139
Yɛnŋɛlɛ lì sɛnwee
wi nawa kala li ni fuun li jɛn
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo.
Yawe Yɛnŋɛlɛ, màla jatere wi cancan ma wele,
mala nawa kala li jɛn.
2 Ma mala cɛnsanga naa na yirisanga wi jɛn,
mbɔɔn ta wa lege màla jatere wi jɛn.
3 Na mi kaa tanri konaa na mi ka sinlɛ, ma maga jɛn,
màla kala pyew li jɛn.
4 Katugu Yawe Yɛnŋɛlɛ, sanni sɛnpyɔ mbe sa yiri wa na yɔn,
ki ma yala sɛnrɛ nda mi yaa yo, mboro to ti ni fuun to jɛn makɔ.
5 Ma yɛn na puŋgo na, ma yɛn na yɛgɛ,
mɔɔ kɛɛ ki taga na na nala go singi.
6 Ki jɛnmɛ mba màla jɛn pi yɛn kagbɔgɔ ma toro na jatere wi na,
pì toro na kagala kɔrɔ jɛnmɛ pi na pew.
7 Mbe ya kari se mbe lali ma ni?
Mbe ya fe mbe kari se, na ma woro nala yaan?
8 Na mi ka lugu mbe kari wa naayeri, ma yɛn wa;
na mi ka tigi mbe kari wa kuulo tara, ma yɛn wa.
9 Na mi ka yiri sire na mbe kari fɔ wa yɔnlɔ yirisaga ki kɔsaga ki na,
mbe sa cɛn fɔ wa kɔgɔje wi kɔsaga ki na, wa yɔnlɔ tosaga kɛɛ yeri,
10 ali mbanla ta wa ki laga ki na, ma yaa nala yɛgɛ sinni ma kɛɛ ki ni,
ma fanŋga kɛɛ ki sanla wa fyew.
11 Na mi ka yo fɔ diwi wi ye wilan tɔn,
kona yembinɛ li ma kanŋga yɛrɛ ma pye yɔnlɔ yanwa mala maga.
12 Ali yɛrɛ diwi wila ya pye diwi ma yɛgɛ na;
yembinɛ li maa yanwa yinrigi paa yɔnlɔ yɛn,
diwi wi yɛn paa yanwa yɛn ma yɛgɛ na.
13 Mboro màla nawa lagapyew ki da,
mboro màla gbegele mala sogolo na yɛɛ na wa na nɔ lara.
14 Mi yɛn nɔɔ shari nɔɔ sɔnni, katugu màla da mala pye yarigbɔgɔ kafɔnnɔ wogo,
yaara nda fuun mà da ti yɛn yarijɛndɛ tiyɔnrɔ;
mi jate mìgi jɛn ma wali ki na.
15 Na witige laga ka kpɛ woro ma lara ma na,
sanga ŋa ni màa pye nala wire ti gbegele wa larawa we,
sanga ŋa ni màa na witige lara ti sogolo ti yɛɛ na wa na nɔ lara we.
16 Ali sanga ŋa ni na wire ti fa gbegele mbe kɔ, màa pye nala yaan.
Piliye yɔn ŋga kìla kɔn ma tɛgɛ na kan,
kìla yɔnlɔgɔ makɔ wa ma sɛwɛ wi ni,
ma si yala, ki piliye ka kpɛ fa gbɔn gbɛn.
17 E, Yɛnŋɛlɛ, ma sɔnrimɔ kagala ke kɔrɔ jɛnmɛ pi yɛn ma ŋgban na yeri,
ke yɔn ki se ya jɛn mbe kɔ.
18 Na mi ka yo mi yaa ke jiri,
kè lɛgɛ ma wɛ kɔgɔje yɔn taambugɔ ki na.
Na mi ka yɛn sanga o sanga,
mi naa mboro we ma pye we yɛɛ ni bere.
19 E, Yɛnŋɛlɛ, ndɛɛ ki pye ma mbe ja yɛnlɛ mbe lepee wi gbo, ki mbe jaga jɛn!
Yoro legboleele, ye ye yɛɛ laga lali na ni!
20 Pe maa para ma kanŋgɔlɔ tipege ni,
pe maa ma mɛgɛ ki yinri mbe ta mbaa finlɛlɛ, ma winfɛnnɛ wele.
21 Yawe Yɛnŋɛlɛ, ma yɛn ma mbele mbɛn pe yɛn mala mbɛn;
mbele pè yiri ma kɔrɔgɔ, pe kala li yɛn mala mbɛn.
22 Pànla mbɛn fɔ jɛŋgɛ,
pè pye mi jate na juguye.
23 E, Yɛnŋɛlɛ, na cancan ma wele, mala jatere wi jɛn,
mala wa ma wele mala nawa kagala ke jɛn.
24 Ki wele, na kaa pye mi yɛn kombele ni,
mala yɛgɛ sin wa ma konɔ na li yɛn kɔsaga fu li ni!