57
Yɛnŋɛlɛ làa li woolo pe jɛrɛgi
yarisunndo ta yɛgɛ wogo na
1 Lesinŋɛ wi ma ku,
ɛɛn fɔ lere kpɛ na laga wogo ki jate;
lejɛnŋɛ wi ma ku ma wɔ wa,
ɛɛn fɔ lere kpɛ naga kɔrɔ jɛn,
mbe yo fɔ lesinŋɛ wi ma ku mbe ta mbe shɔ jɔlɔgɔ ko kɛɛ.
2 Yɛyinŋge ki yaa ka sɔngɔrɔ mbe pan,
mbele pe yɛn na tanri wa kozinnɛ li ni,
pe yaa ka sinlɛ mbaa wogo yɛyinŋge na.
3 Ɛɛn fɔ yoro wo na, ye fulo laga,
yoro lekaajɔ piile wele,
yoro cɛnlɛ woolo mbele kɛɛnrɛ piile konaa nanjara piile.
4 Ye yɛn naga lakoo ambɔ na ma?
Ye yɛn na tɛgɛ ambɔ na ma, fɔ na ye ŋgayinnɛ li yinrigi nali waa?
Naga yɛn ma, ye woro leele mbele pe yiri ma je konaa yagboyoolo wi le?
5 Nanjara la ki ma yiri ye ni wa terebɛnti tire ti nɔgɔ
konaa wa tire nda fuun ti yɛn wɛtipiire ni ti nɔgɔ;
ye maa ye piile pe kɔnlɔgi na pe piin saraga,
wa yanwira laforo ti ni konaa wa waliwere ti ni.
6 Yanwira laforo sinndɛŋgɛlɛ ŋgele kè wɔlɔgɔ, koro ye pye yarisunndo nda ye maa gbogo;
koro yè pye ye yaritara re.
Duvɛn saraga ŋga pe ma wo, pa ye maa ki woo ki sinndɛŋgɛlɛ ke yeri,
na ye yarilire saraga sogoworo ti woo ke yeri.
Naga yɛn ma, mi ŋa Yɛnŋɛlɛ, mbaa yarisunndo ti gbogo ki mbe ya mbanla kotogo ki sogo mɛlɛ na na?
7 Ye ma saa ye sinlɛyaraga ki gbɛgɛlɛ yanwiga ŋga kì yaraga ka go na kalikalawa pi mɛgɛ ni;
ye ma lugu wa ti go na, ma saa na ye saara ti woo wa fun.
8 Ye ma ye yarisunndo nandowo woro ti yanŋga wa kɔɔrɔ ti puŋgo na,
konaa wa yeyɔnrɔ kɔɔrɔ tire ti na.
Yè lara na na, ma ye yɛɛ pagala,
ma lugu wa ye sinlɛyaraga ki na,
ma ye yarisinlɛgɛ ki pyɛɛlɛ.
Ye yɛn na kɛɛnlɛ jaa ye yɛɛ kan,
poro mbele ki yɛn ma ye ndanla yaa sinlɛlɛ pe ni,
yaa pe witiwaga ki wele.
9 Ye ma tangala tanga ma kari wa wunluŋgbɔɔ wi yeri;
ye ma saa wi gbɔgɔ sinmɛ nuwɔ taan ni.
Yè pitunmbolo torogo fɔ wa lege,
yège pye ma, ma tigi ma kari fɔ wa kuulo tara.
10 Yè tanga fɔ ma saa te,
ɛɛn fɔ ye fa sho fɔ: «Ki yɛn go fu kala.»
Yè fanŋga le ye yɛɛ ni naa,
kì pye ma, ye fanŋga kii kɔ.
11 «Kì pye ma, yaa fyɛ ambɔ yɛgɛ?
Ambɔ wila fyɛrɛ waa ye na, fɔ a yànla java,
ma ye jatere wi laga na na,
mala kala li wɔ wa ye kotogo na?
Naga yɛn ma, naa mì pyeri maga lɛ wa wagati titɔnlɔwɔ ni, ko kì ti wi le?
Naga yɛn ma, ko kì ti ye woro na fyɛ na yɛgɛ wi le?
12 Koni, mi yaa ye kasinŋge konaa ye kapyegele ke yirige funwa na;
ɛɛn fɔ ki kagala ke se yaraga ka yɔn ye kan.
13 Na yaga kaa gbele mbaa sagafɔ jaa sanga ŋa ni,
kona ye yarisunndo lɛgɛrɛ ti yiri ti ye shɔ!
Tifɛlɛgɛ kayi ki yaa ka ti ni fuun ti lɛ mbe kari ti ni,
tifɛlɛgɛ kayi ki yaa kari pɛ mbe kari ti ni.
Ɛɛn fɔ lere ŋa kaa yɛɛ karafa na na,
wo yaa tara ti ta kɔrɔgɔ,
na yanwiga kpoyi ki yaa ka pye wi wogo.»
Yɛnŋɛlɛ li yaa kali woolo
pe yinriwɛ ta
14 We Fɔ wì yo fɔ:
«Ye konɔ li wɔ, ye konɔ li wɔ, yeli yɛngɛ,
ye kurugosara ti ni fuun ti wɔ wa na woolo pe konɔ li ni.»
15 Katugu Yɛnŋɛlɛ na yaara ti ni fuun ti go na,
lo na li cɛnsaga ki yɛn kɔsaga fu wogo,
lo na li mɛgɛ ki yɛn kpoyi, lì yo fɔ:
«Mi yɛn ma cɛn wa naayeri lara to naa laga kpoyi ki ni;
ɛɛn fɔ mi yɛn mbele pe yɛn tege na pe ni konaa mbele pè pe yɛɛ go sogo pe ni,
jaŋgo mbe mbele pè pe yɛɛ go sogo pe yirige,
mbe mbele pe yɛn tege na pe yirige.
16 Mi se koro mbaa leele pe jɛrɛgi sanga pyew;
nakoma mbe nawa ŋgban pe ni sanga wi ni fuun ni;
na ko ka pye, sɛnwee piile mbele mì da,
pe jɛn na pe yinwege wɔnwɔn pi la, mbe ku mbe wɔ wa na yɛgɛ sɔgɔwɔ.
17 «Izirayɛli woolo pe yɛgɛ mbatinwɛ tipewe pi kala na,
mìla nawa ŋgban pe ni, ma jɔlɔgɔ wa pe na;
na naŋgbanwa gbɔɔ pi na, mìla na yɛɛ lara pe na.
Konaa ki ni fuun, pàa koro mbalogombolo, na kee wa pe yɛɛra nawa jatere koŋgolo koro ni.
18 Mì pe tangalɔmɔ pi yan,
ɛɛn fɔ konaa ki ni fuun, mi yaa ka pe sagala;
mi yaa ka keli pe yɛgɛ
mbe pe kotogo ki sogo pe na;
mbe pinlɛ pe woolo mbele pe yɛn yɛsanga ni pe ni.
19 Mi yaa ka sɔnmɔ yuuro le wa pe yɔn paa koo.
Yɛyinŋge naa yɛyinŋge mbe pye ŋa wi yɛn wa lege wi wogo, konaa ŋa wi yɛn tɔɔn wi wogo!
Mi yaa ka pe sagala.
Yawe Yɛnŋɛlɛ lo lì yo ma.»
20 Ɛɛn fɔ lepeele poro yɛn paa kɔgɔje tɔnmɔ mba pi maa yinrigi na tuun pi yɛn,
mba pi se ya sinlɛ yɛw.
Pi maa fɛnrɛgɛ konaa kayangara ti yinrigi.
21 «Lepeele pe se yɛyinŋge ta fyew.»
Na Yɛnŋɛlɛ lo lì yo ma.