54
Zheruzalɛmu ca ki yaa ka gbɔgɔwɔ ta naa
1 «Mboro ŋa jambasee, ta yɔgɔri!
Mboro ŋa ma fa pyɔ se mbe yan, ta nayinmɛ nii, maa yɔgɔrimɔ kɔŋgɔlɔ waa!
Katugu jɛlɛ ŋa pè wa,
wi piile pe yaa ka lɛgɛ mbe wɛ jɛlɛ ŋa wì pɔri naŋa yeri wi woolo pe na.
Yawe Yɛnŋɛlɛ lo lì yo ma.»
2 Ka taga ma paraga go ki gbemɛ pi na,
ma paraga go ki tɔnpaara ti sangala jɛŋgɛ maga gbɔgɔ,
maga kaa ki sɔnŋgɔ ko jate.
Ma ka taga ki pɔmanda ti titɔnlɔwɔ pi na,
ma ki kankanŋgagala ke kan ke yere tiyɔngɔ.
3 Katugu ma piile pe yaa ka lɛgɛ mbe jaraga mbe kari kɛɛ ki ni fuun ki na.
Ma setirige piile pe yaa ka cɛngɛlɛ sanŋgala ke tara ti shɔ ke yeri mberi ta,
mbe cɛn wa ma cara nda tì koro waga ti ni, mberi yin leele pe ni naa.
4 Maga ka fyɛ, katugu ma se ka fɛrɛ shɔ naa;
ma jatere wiga ka piri ma na, katugu pe se kɔɔn tifaga.
Fɛrɛ nda tìla ma ta ma sumborowo sanga wi ni, ma yaa ka fɛgɛ ti na;
tifagawa mba màa ta ma naŋgunjagara sanga wi ni, ma se ka nawa to pi na naa.
5 Katugu ma Dafɔ wo wi yaa pye ma nambɔrɔwɔ we;
wi mɛgɛ koyi ŋga «Yawe Yɛnŋɛlɛ na yawa pi ni fuun fɔ.»
Ma go shɔfɔ wo wi yɛn Izirayɛli woolo Yɛnŋɛlɛ kpoyi le;
li mɛgɛ koyi ŋga Tara ti ni fuun Yɛnŋɛlɛ.
6 Yawe Yɛnŋɛlɛ li yɛn nɔɔ yinri naa,
paa jɛlɛ yɛn ŋa wì pɔlɔ wi wa, a wi jatere wì piri wi na.
Yɛnŋɛlɛ lì yo fɔ: «Ma lefɔnrɔ sanga japɔrɔwɔ ma mbe ya mboo je mɛlɛ?
7 Mìla ma je wagati jɛnri ni ko cɛ;
ɛɛn fɔ na yinriwɛ tawa gbɔɔ pi kala na, mi yaa ma lɛ naa.
8 Wa na naŋgbanwa gbɔɔ pi ni ma ni,
mìla na yɛgɛ ki lara ma na wagati jɛnri ni;
ɛɛn fɔ wa na ndanlawa mba pi yɛn kɔsaga fu pi ni,
mi yaa kɔɔn yinriwɛ ta naa.»
Ma go shɔfɔ, Yawe Yɛnŋɛlɛ le, lo lì yo ma.
9 «Mi yaa ki pye paa yɛgɛ ŋga na mìla ki pye Nowe sanga wi ni.
Mìla wugu ma yo fɔ tɔnŋgbɔɔ po pa se pan mbe tara ti li naa, paa Nowe sanga woo pi yɛn.
Ki pyelɔmɔ nuŋgba pi na, mì wugu ki na fɔ mi se ka nawa ŋgban ma ni naa,
mi se ka yiri ma kɔrɔgɔ naa.
10 Ali na yanwira ti ka yiri wa ti yɔngɔlɔ ke ni,
ali na tinndiye paga tigile,
na kagbaraga pyege ma kan ki se wɔ wa ki yɔnlɔ li ni;
na yɛyinŋge yɔn finliwɛ mba mì le ma ni, pi se kanŋga.
Yawe Yɛnŋɛlɛ na li yɛn nɔɔ yinriwɛ taa lo lì yo ma.»
Zheruzalɛmu ca
ki yaa ka kanŋga fɔnŋgɔ
11 E, mboro ca ŋga ki yɛn na jɔlɔ, a tisaga tifɛlɛgɛ kɔ̀ɔn fige mɔɔ jan,
lere kpɛ wo sila ta mbɔɔn kotogo ki sogo ma na.
«Wele, sinndɛɛrɛ sɔnŋgbanga woro mi yaa tɛgɛ mbɔɔn kan,
mbɔɔn nɔgɔ ki le safiri sinndɛɛrɛ ni.
12 Mi yaa ma naayeri mboro ti wa mberi yirige urubisi sinndɛɛrɛ sɔnŋgbanga woro ni,
mbe ca ki mbogo yeyɔnrɔ ti gbegele ɛsikaribukili sinndɛɛrɛ sɔnŋgbanga woro ni,
mbe mboro nda ti ca ki maga maga fili ti wa sinndɛɛrɛ sɔnŋgbanga woro ni.
13 «Yawe Yɛnŋɛlɛ lo li yaa ka pye ma piile pe ni fuun pe nagafɔ,
ma piile pe yaa ka fɛrɛwɛ gbɔɔ ta.
14 Ma yaa ka yeresaga ta yɛyinŋge ki fanga na,
ma yaa ka shɔ leele pe jɔlɔgɔ ki kɛɛ;
ma se kaa fyɛ yaraga ko ka kpɛ yɛgɛ,
ma yaa ka shɔ sunndo kɔngɔ kagala ke kɛɛ,
sunndo kɔngɔ se ka gbɔn ma na naa.
15 Na lere wa ka yiri mbe to ma na malaga ni,
ko se ka yiri mi yeri;
lere o lere wi yaa ka yiri mbe yo wi yaa to ma na,
ki fɔ wi yaa to ma yɛgɛ sɔgɔwɔ.
16 Wele, fɛnlɛnaŋa wi ma naŋganra kasɔn ki fɛ
mbe maliŋgbɔnyaraga ka gbegele kala la mɛgɛ ni,
muwi mì wo da.
Ɛɛn fɔ jɔgɔwɔ pyefɔ ŋa wi ma ki maliŋgbɔnyaraga ki jɔgɔ, muwi mì wo fun wi da.
17 Maliŋgbɔnyaraga ŋga fuun pè gbegele ma mɛgɛ ni,
ko ka se ka ya yaraga ka kpɛ yɔn;
lere o lere ka yiri ma kɔrɔgɔ, mbe yo wi yaa kiti kɔn mboo jan ma na kiti kɔnsaga,
kiti wi yaa to ko fɔ wo na.»
Ko ki yaa pye Yawe Yɛnŋɛlɛ li tunmbyeele pe tasaga ye,
pa mi yaa tanga ki kan pe yeri yɛɛn;
Yawe Yɛnŋɛlɛ lo lì yo ma.