11
Yɛnŋɛlɛ lo li yɛn larasaga jɛŋgɛ ye
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo.
Pa mìlan yɛɛ karafa Yawe Yɛnŋɛlɛ lo na.
Mɛlɛ, a ye nɛɛ ki yuun na kan fɔ:
«Yiri ma fe paa sannjɛlɛ yɛn, ma kari wa yanwira ti na (mbe sa lara)?»
2 Wele, lepeele pe yɛn na pe sandira ti tilele,
pè pe wangala ke taga sandira ti na na taanla,
jaŋgo mbe leele mbele pe yɛn sinmbele wa pe kotogo na pe wɔn wa wɔwɔ pi ni.
3 Na kagala ke nɔgɔ lɛsara to ka piri,
yiŋgi lesinŋɛ wo mbe ya pye naa?
4 Yawe Yɛnŋɛlɛ li yɛn wa li shɛrigo gbɔgɔkpoyi ki ni,
li wunluwɔ jɔngɔ ki yɛn wa yɛnŋɛlɛ na;
li yɛgɛ yɛn sɛnwee piile pe na,
li maa pe kagala ke cancan.
5 Yawe Yɛnŋɛlɛ li maa lesinŋɛ wo naa lepee wi ni pe kagala ke cancan,
ɛɛn fɔ lewɛlɛwɛ kapyere ti yɛn ma lere ŋa ndanla, wi kala li yɛn mali mbɛn.
6 Li yaa kasɔn naŋganra konaa kiribi kasɔn wo lepeele pe na,
tifɛlɛgɛ ŋga ki ma wɛri, ka yaa gbɔn pe na;
ko ki yɛn pe tasaga ye.
7 Ee, Yawe Yɛnŋɛlɛ li yɛn ma sin, kasinŋge ko ki yɛn mali ndanla;
lesinmbele poro pe yaa kali yan gbɔgɔyi.