3
Djesuyu Ḻakaŋaya Nhaltjan Yurru Yolŋu Dhawal-wuyaŋi Bulu
1 Ga waŋgany yolŋu gurrana nhinana ŋunhaya wäŋaŋu, yurru yäkuya ŋayi ŋunhi ḏirramuya Nicodemus. Yurru ŋayi Rom-djäkami Pharisee ḏarramuya, ŋurruŋu ŋayi Jews-ku bäpurru'wu.
2 Ga waŋganymi munhaku, ŋayi ŋunhi Rom-djäkami Pharisee ḏirramu marrtji bala Djesuwaya, ga waŋa nhanukaya bitjana, “Wäy Marŋgikunhami, ŋanapu marŋgi nhuŋuya ŋunhi nheya dhuwaya djuy'yunaya God-Waŋarrwuŋu, bili nhuŋu djämaya wirrki warray latju' ga ganydjarrmi. Yaka yurru ŋula yolŋuyu djäma bitjandhi ŋayipiya gänaya. God-kayana yana ganydjarrkyu yurru yolŋuya djäma bitjandhi.”
3 Bala ŋayi Djesuya waŋa mayali'mi dhäwu buku-wakmama nhanŋu Nicodemus-kuya bitjana, “Märr-yuwalk ŋarra nhuŋu gurra ḻakamaya dhuwaya. Ŋunhi nhe yurru dhawal-wuyaŋi bulu, nhe yurru nhämana God-kuya Rom.”
4 Bala ŋayi Nicodemus-tja waŋa bitjana, “Nhaltjana ŋayi yurru yolŋu bulu dhawal-wuyaŋiya? Nhaltjana yurru bathala yolŋu gärri ŋäṉḏi'miŋuwaya guḻundhi, ga bulu yurru dhawal-wuyaŋi?” Bitjana ŋayi ŋunhi Rom-djäkamiyuya ḏarramuyu dhä-wirrk'yun ŋanya Djesuna.
5-6 Bala ŋayi Djesuya ḻakama nhanŋu bitjana, “Märr-yuwalk ŋarra nhuŋu gurra ḻakamaya dhuwaya. Ŋunhi ŋayi yurru yolŋu yaka dhawal-wuyaŋi gapuyu ga Birrimbirryu bulu, ŋayi yurru ŋunhiya yolŋu yakana gärri God-kaya Romdhi. Ŋunhi ŋayi ŋuli yuṯa yothu dhawal-wuyaŋi ŋäṉḏi'miŋuwaya guḻunŋu, ŋunhiya yothu ŋuli rumbalnha yana walŋa, ga ŋunhi ŋayi yurru yolŋu ŋula yolthu ŋätthun God-ku Dhuyu Birrimbirr nhanukaya ŋayi ŋayaŋuyi, ŋayiya yurru ŋunhiyiya yolŋu yuṯathina, bili ŋayi yurru ŋunhiyi bulu dhawal-wuyaŋi God-kaya Walŋamiyu Birrimbirryu. Bala ŋayi yurru ŋunhiyiya yolŋu walŋana djinawa'ya ŋayaŋu ga birrimbirr nhanŋu. Ŋunhi nhe yurru dhawal-wuyaŋi bulu ga yuṯathi, bala nhe yurru nhina God-kayana Romŋu walŋana yana.
7 Yaka ṉirr'yu dhiyaŋuya ŋunhi ŋarra nhuŋu bitjana ḻakaŋaya, ‘Nhuma yurru bulu dhawal-wuyaŋi.’
8 Marŋgi nhe watawuya ŋunhi ŋuli wata biwu'yun bala wanhama ŋayi ŋuli djälthi. Ŋäma nhe ŋuli ŋunhiyi watana rirrakay, yurru yaka nhe marŋgi ŋuriki watawu wanhaŋu ŋuli ŋunhiyi biwu'yun, ga wanhama ŋayi ŋuli bo'yun. Ga yakana nheya ŋuli nhäma Walŋaminaya Birrimbirrnha, ŋunhi ŋayi ŋuli yolŋuwaya ŋayaŋuyi gärri, yurru yuwalkna yana ŋayi yurru yolŋuya ŋunhiyi dhawal-wuyaŋina bulu God-kaya walŋayu ŋuriŋiyi.” Ga bitjana ŋayi Djesuya ḻakaŋama nhanŋu Nicodemus-kuya.
9 Bala ŋayi Nicodemus-thuya dhä-wirrka'yuna Djesuna bitjana, “Nhaltjana yurru bitjannydja?”
10 Ga Djesuya waŋa nhanukaya bitjana, “Nhe ga dhuwaya marŋgikunhamiya Israelpuyya, ŋe? Yurru yaka yana nhe marŋgiya dhiyaku romguya?”
11 Ga bulu ŋayi Djesu waŋa bitjana, “Märr-yuwalk ŋarra nhuŋu gurra ḻakamaya dhuwaya. Ŋanapuya gurra ḻakama nhäna malanya, ŋunhinha ŋunhi ŋanapu nhäŋaya bilina. Ŋuriki ḻiŋgu rombuy ŋanapu ŋuli ḻakamaya nhumaŋgu, ŋunhi ŋanapu marŋgina ŋurikiyi. Yurru yakana nhuma ŋuli märrama ŋanapuŋgu dhäruktja.
12 Yo. Ŋarra ḻakamaya gurra nhumaŋgu dhiyakuy munatha'wuy rom, yurru yaka nhuma gurra märr-yuwalkthiya ŋarraku. Ga nhaltjan nhuma yurru märr-yuwalkthiya?... ŋunhi ŋarra yurru ḻakama djiwarr'wuy rom malany nhumaŋgu? Yurru yuwalktja, yaka nhuma gurra märr-yuwalkthi ŋarraku.
13 Yakana ŋula yolŋu marrtjina djiwarr'yi. Ŋarrapi yana marŋgi djiwarr'wu waŋawu. Ŋarra yarrupthuna beŋu djiwarr'ŋuya. Ŋarra dhuwaya Yuwalkŋuya Wal'ŋu Yolŋu.
14 Birrka'yu ŋunhi baman'puy dhäwu ŋilimuŋgu, ŋaḻapaḻmi waya ŋunhi waya marrtjina gurrana ḏiltji'ku, bala waya ŋayaŋu-ḏalthinana ga waŋanaminana God-kayana. Ga ŋayi God-thu djuy'yuna bäpina wayana ḏarrkthunawuna ga bunharawu wayaŋgu. Bala God waŋana Moses-kaya, ŋayi yurru warkthuna djimuku bäpi bala ŋal'mamana dharpayina. Ŋunhi waya yurru nhäma ŋunhi bäpi dharpaŋuya, bala God-thuya yurru walŋakumana wayana ŋunhi wayana yurru ḏarrkthun bäpiyu malaŋuyu.
Yo. Ŋarra dhuwaya Yuwalktja Wal'ŋu Yolŋu. Yolŋuyuya waya yurru ŋal'mamana ŋarrana dharpayiya, bitjaya Moses-thu ŋunhi ŋal'maŋaya dharpa bäpimi.
15 Märr yurru ŋula yolthu yolŋuyu ŋarrana märr-yuwalkthi, ŋayiya yurru ŋunhiya yolŋu nhina walŋana gupa-ḏalnha.
16 Yo. Wirrkina ŋayi God-tja märr-ŋamathina yolŋuwu wayaŋgu, wäŋayi ga wäŋayi, birrka'miŋu yana, bala ŋayi djuy'yunana nhanŋuwuy ŋunhi waŋganynhana Gäthu'miŋuna, märr yurru ŋunhi yolŋu waya ŋunhi waya yurru märr-yuwalkthi nhanukaya, yakana waya yurru rakunydhiya ŋunhi, yana waya yurru nhina walŋana gupa-ḏalnha nhanukaya God-kaya.
17 Yo, God-thu djuy'yuna nhanŋuway Gäthu'miŋuna dhipaya muntha'yi märr ŋayi yurru walŋakuma yolŋuna wayana. Yaka God-thu ŋanya lili djuy'yuna ŋaramurryu ŋayaŋuyu yolŋuwu wayaŋgu.
18 God-tja gurra yakana ŋaramurrthi ŋunhikuya yolŋuwu wayaŋgu ŋunhi waya gurra märr-yuwalkthi nhanŋu Gäthu'miŋuwu. Ga ŋunhiya yolŋuya wayaya, ŋunhi waya gurra yaka märr-yuwalkthi, ŋayiya God-tja gurra ŋaramurrthina wayaŋgu, bili waya yaka märr-yuwalkthina ŋunhiyi yolŋu waya nhanŋu Djesuwu ŋunhi ŋayi God-ku waŋgany yana Gäthu'miŋu.
19 Bili ŋayi Djesu dhipaya munatha'yi bunana, ga ŋayi ŋunhi djarraṯawun'tja. Yurru yolŋuya waya yaka djälthina nhanŋu djarraṯawun'ku. Waya wirrki gurra djälthi dhiyaku warumukku wäŋawu, bili waya djäl waya yurru djäma yätj warumukŋu. Ga God-tja gurra ŋaramurrthi wayaŋgu.
20 Ŋunhi ŋuli yolŋuyu waya djäma yätjtja rom, ŋunhiya yolŋu waya ŋuli yuwalktja nyämir'yun ŋunhiyi djarraṯawun'. Yakana waya yurru marrtji djarraṯawun'thiya bili waya marŋgi ŋunhi waya yurru marrtji djarraṯawun'thiya, waya yurru bukmakthu yolŋuyu waya yurru nhäma nhä waya gurra yätj djäma.
21 Ga ŋunhiya yolŋu ŋunhi ŋayi gurra nhina manymakkuma, ŋayi yurru marrtji djarraṯawun'thina, märr waya yurru wiripu-gulku' waya nhäma ga dharaŋan ŋanya, ŋunhi ŋayi gurra nhina nhanukaya God-kaya djälŋu.”