12
Mbe Yɛnŋɛlɛ li yɛnri lɔɔn saga
1 Yurukɔɔlɔ to wi sɛwɛ yurugo, ŋga pe maa koo na ŋgɔni maŋgala kɔlɔtaanri woo gbɔɔn. Davidi Yɛnŋɛlɛ gbɔgɔyurugo.
2 Yawe Yɛnŋɛlɛ, ki yaga ma we shɔ,
katugu leele mbele pe maa fyɛ Yɛnŋɛlɛ yɛgɛ pè kɔ!
Leele mbele pe yɛn tagawa ni pe yɛn na koo sɛnwee piile pe sɔgɔwɔ.
3 Pe ni fuun nuŋgba nuŋgba pe maa yagbogolo finlɛlɛ na pe yɛɛ kaan,
pe maa yɔn tangawa sɛnrɛ yuun na yɛɛ fanla,
paa pe nawa pi filige pe yɛɛ kan.
4 Yawe Yɛnŋɛlɛ, mbele fuun pe maa yɔn tangawa sɛnrɛ yuun na leele fanla, pe tɔngɔ ma pe wɔ wa;
mbele fuun pe maa yɛɛ gbɔgɔwɔ sɛnrɛ yuun, pe tɔngɔ ma pe wɔ wa,
5 konaa mbele pe yɛn na yuun fɔ:
«Wè yawa ta we yɔn sɛnrɛ to fanŋga na,
wè sɛnrɛ jɛn,
ambɔ wi mbe ya cɛn we go na?»
6 Ɛɛn fɔ Yawe Yɛnŋɛlɛ lì yo fɔ:
«Kì kaa pye pe yɛn na fyɔnwɔ fɛnnɛ pe jɔlɔ,
mbele pe yɛn yuŋgbɔgɔrɔ ni pe yɛn na jɛɛn,
koni mi yaa yiri mbe pe shɔ, poro mbele pe yɛn na jɔlɔ we.»
7 Yawe Yɛnŋɛlɛ li sɛnrɛ ti yɛn ma filige,
ti yɛn paa warifuwe yɛn, ŋa pè yan fugufugu kasɔn ni maa pye kpoyi fɔ ma saa ta yansaga kɔlɔshyɛn.
8 Mboro wo na, Yawe Yɛnŋɛlɛ, ta we go singi!
Maa we kɔrɔsi ki leele cɛnlɛ pe na fɔ sanga pyew!
9 Lepeele pe yɛn na yanri na mari lagapyew;
jɔgɔwɔ pi yɛn na kee yɛgɛ sɛnwee piile pe sɔgɔwɔ.