138
Lere pyew wi daga
mbaa Yɛnŋɛlɛ li sɔnni
wi nawa pi ni fuun pi ni
1 Davidi Yɛnŋɛlɛ gbɔgɔyurugo.
Yawe Yɛnŋɛlɛ mi yɛn nɔɔ shari nɔɔ sɔnni na kotogo ki ni fuun ki ni,
mi yaa la yuuro koo mbaa ma sɔnni mɛrɛgɛye pe yɛgɛ sɔgɔwɔ.
2 Mi yaa fɔli mbe yɛgɛ wa wa ma shɛrigo gbɔgɔkpoyi ki yeri mbɔɔn gbɔgɔ,
mi yɛn nɔɔ shari nɔɔ sɔnni ma kagbaraga konaa ma yɛn sɛnrɛ nuŋgba yofɔ yɛgɛ ŋga na ki kala na;
katugu ŋga mà pye, kì wɛ ŋga mà yɔn fɔlɔ kɔn mbe pye ki na,
ma wɛ ŋga waa singi ma yeri ki na.
3 Pilige ŋga ni mìla ma yeri mala saga, màa na yɔn sogo;
màa kotogo le na ni, ma fanŋga kan na yeri.
4 Yawe Yɛnŋɛlɛ, tara na wunlumbolo pe yaa lɔɔn sɔnni,
na paga ma yɔn sɛnyoro ti logo we!
5 Pe yaa la Yawe Yɛnŋɛlɛ li kapyegele ke koo yuuro,
katugu Yawe Yɛnŋɛlɛ li gbɔgɔwɔ yanwa pì gbɔgɔ.
6 Yawe Yɛnŋɛlɛ li yɛn wa naayeri, ɛɛn fɔ li yɛgɛ yɛn leele mbele pè pe yɛɛ tirige pe na;
leele mbele pe maa pe yɛɛ gbogo, li ma koro wa lege ma pe jɛn.
7 Ali na mi ka pye wa jɔlɔgɔ ki ni, ma mala shɔ,
ma mɔɔ kɛɛ ki sanga mbanla shɔ na juguye pe naŋgbanwa pi kɛɛ,
ma mala shɔ ma fanŋga kɛɛ ki ni.
8 Yawe Yɛnŋɛlɛ, li yaa kala li ni fuun li pye mbeli yɔn fili na kan.
Yawe Yɛnŋɛlɛ, ma kagbaraga ki yɛn kɔsaga fu!
Ma yɛɛra kɛɛ tunŋgo maga kaga wa!