SƐWƐ WI KƆNSAGA TAANRI WOGO
56
56–66
Yɛnŋɛlɛ li shɛrigo gbɔgɔ ki yaa
ka pye cɛngɛlɛ ke ni fuun wogo
1 Pa Yawe Yɛnŋɛlɛ lì yo yɛɛn fɔ:
«Yaa tanri kaselege ki na,
ŋga kì sin yaa ko piin;
katugu shɔwɔ mba mi yaa ye shɔ pì gbɛrɛ pan,
na kasinŋge ki yaa ki yɛɛ naga wagati ŋa ni wì yɔngɔ.
2 Lere ŋa kaa tanri ŋga mìla yuun ki na,
sɛnwee pyɔ ŋa kaga yigi jɛŋgɛ, mbe koro mbaa tanri ki na,
mbaa cɛnpilige ki cɛɛn, wiga kaa ki jogo,
mbe kɛɛ wɔ kapege pyege cɛnlɛ pyew ki ni,
fɛrɛwɛ yɛn ki fɔ wi woo!»
3 Nambanŋa ŋa fuun ka mara Yawe Yɛnŋɛlɛ li na, wiga kaa ki jate mbe yo fɔ:
«Ki woro nala kɔɔn shyɛn, Yawe Yɛnŋɛlɛ li yaa na laga li woolo pe na!»
Naŋa ŋa pè san wiga ka yo fɔ: «E, mi wo yɛn paa tiwaga yɛn!»
4 Katugu Yawe Yɛnŋɛlɛ lì yo fɔ:
«Ki nambala mbele pè san, na pe kaa na cɛnpilige ki cɛɛn,
mbaa na nandanwa kala li piin,
mbe koro mbe mara na yɔn finliwɛ pi na,
5 pa mi yaa nandowo yaraga ka gbegele pe mɛgɛ ni,
mbe mɛgbɔgɔ kan pe yeri wa na shɛrigo gbɔgɔ ki ni, wa na go ki nawa,
mɛgɛ ŋga kì mbɔnrɔ ma wɛ pinambiile konaa sumborombiile na.
Mi yaa mɛgɛ kan pe yeri, ŋga ki yɛn kɔsaga fu,
mɛgɛ ŋga ki se ka kɔ mbe wɔ wa.»
6 Nambanmbala mbele pe yaa ka mara Yawe Yɛnŋɛlɛ li na,
mbaa tunŋgo piin li kan, Yawe Yɛnŋɛlɛ li mɛgɛ ki pe ndanla,
mbe pye li tunmbyeele,
mbele fuun pe yaa kaa cɛnpilige ki cɛɛn, pe se kaga jɔgɔ,
mbe koro mbe mara na yɔn finliwɛ pi na,
7 pa mi yaa kari pe ni wa na yanwiga kpoyi ki na,
mbe yɔgɔrimɔ kan pe yeri wa na yɛnrigo ki ni.
Pe saara sogoworo to naa pe yaayoro saara nda pe maa woo na yeri wa saraga wɔsaga ki na,
pa mi yaa yɛnlɛ ti na;
katugu na go pe yaa kaa ki yinri cɛngɛlɛ ke ni fuun ke Yɛnŋɛlɛ yɛnrigo.
8 We Fɔ, Yawe Yɛnŋɛlɛ na lì Izirayɛli woolo mbele pàa jaraga pe gbogolo,
lo lì yo ma fɔ: «Na woolo mbele mì gbogolo makɔ, mi yaa pele yɛgɛ gbogolo mbe taga wa pe na.»
Yɛnŋɛlɛ làa Izirayɛli tara teele
pe jɛrɛgi
9 Yoro yan woŋgaala ye ni fuun yaa paan,
yoro yanyaara nda fuun ti yɛn wa kɔlɔgɔ ki ni, yaa paan ye ka!
10 Izirayɛli tara kɔrɔsifɛnnɛ pe ni fuun pè pye fyɔɔnlɔ,
pee kala la kpɛ jɛn;
pe yɛn paa pyɔɔnlɔ bomboolo yɛn,
mbele pe se ya mbaa wɛli.
Pe ma sinlɛ na wɔnlɔ, na wɔɔnrɔ wɔnlɔ;
wɔnlɔwɔ po pi yɛn ma pe ndanla.
11 Pe yɛn paa pyɔɔnlɔ yɛn, mbele pe yɛn mafɛ ni, paa ka mbe tin;
pe yɛn simbaala kɔnrifɛnnɛ mbele pee kala la kɔrɔ jɛn.
Pe pe ni fuun pe yɛn na tanri pe yɛɛra koŋgolo koro na,
pe pe ni fuun pe yɛɛra tɔnli wo pe yɛn na lagajaa.
12 Pe ma yo fɔ:
«Ye pan we sa duvɛn lagaja we wɔ,
we sinmɛ wɛlɛwɛ wɔ we tin, pila we yɛrɛ ti kanŋgi;
goto we nuru wege pye ma naa,
katugu pi lɛgɛrɛ pi yɛn wa mbe wɔ.»