18
1 Lere ŋa wi maa cɛɛn wi yɛ, wi yɛɛra tɔnli wo wi maa jaa;
paga yo pe yaa wi saga jatere jɛnŋɛ ni, wi ma nawa ŋgban.
2 Ŋga ki yɛn ma lembige ki ndanla ko ma ki yɛn tijinliwɛ we;
ɛɛn fɔ mboo yɛɛra nawa kala li naga, ko ki yɛn maa ndanla.
3 Tipewe pi maa paan letifagawa ni;
mbe yɛɛ tifaga ki maa paan fɛrɛ ni.
4 Sɛnwee wi yɔn sɛnrɛ ti yɛn ma jugo paa kɔgɔje yɛn;
ti yɛn paa lafogo yɛn ŋga kì yin ma jaraga, ti maa kajɛnmɛ kaan.
5 Ki woro ma yɔn pe gbogolo lepee wi ni, pe tanga ki kan wi yeri;
mbe si kiti kɔn mbe tanga ki shɔ lesinŋɛ wi yeri, ki woro ma yɔn.
6 Lembige ki sɛnyoro ti maa maara kɔɔn;
ki yɔn sɛnrɛ ti ma kaa wi kan pe maa gbɔn.
7 Lembige ki sɛnyoro ti maga jɔgɔ,
ki yɛɛra yɔn sɛnrɛ ti maga yigi paa pɛnɛ yɛn.
8 Leele sangafɔ wi sɛnrɛ ti yɛn paa sutanra yɛn,
ti ma ye ma gbɔn fɔ wa sɛnwee wi sunndo wi na.
9 Lere ŋa wi maa tiyanra piin wa wi tunŋgo ki ni,
wo naa jɔgɔwɔ pyefɔ wi ni pe ni fuun pe yɛn nuŋgba.
10 Yawe Yɛnŋɛlɛ li yɛn paa malaga sigesanŋgazo yɛn,
lesinŋɛ wi ma fe ma saa lara wa mbe shɔ.
11 Penjagbɔrɔ fɔ wi penjara ti yɛn wi yeri paa malaga sigeca yɛn;
wi maa ki jate ndɛɛ malaga sigembogo yi, ŋga ki maa wi go singi yaraga pyew ki na.
12 Yɛɛ gbɔgɔwɔ pi ka pan wa sɛnwee wi kotogo na, ki puŋgo kala li yɛn jɔgɔwɔ;
ɛɛn fɔ mbe yɛɛ tirige, ki puŋgo kala li yɛn gbɔgɔwɔ.
13 Lere ŋa wi ma yɔn sogowo kan sɛnrɛ na, na wi fari logo mbe wali ti na, ki fɔ wi yɛn tijinliwɛ fu fɔ,
fɛrɛ ti yɛn wi woro.
14 Sɛnwee wi jatere wi ka pye mbe cɛn wi na, ki maga kan wi ma ya yama pi ni;
ɛɛn fɔ jatere wi ka piri wi na, ambɔ wi yaa fanŋga kan wi yeri?
15 Lere ŋa wì jilige wi ma yɛnlɛ mbe jɛnmɛ ta,
kajɛnmbɛlɛ pe maa nagawa sɛnjɛndɛ jaa mbe logo.
16 Yarikanra ti ma konɔ kan sɛnwee wi yeri,
mbe ti wi ya wila gbɔɔn legbɔɔlɔ pe na.
17 Lere ŋa wi ma keli ma wi kiti kɔnkala li yɛgɛ yo, pe maga yan ndɛɛ wo wogo ko ki tanla;
ɛɛn fɔ na wi maliwee wi ka ka pan mboo woyoro ti yo, pe mɛɛ ti sɛgɛsɛgɛ mbe sa yiri wa.
18 Mbe pɛtɛ gbɔn mbe kaselege ki jɛn, ki ma malaga kɔ,
mbe kala la kɔn mbe tɛgɛ fanŋga fɛnnɛ pe sɔgɔwɔ.
19 Sefɔ ŋa pè ye wi tɛgɛ, mbe fulo wi tanla kì ŋgban ma wɛ, ma sa to malaga sigeca na maga shɔ ko na;
malaga ki kɔwɔ pì ŋgban ma wɛ mbe wunluwɔ go ki sɔgɔyaara ti kaari ko na.
20 Sɛnwee wi maa wi yɔn suro ti taa wi yɔn sɛnrɛ to fanŋga na;
wi yɔn sɛnyoro ti fanŋga na, wi maa kaa na tinni.
21 Sɛnwee wi sɛnyoro ti mbe ya ti wi kunwɔ ta nakoma wi yinwege ta,
yogo ki ka lere ŋa ndanla, wi ma kaa ki tɔnli wi ta.
22 Lere ŋa wì jɛlɛ ta ma pɔri, fɛrɛwɛ yɛn wi woo;
kagbaraga Yawe Yɛnŋɛlɛ lì pye ki fɔ wi kan.
23 Fyɔnwɔ fɔ wi maa para go sogowo ni,
ɛɛn fɔ penjagbɔrɔ fɔ wi maa yɔn sogo sɛnŋgbanra ni.
24 Wɛnnɛ lɛgɛrɛ ka pye lere ŋa yeri, wi mbe ya jɔlɔgɔ ta,
ɛɛn fɔ wɔnlɔ ŋgbarawa wi ma mara ma na ma wɛ nɔsepyɔ na.