30
Ezhipiti tara sagawa
pi se yaraga ka yɔn
1 Yawe Yɛnŋɛlɛ lì yo fɔ:
«Piile mbele pè yiri ma je, jɔlɔgɔ yɛn pe wogo,
pe ma pe kagala ke kɔn ma ke tɛgɛ, ma si yala kee yiri mi yeri.
Pe ma saa yɔn finliwɛ le, mba pi woro na nandanwa kala,
ma koro na kapere ta tari kapere ta na.
2 Pe ma konɔ li lɛ ma kari wa Ezhipiti tara,
ma si yala paa na yewe,
pe ma saa pe yɛɛ karafa wa Farawɔn wi fanŋga ki nɔgɔ,
mbe sa larasaga ja wa Ezhipiti tara yinmɛ pi ni.
3 Ye larasaga wa Farawɔn wi yeri, ki yaa ka sɔngɔrɔ mbe pye fɛrɛ kala ye yeri;
ye larasaga wa Ezhipiti tara, ki yaa ka sɔngɔrɔ mbe pye go sogowo kala ye yeri.
4 Ye yɛkeele pè ye wa Zowan ca makɔ,
ye pitunmbolo gbɔɔlɔ pè gbɔn wa Hanɛsi ca makɔ.
5 Ɛɛn fɔ pe ni fuun pe yaa ka fɛrɛ shɔ Ezhipiti tara woolo pe wogo na,
katugu pe yɛn cɛnlɛ woolo mbele pe se ya yaraga ka yɔn lere kan,
pe se ka ya mbe pe saga,
nakoma mbe pe wogo ki yɔn;
ɛɛn fɔ Ezhipiti tara woolo pe kala li yaa ka pye pe yeri fɛrɛ naa tifagawa kala.»
6 Sɛnrɛ nda tì yo Negɛvu tara yaayoro ti wogo na ti nda fɔ:
«Tara nda jɔlɔgɔ naa lawɔrɔ yɛn wa ti ni,
jara nɛɛlɛ naa jara pɛnɛ pe yɛn wa ti ni,
mɛɛrɛ naa wɔɔgɔ pege ŋga ki maa yinrigi sire na ti yɛn wa ti ni,
pe ma pe yarijɛndɛ tuguro ti taga sofilele pe na,
ma pe yarijɛndɛ sɔnŋgbanga woro ti taga yɔngɔmɛye pe na, ma ki tara ti kɔn ma yiri,
mbe sa ki yarijɛndɛ ti kan cɛnlɛ la yɛgɛ yeri, cɛnlɛ na li se ya yaraga ka yɔn pe kan.
7 Ezhipiti tara sagawa pi yɛn wagafe, pi se ya yaraga ka yɔn.
Ki kala na, mi yɛn naga yuun ki tara ti wogo na fɔ:
‹Tinmɛ gbɔɔ yirigefɔ, mba pi se ya yaraga ka pye.› »
Yɛnŋɛlɛ li woolo pè yiri ma je
8 Koni, yiri ma sa ki kagala ke yɔnlɔgɔ pe yɛgɛ na sinndɛlɛgɛ paparapa ka na;
ma ke yɔnlɔgɔ sɛlɛgɛ sɛwɛ ŋa pe ma migi wa na,
jaŋgo ke koro wa wagati ŋa wila paan wa yɛgɛ wi kala na,
mbe pye paa sɛrɛfɔ yɛn sanga pyew fɔ tetete.
9 Katugu pe yɛn cɛnlɛ na lì yiri ma je,
pe yɛn piile mbele pe maa yagbogolo finlɛlɛ,
pe yɛn piile mbele pe woro na jaa mbaa Yawe Yɛnŋɛlɛ li lasiri sɛnrɛ ti nuru.
10 Pe maa ki yuun Yɛnŋɛlɛ yɔn sɛnrɛ yofɛnnɛ pe kan fɔ:
«Yaga kaa Yɛnŋɛlɛ yɔn sɛnrɛ yuun naa.»
Pe maa ki yuun yariyanra yanfɛnnɛ pe kan fɔ:
«Yaga kaa yariyanra kaselege woro yuun we kan!
Yaa sɛntanra to cɛ yuun we kan,
yaa lefanlaga sɛnrɛ yuun we kan.
11 Ye kɛɛ wɔ wa konɔ jɛnɛ li ni,
ye kɛ ye kozinnɛ li wa!
Yaga kaa Izirayɛli woolo Yɛnŋɛlɛ kpoyi li sɛnrɛ yuun we yɛgɛ sɔgɔwɔ naa.»
12 Ki kala na, pa Izirayɛli woolo Yɛnŋɛlɛ kpoyi lì yo yɛɛn fɔ:
«Kì kaa pye yè je ki sɛnrɛ nda ti na,
ma ye jigi wi taga lewɛlɛwɛ kapyere naa nambara wo na,
mari pye ye kɛɛndagaserege,
13 ki kala na, ki kambasinnde ti yaa pye ye yeri
paa jɛnwsaga ma kaa pye mbogo ŋga kì yaraga ki na, ma yɛri we,
ki mbogo ki ma kaa fo ma to yɔnlɔ nuŋgba.
14 Ki yaa ka to mbe yaari paa yɛgɛ ŋga na joro cɔgɔ ma to ma yaari we,
mbe yaari wɔngɔwɔngɔ fɔ yaraga se koro wa ki ni,
tisɛgɛ se ta wa ki ni ŋga pe mbe ya tɛgɛ mbaa kasɔn woo ki ni,
nakoma mbaa tɔnmɔ kori ki ni tɔnmɔ wege ni.»
Ye koro yɛw ye taga Yɛnŋɛlɛ li na
15 Kona, a we Fɔ, Yawe Yɛnŋɛlɛ, Izirayɛli woolo Yɛnŋɛlɛ kpoyi lì sho fɔ:
«Na yaga sɔngɔrɔ mbe pan mi ŋa Yɛnŋɛlɛ na kɔrɔgɔ, mbe ye jatere wi tɛgɛ laga nuŋgba, pa ye yaa shɔ.
Na yaga yɛgɛ to, mbe ye jigi wi taga na na, pa ye yaa fanŋga ta.
Ɛɛn fɔ yee si yɛnlɛ ki na.
16 A ye sho fɔ: ‹Ayoo, we yaa lugu shɔnye na mbe fe!›
Ɛɛn koni, yaa fee fasi!
A yè sho fɔ: ‹We yaa lugu shɔnye na, mbele pè wege!›
Ki kala na, mbele pe yaa taga ye na mbaa ye puro, pe yaa wege mbe wɛ ye na.
17 Ye ni, nambala wagakele (1 000) yaa ka fe ye juguye nuŋgba yɛgɛ;
ye juguye kaŋgurugo yaa ti ye ni fuun ye fe,
fɔ mbe ti ye sanmbala ye koro nuŋgba nuŋgba paa pe ma kaa tiyala kan yanwira go na,
paa dirapoye yɛn tinndi wa go na.»
Yɛnŋɛlɛ li yinriwɛ taga kì gbɔgɔ
18 Konaa ki ni fuun, Yawe Yɛnŋɛlɛ li yɛn na jaa mbe ye yinriwɛ ta,
ye yuŋgbɔgɔrɔ yɛn na jaa mbe pye li na,
katugu Yawe Yɛnŋɛlɛ li yɛn Yɛnŋɛlɛ na li yɛn ma sin.
Mbele fuun pe maa wele li yeri, fɛrɛwɛ yɛn pe woo.
19 Yoro Siyɔn ca fɛnnɛ, yoro mbele ye yɛn ma cɛn wa Zheruzalɛmu ca,
ye se kaa gbele naa.
Na yaga ka gbele mbe Yɛnŋɛlɛ li yeri, a lìgi logo,
li yaa ye yinriwɛ ta.
Na liga ka ye gbelege ki logo, li yaa ye yɔn sogo.
20 We Fɔ wi yaa yaakara kan ye yeri ye jorisanga wi ni,
mbe ye kan tɔnmɔ ni ye jɔlɔgɔ sanga wi ni.
Ye nagafɛnnɛ pe se ka lara ye na naa;
ɛɛn fɔ ye yaa kaa pe yaan gbɔgɔyi.
21 Na ye kaa kee kalige kɛɛ yeri, nakoma kamɛŋgɛ kɛɛ yeri,
ye yaa kaa ki sɛnrɛ nda ti nuru ye puŋgo na fɔ:
«Konɔ li na, yaa tanri li na!»
22 Kona, warifuwe ŋa yè maramara ye yaara yanlɛrɛ nda yè tɛ ti na,
konaa tɛ ŋa yè gbɔn ma mara ye yarisunndo nda yè gbegele tugurɔn ni ti na,
ye daga mbaa ti jate fyɔngɔ ni.
Ye yaa ka ki yaara ti koli mbe sari wa paa fyɔngɔ yaara yɛn,
mbe sigi yo ti kan fɔ: «Ye kari ye wɔ laga!»
23 Pa ko na, yariluguro nda yè lugu wa tara ti ni,
Yɛnŋɛlɛ li yaa tisaga ki yaga ki pan ti na.
Yarilire nda ti yaa ka yiri wa tara ti ni, ti yaa pye mbe yɔn, mbaa fanŋga nii lere ni.
Ko wagati wo ni, ye yaayoro kasara ti yaa ka pye mbe yɔn mbe tugbɔlɔ.
24 Nɛrɛ to naa sofilele mbele pe maa fali wa kɛrɛ ti ni,
pe yaakara ti yaa ka pye kɔ ni, mbe tanla;
yan ŋga pe maa kaa, pe yaa kaga fɛ mbege cɔnri yarilire fɛkanŋgaga naa teli ni.
25 Ye juguye pe gbopilige ki na,
ki pilige ŋga sanŋgazoye titɔnlɔmbɔlɔ pe yaa ka toori,
tɔnmɔ yaa kaa fuun lɛgɛrɛ mbaa yinrigi wa yanwira nda tì yagara ti ni fuun na ti go na,
konaa tinndiye mbele fuun pè yagara pe go na.
26 Yawe Yɛnŋɛlɛ li ka kaa li woolo pe sagbanra ti foo pilige ŋga ni,
mbaa pe wɛlɛgɛsara ti sagala pilige ŋga ni,
pa yeŋge ki yanwa pi yaa ka gbɔgɔ paa yɔnlɔ ki yanwa pi yɛn.
Yɔnlɔ ko yanwa po yaa ka gbɔgɔ gbɔgɔsaga kɔlɔshyɛn,
mbe pye paa piliye kɔlɔshyɛn yɔnlɔ yanwa yɛn, mba pì gbogolo pi yɛɛ na.
Yɛnŋɛlɛ li yaa malaga gbɔn
Asiri tara fɛnnɛ pe ni
27 Ye wele, Yawe Yɛnŋɛlɛ lo yɛrɛ jate lì yiri taleere ta ni na paan,
li naŋgbanwa pi yɛn na sorogi ma wɛli paa kasɔn yɛn.
Li yɛn na paan paa kambaaga wɔgɔ gbeŋge yɛn;
li sɛnpaara ti yɛn na fyɛrɛ gbɔrɔ waa,
li yɔn sɛnrɛ ti yɛn paa kasɔn yɛn, ŋga ki yɛn na sorogi.
28 Li yɔn tifɛlɛgɛ ki yɛn paa lafogo yɛn ŋga kì yin ma jaraga,
ŋga ki tɔnmɔ pi ma lere yigi fɔ wa wi yɔlɔgɔ;
li yaa ka cɛngɛlɛ ke jɛlɛ mbe ke yuguyugu wa li jɔgɔwɔ pye kɛnmɛ wi ni.
Li yaa ka karafe le wa cɛngɛlɛ woolo pe yɔnrɔ ti na, mbe kari pe ni wa laga ŋga pe woro na jaa.
29 Yoro Zheruzalɛmu ca woolo, yoro wo na, ye yaa kaa yuuro koo, paa yɛgɛ ŋga na ye maa ki piin yembinɛ ye fɛtiye piliye yi na we. Ye nawa pi yaa ka yinŋgi, paa yɛgɛ ŋga na pe ma kaa na wegele wiin leele mbele kan, pe yɛn na tanri na kee wa Yawe Yɛnŋɛlɛ li yanwiga ki na, wa Izirayɛli woolo pe go sigefɔ ŋa wi yɛn paa walaga yɛn wi yeri.
30 Yawe Yɛnŋɛlɛ li yaa li wunluwɔ magala li yirige mbe para,
leele pe yaa kali fanŋga kɛɛ ki yan ki yɛn na tinrigi pe na, mbe pe gbɔn wa li naŋgbanwa gbɔɔ pi ni,
naa li kasɔn yinnɛ na li yɛn na sorogi li ni,
naa tisagbɔgɔ ni, naa tisaga tifɛlɛgɛ ni, konaa sinndɛɛrɛ tisaga ni.
31 Kona, na Asiri tara fɛnnɛ paga ka Yawe Yɛnŋɛlɛ li magala li logo, pa pe yaa la seri fyɛrɛ ti kala na;
li yaa ka pe gbɔn li gbɛgɛ ki ni.
32 Gbɛgɛ gbɔnsaga nuŋgba nuŋgba ŋga fuun Yawe Yɛnŋɛlɛ li yaa pe gbɔn mbe pe koro, pe yaa pimbigile naa ŋgɔni magala logo li woolo pe yeri. Yawe Yɛnŋɛlɛ lo jate li yaa ka malaga ki gbɔn pe ni li fanŋga kɛɛ ki ni.
33 Maga lɛ wa wagati titɔnlɔwɔ ni, kasɔn gbɔgɔ ka yɛn ma gbɛgɛlɛ makɔ,
ki yɛn ma gbɛgɛlɛ Asiri tara wunlunaŋa wo mɛgɛ ni.
Ki yɛn ma jugo, ma pyɛɛlɛ,
kasɔn gbɔlɔ li, naa kanŋgirɛ lɛgɛrɛ ni;
Yawe Yɛnŋɛlɛ li yɔn tifɛlɛgɛ ko ki yaa ki mu mbege pye paa kiribi kasɔn yinnɛ gbɔlɔ yɛn.