31
Mbele pè pe jigi wi taga
Ezhipiti tara ti na,
jɔlɔgɔ yɛn pe wogo
1 Leele mbele pe yɛn na kee wa Ezhipiti tara, mbe sa sagawa lagaja wa, jɔlɔgɔ yɛn pe wogo!
Poro mbele pe ma pe kɛɛ ki kan ma sere Ezhipiti tara shɔnye pe na,
ma pe jigi wi taga malaga gbɔnwotoroye pe lɛgɛwɛ pi na,
konaa ma pe jigi wi taga shɔn lugufɛnnɛ pe fanŋga ki na;
ɛɛn fɔ paa la wele Izirayɛli woolo Yɛnŋɛlɛ kpoyi lo yeri,
paa sila Yawe Yɛnŋɛlɛ li lagajaa.
2 Ma si yala lo fun, li yɛn ma jilige,
li ma jɔlɔgɔ wa lere na,
laa li yɔn sɛnrɛ ti kanŋga.
Li ma yiri lepeele pe gbogolomɔ pi kɔrɔgɔ,
li ma kambasinnde pyefɛnnɛ pe sagawa pi jɔgɔ.
3 Ezhipiti tara fɛnnɛ pe yɛn sɛnwee piile, pe woro Yɛnŋɛlɛ;
pe shɔnye pe yɛn yaayoro ko cɛ, pe woro Yɛnŋɛlɛ yinnɛ.
Na Yawe Yɛnŋɛlɛ li kali kɛɛ ki yirige,
ŋa wila sagawa piin, wi yaa kurugo,
ŋa pe yɛn na sari wi yaa to.
Pe ni fuun shyɛn pe yaa pinlɛ mbe tɔngɔ mbe kɔ ja.
Yɛnŋɛlɛ lo nuŋgba li yɛn
Zheruzalɛmu ca ki shɔfɔ
4 Yawe Yɛnŋɛlɛ lìgi yo na kan fɔ:
«Jara nakoma jara yirifɔnŋɔ wi maa kuunru wi kagboro ti go na yɛgɛ ŋga na,
ali na paga yaayoro kɔnrifɛnnɛ lɛgɛrɛ yeri wi na,
pe tinmɛ pila fyɛrɛ wa wi na,
pe lɛgɛwɛ pila wi sunndo wi kɔn wi na,
ki pyelɔmɔ nuŋgba pi na fun, Yawe Yɛnŋɛlɛ na yawa pi ni fuun fɔ, li yaa ka tigi
mbe pan mbe malaga gbɔn wa Siyɔn yanwiga ki na, konaa wa ki tinndi wi na.
5 Yɛgɛ ŋga na sannjɛlɛ li ma li kanwira ti sanga mari jaraga mali piile pe tɔn,
ki pyelɔmɔ nuŋgba pi na fun, Yawe Yɛnŋɛlɛ na yawa pi ni fuun fɔ li yaa kaa Zheruzalɛmu ca ki go singi mbege shɔ,
li yaa kaga go yirige mbege wɔ kala.»
6 Koni, yoro Izirayɛli woolo wele, Yɛnŋɛlɛ na yè yiri ma je li na pew, ye sɔngɔrɔ ye pan li kɔrɔgɔ.
7 Ko pilige ko ni, ye warifuwe yarisunndo, naa ye tɛ yarisunndo nda yè gbegele ye kapere kɛyɛn yi ni, ye ni fuun nuŋgba nuŋgba ye yaa kari wa.
8 «Tokobi wa yaa ka Asiri tara fɛnnɛ pe gbo, ŋa wi woro lere woo;
tokobi ŋa wi woro sɛnwee pyɔ woo, wo wi yaa ka pe tɔngɔ.
Pe yaa ka fe ki tokobi wi yɛgɛ mbe ta mbe shɔ.
Pe juguye pe yaa ka pe lefɔnmbɔlɔ pe yigi mbe kari pe ni kulowo tunndo ni.
9 Ŋa wi yɛn pe lenaŋa fanŋga fɔ jɛnŋɛ, wi yaa ka fe fyɛrɛ ti kala na;
pe maliŋgbɔɔnlɔ teele pe yaa ka fyɛ mbe fe mbe pe dirapo wi yaga.»
Yawe Yɛnŋɛlɛ lo lì yo ma,
lo na li kasɔn ki yɛn na yiin wa Siyɔn ca,
lo na li kasɔn gbɔgɔ ki yɛn wa Zheruzalɛmu ca.