142
Lere ŋa paa jɔlɔ,
Yɛnŋɛlɛ lo li yɛn wi larasaga ye
1 Davidi nagawa yurugo, sanga ŋa ni wìla pye ma lara wa waliwege ki ni. Yɛnŋɛlɛ yɛnrɛwɛ.
2 Mi yɛn na gbele ŋgbanga na Yawe Yɛnŋɛlɛ li yinri lilan saga,
mìlan magala li yirige na Yawe Yɛnŋɛlɛ li yɛnrɛwɛ gbɔɔ yɛnri.
3 Mi yɛn nala nawa kala li yɛgɛ yuun li kan,
mi yɛn nala jɔlɔgɔ kagala ke yɛgɛ nari li na.
4 Na na jatere wi ka piri na na, mboro ma mala torosaga ki jɛn;
pè mɛrɛ jan na na wa konɔ na mì lɛ na kee li ni.
5 Wele mala maga,
ma yaa ki yan fɔ lere woro wa, ŋa wi yɛn na nawa tuun na na;
larasaga si koro na yeri,
na kala lii lere kpɛ jori.
6 Yawe Yɛnŋɛlɛ, mboro mi yɛn na gbele na yinri, mì yo fɔ: «Mboro ma yɛn na larasaga ye;
mboro ma yɛn na tasaga ye, laga ki dunruya ŋa sɛnweele pe yɛn laga wi ni.»
7 Nuŋgbolo jan mala yɛnrɛwɛ gbelege ki logo, katugu mi yɛn tege na fɔ jɛŋgɛ!
Na shɔ mbele paa na puro pe kɛɛ, katugu pe fanŋga kì wɛ na wogo ki na.
8 Na shɔ mala wɔ wa kaso wi ni, jaŋgo mbaa ma shari mbaa ma sɔnni!
Lesinmbele pe yaa ka pan mbanla maga, katugu mà kajɛŋgɛ pye na kan.