፥ ኣማኑዋባኔ ሎዖ ኦሱዋባ፥ ኢንፃርሳ ማዱዋባኔ ቆሁዋባ፥ ኣꬌዳ ኤራቴꬃባ፥ ኢቱ ኢቱዋና ዋላቄቲያባ፥ ኦቶሩዋባኔ ኣሺኬቴꬃባ፥ ሃራ ኣሳ ቦላ ፒርዲያዋ፥ ጬቁዋባ ዎይ ኣዩዋባ፥ ጌንጫባኔ ዎሳባ፥ ኣማኒያ ኣሳይ ዴዓናው ቤሲያ ኦጊያ ኡባ ፃፌዳ።
ኪታይካ ኪሪስቲና ዴዑዋን ኣማኑ ኦሱዋን ፔሻና ሃኖታባ ቆንጪሲዴ ቤሴ።
ሼምፓቱዋ ኡባቱዋሲ ኢሜቴዳ ቃንꬃ ቆፋቱዋ
ጌሉዋ (1፡1)
ኣማኑዋኔ ኣꬌዳ ኤራቴꬃ (1፡2-8)
ሂዬሳቴꬃባኔ ዱሬቴꬃ (1፡9-11)
ፓጪያ (1፡12-18)
ፆሳ ቃላ ሲሱሳኔ ኦሱዋ ቦላ ፔሹሳ (1፡19-27)
ሃኔና ኦጊያን ኢቱ ሃራሲ ማዴና ማላ ኢሜቴዳ ኦዱዋ (2፡1-13)
ኣማኑዋኔ ኦሱዋ (2፡14-26)
ኣማኒያ ኣሳኔ ኢንፃርሳፔ ኬሲያ ሃሳያ (3፡1-18)
ኣማኒያ ኣሳኔ ሃ ኣላሚያ (4፡1-5፡6)
ዱማ ዱማ ዬዉዋሲ ኢሜቴዳ ማቁዋ (5፡7-20)
1
1 ታኒ ያዪቆቢ ፆሳ ኣይሊኔ ጎዳ ዬሱሲ ኪሪስቶሳ ኣይሊ፥ ቢታ ኡባን ላሌቴዳ ታማኔ ላዑ ዜሬꬃቶ ሳሮታ ኪታይ።
ዳንዳያ፥ ኣማኑዋ፥ ኣꬌዳ ኤራቴꬃ
2-3 ታናዳን ፆሳ ካሊያዋንቶ፥ ሂንቴ ኣማኑ ፓጬቲያዌ ሂንቴንቶ ዳንዳያ ኢማናዋ ኤሪዴ፥ ዱማ ዱማ ፓጪ ሂንቴና ጋኪያ ዎዴ፥ ሄዋ ኩሜንꬃ ናሼቻዳን ፓይዲቴ።
4 ሂንቴ ዳንዳያይ ኣይኔ ባሊ ባይናን ሂንቴና ሚኔዳዋንታኔ ፓጪ ባዪናዋንታ ኦꬂዴ፥ ባሬ ኦሱዋ ፖሎ።
5 ሺን ሂንቴፔ ኦኒኔ ባሬው ኣꬌዳ ኤራቴꬃይ ꬋዮፔ፥ ካꬌናኒ ኡባው ኬካቴꬃን ኢሚያ ፆሳ ዎሶ። ኢ ኣው ኢማና።
6 ሺን ኢ ኣያኒኔ ሲꬌናን ኣማኑዋን ፆሳ ዎሶ። ኣዪሲ ጎፔ፥ ሲꬊያ ኡራይ ጫርኩ ሱጊና ቃፂያ ኣባ ቤታ ማላ።
7-8 ኣዪሲ ጎፔ፥ ላዑ ቆፋይ ዴዒያ ኡራይ፥ ባሬ ኦጊያ ኡባን ባሬ ቆፋ ቃቼናዌ፥ ሄ ኡራይ ጎዳፔ ኣዪኔ ዴማናው ቆፖፖ።
ሂዬሳ ኣሳኔ ዱሬ ኣሳ ናሼቻ
9 ሺን ሂዬሳ ኢሻይ ፆሳይ ኣ ꬎቁ ኦꬄዳ ዎዴ ናሼቶ።
10 ቃሲ ዱሬ ኢሻይካ ፆሳይ ኣ ካዉሺሴዳ ዎዴ ናሼቶ። ኣዪሲ ጎፔ፥ ዱሬ ቢታኒ ማታ ጊዶን ዲጪያ ጪሻዳን ꬋያና።
11 ኣዪሲ ጎፔ፥ ኣዋይ ባሬ ሴላና ኬሲዴ፥ ማታ ሜሊሲና፥ ጪሻይ ꬋዬ፤ ቃሲ ኣ ማላ ሎዖቴꬃይካ ꬋዬ፤ ሄዋዳንካ ቃሲ ዱሬ ቢታኒ ባሬዋ ኦꬂዴ ꬋያና።
ኣሳ ቦላ ጋኪያ ፓጪያ
12 ዋዪያን ጌንጪያ ኡራይ ኣንጄቴዳዋ፤ ኣዪሲ ጎፔ፥ ሄ ዋዪያ ፆኔዳዋፔ ጉዪያን፥ ፆሳይ ባሬና ሲቂያዋንቶ ኢማና ጌዳ ዴዑዋ ኣኪሊሊያ ኢ ኣካና።
13 ኦኒኔ ፓጬቴዳ ዎዴ፥ «ታና ፆሳይ ፓጬ» ጎፖ። ኣዪሲ ጎፔ፥ ፆሳይ ኢታን ፓጬታናው ዳንዳዬና፤ ቃሲ ኢ ባሬ ሁጴው ኦናኔ ፓጬና።
14 ሺን ኣሳይ ሁጲያን ሁጲያን ባሬ ሁጴ ኢታ ኣሙዋን ጎሼቲያ ዎዴኔ ጪሜቲያ ዎዴ ፓጬቴ።
15 ሄዋፔ ጉዪያን፥ ኣሙ ሻሃሪዴ፥ ናጋራ ዬሌ፤ ቃሲ ናጋራይ ዲጪዴ፥ ሃይቁዋ ዬሌ።
16 ታናዳን ፆሳ ካሊያዋንቶ፥ ጪሜቶፒቴ።
17 ሎዖ ኢሙዋ ኡባዪኔ ኩሜንꬃ ዎይታ ኡባይ ሳሉዋፔ ዬ። ሳሉዋ ፖዑዋ ሜꬌዳ ኣዉዋፔ ዬ፤ ፆሳይ ባሬ ሁጴው ዱማቴናኔ ዎይ ባሬ ኩዋ ላሜና።
18 ኑኒ ኢ ሜꬌዳ ሜꬌታቱዋ ጊዶን ꬎቃሳ ኣካናዳን፥ ኑና ባሬ ሼኒያን ቱሙ ቃላን ዬሌዳ።
ሲሴዳዋ ኦሱዋን ፔሺያዋ
19 ታናዳን ፆሳ ካሊያዋንቶ፥ ሃዋ ሃሳዪቴ፤ ኣሳይ ኡባይ ሲሳናው ኤሌሎ፤ ሺን ሃሳያናዉኔ ሃንቄታናው ኤሌሎፖ።
20 ኣዪሲ ጎፔ፥ ኣሳ ሃንቁ ፆሳይ ኮዪያ ፂሎቴꬃ ኣሄና።
21 ሄዋ ዲራው፥ ቱና ሃኖታ ኡባኔ ኢታቴꬃ ኡባ ሂንቴፔ ꬋዪሲዴ፥ ፆሳይ ሂንቴ ዎዛናን ቶኬዳ ሂንቴ ሼምፑዋ ኣሻናው ዳንዳዪያ ቃላ ኣሺኬቴꬃን ኣኪቴ።
22 ሺን ፆሳ ቃላ ኦሱዋን ፔሺቴፔ ኣቲን፥ ሲሳ ፃላላን ሂንቴ ሁጲያ ጪሞፒቴ።
23 ኣዪሲ ጎፔ፥ ቃላ ሲሲዴ ኦꬄና ኡራይ ዴዖፔ፥ ኢ ባሬ ማላ ማስቶቲያ ፄሊያ ኡራ ማላ።
24 ኢ ባሬና ፄሊዴ ቤ፤ ኤሌካ ኢ ኣይ ማሌንቶኔ ዶጊ ኣጌ።
25 ሺን ኦኒኔ ኣዪሌቴꬃፔ ኬሲያ ባሊ ባዪና ሂጊያ ፄሊዴ፥ ኣኒ ኣቂያዌ ቃሲ ኣ ናጊያዌ፥ ሲሴዳዋካ ዶጌናዌ፥ ሄ ኡራይ ባሬ ኦꬂያ ኦሱዋን ኣንጄታና።
26 ባሬ ኢንፃርሳ ናጌናን ባሬና ጪሚዴ፥ ባሬው ፆሳ ጎዪኒያዋ ማላቲያ ኡራይ ዴዖፔ፥ ኣ ጎይናይ ሜላ።
27 ፆሳ ኣዉዋ ሲንꬃን ፖኩ ባዪና ጌሻ ጎይናይ ሃዋ፤ ሄዌ ሃቃዌ ጎፔ፥ ኣታ ኣዉ ባዪና ናናቱዋኔ ዋዬቲያ ኣምዔቱዋ ማዳናዋኔ ሳዓ ናጋራ ቂታፔ ባሬ ሁጲያ ናጋናዋ።