17
1 Ma yaakara wara jɛnri ta ma ka yɛyinŋge na,
ko mbɔnrɔ go kì yin kara ni maa kaa, mbe sigi ta maara yɛn wa ki ni ko na.
2 Kulo ŋa wi yɛn tijinliwɛ fɔ wi yaa ka cɛn wi tafɔ wi pinambyɔ lejaga wi go na;
wi yaa ka wi tasaga ta wa wi tafɔ wi pinambiile sanmbala pe kɔrɔgɔ ki ni.
3 Pe ma warifuwe wi yan wa fugufugu kasɔn ki ni, mbe tɛ wi yan wa yira kasɔn ki ni mberi pye kpoyi,
ki pyelɔmɔ nuŋgba fun, Yawe Yɛnŋɛlɛ lo li ma sɛnwee wi sunndo wi cancan mbe wele, mboo tiyɔnwɔ pi jɛn.
4 Kapege pyefɔ wo wi maa nuru sɛnpere yofɔ wi yeri;
yagbogolo fɔ wo wi ma nuŋgbolo jan sɛnjagara yofɔ wi yeri.
5 Lere ŋa wi maa tɛgɛ fyɔnwɔ fɔ wi na, wi dafɔ wo ki fɔ wi maa tifaga;
lere ŋa wi maa yɔgɔri lere wa jɔlɔgɔ wogo na, Yɛnŋɛlɛ li se ka ki fɔ wi yaga mbajɔlɔwɔ.
6 Pishyɛnwoolo pe yɛn paa wunluwɔ njagala yɛn lelɛŋgbaŋgala ke kan;
piile pe gbɔgɔwɔ po pi yɛn pe sevɛnnɛ wele.
7 Sɛnjɛndɛ ti woro ma yala wa lembige ki yɔn;
ki pyelɔmɔ nuŋgba pi na fun, yagbolo mbe yiri wa yɛkelewe wi yɔn kì tijanga ma wɛ.
8 Yarikanra nda ti ma kan larawa, ti yɛn paa sinndɛlɛgɛ sɔnŋgbanga wogo yɛn ti kanfɛnnɛ pe yɛgɛ na;
pe maa ki jate ma yo ti kanwa pi kala na, paga kɛɛ le kala o kala ni, li yaa yɔn.
9 Lere ŋa wi ma kajɔɔgɔ ŋga kì pye wi na ki kala yaga, wi maa ki jaa ndanlawa mbe pye pe sɔgɔwɔ;
ɛɛn fɔ, ŋa wi ma koro na kajɔɔgɔ ŋga kì pye ki sɛnrɛ yuun suyi, wi ma wɛnnɛ jɛmbɛlɛ kɔn pe yɛɛ na.
10 Lere ŋa wì jilige mboo jɛrɛgi, ki ma ye wi ni,
ma wɛ pe lembige gbɔn gbatorogo yɛnlɛ cɛnmɛ ni ki na.
11 Lepee wi maa ŋga jaa ko yɛn mbe yiri mbe je;
ɛɛn fɔ pitunŋɔ ŋa wila lere yinriwɛ ta, pe yaa ka wa torogo wa wi yeri.
12 Cɛngɛ urusi ŋga ki piile pè wɔ ki kɛɛ, a kì jangari, mbe sa fili ko ka ni,
ki mbɔnrɔ ma sa fili lembige ka ni, ŋga ki yɛn naga lembigewe kapyere piin ko na.
13 Lere ŋa wi ma kajɛŋgɛ ki fɔgɔ tɔn tipege ni,
tipege ki se kɔ wa ki fɔ wi go ki ni.
14 Mbe malaga kɔn ki yɛn paa yɛgɛ ŋga na ma ma kaa lasulugo yɛngɛ we;
sanni maara ti sa yiri ti ŋgban, ma yɛɛ wɔ wa ti ni.
15 Lere ŋa wi ma tanga kan lepee wi yeri, konaa ŋa wi ma lesinŋɛ wi le jɔlɔgɔ,
pe ni fuun shyɛn pe kala li yɛn ma tijanga Yawe Yɛnŋɛlɛ li yɛgɛ na.
16 Mbe penjara le lembige ki kɛɛ ki sa kajɛnmɛ lɔ,
ko yaa yiŋgi yɔn ki kan? Mà jɛn tijinliwɛ woro ki ni.
17 Wɛnnɛ pe ma pye ma pe yɛɛ ndanla wagati pyew,
nɔsepyɔ wo ma pye le mbɔɔn saga jorowo sanga ni.
18 Tijinliwɛ fu fɔ wo wi ma yɔn kan,
mbe yere wi lewee yɛnlɛ wa fɔgɔ ni mbege tɔn.
19 Lere ŋa maara yɛn maa ndanla, kapege ko ki yɛn maa ndanla;
lere ŋa wi maa wi yɛɛ nari, wi maa wi yɛɛ jɔgɔsaga jaa.
20 Lere ŋa wi nawa pi woro ma filige wi na, wi se fɛrɛwɛ ta;
lere ŋa wi yɔn kì pe wi na, jɔlɔgɔ yaa to wi na.
21 Lere ŋa wi ma lembige ki se, wi wogo yɛn jatere piriwɛn;
kambajɛnŋɛ wi to wila ya mbaa yɔgɔri.
22 Nayinmɛ pi maa yambagawa kaan;
ɛɛn fɔ jatere piriwɛn pi ma lere fanŋga kɔ.
23 Lepee wi ma yarikanra nambara woro shɔ larawa,
mbe kiti wi kɔn mbe tɔn ŋga ki yɛn ma sin ki na.
24 Tijinliwɛ fɔ wila puŋgo kajɛnmɛ po na;
ɛɛn fɔ lembige ki yɛngɛlɛ ke ma pye yaara nda ki se ya ta to na.
25 Pyɔ ŋa wi yɛn lembige, wi maa to wi nawa pi tanga wi na;
mboo nɔ wi jatere wi piri wi na.
26 Ki woro ma yɔn pe wɔnɔ wa lesinŋɛ wa na;
ki woro ma yala fun pe fanŋga fɔ wi gbɔn wi kasinŋge pyewe pi kala na.
27 Lere ŋa wi maa wi sɛnyoro ti kɔrɔsi, wo yɛn ma kala jɛn;
lere ŋa wùu yɛɛ yingiwɛ jɛn, wo yɛn tijinliwɛ fɔ.
28 Ali yɛrɛ tijinliwɛ fu fɔ, na wi ka pyeri, pe maa ki jate ndɛɛ wi yɛn kajɛnŋɛ;
na wi kaa yɔn ki tɔn, pe maga yan ndɛɛ wi yɛn tijinliwɛ fɔ.