143
Yɛnŋɛlɛ, maga ka kiti kɔn na na
1 Davidi Yɛnŋɛlɛ gbɔgɔyurugo.
Yawe Yɛnŋɛlɛ, na yɛnrɛwɛ pi logo,
nuŋgbolo jan mala yɛnrɛwɛ gbɔɔ pi logo!
Na yɔn sogo, naa ma yɛn sɛnrɛ nuŋgba yofɔ konaa ma pye sinŋɛ ki kala na!
2 Mi ŋa ma tunmbyee, maga ka ti kiti kɔnkala mbe ye mi naa mboro we sɔgɔwɔ,
katugu sɛnwee wo wa woro wa, ŋa wi yɛn sinŋɛ ma yɛgɛ na.
3 Na jugu wì taga na na nala jɔlɔ,
wìlan jan tara nala tunrugu makɔ,
wìlan wa wa diwi gbɔlɔ li ni,
paa yɛgɛ ŋga na mbele pè ku maga lɛ wa faa pe yɛn.
4 Na jatere wì piri na na,
na jigi wì kɔn na na pew.
5 Mi yɛn na nawa tuun wagati ŋa wì toro wa faa wi na,
mi yɛn na jatere piin ma kapyegele ke ni fuun ke na,
mi yɛn na sɔnri ma kɛɛ tunndo ti na.
6 Mìlan kɛyɛn yi yirige ma wa wa ma yeri na yɛnri,
ma la kìlan yigi paa yɛgɛ ŋga na tɔnmɔ kala ma pye tawara na we.
Wɔnmatigiwɛn laga.
7 Yawe Yɛnŋɛlɛ, fyɛɛlɛ mala yɔn sogo,
tɔtɔgɔtɔ wo si koro na ni naa!
Maga kɔɔn yɛɛ lara na na,
nakoma mi yaa pye paa mbele pe ma tigi wa fanga pe yɛn.
8 Pinliwɛ ni, ma ti mbɔɔn kagbaraga ki yan,
katugu mìlan jigi wi taga ma na!
Konɔ na mi daga mbaa tanri li na, li naga na na,
katugu mboro mi yɛn na wele ma yeri!
9 Yawe Yɛnŋɛlɛ, na shɔ mala wɔ wa na juguye pe kɛɛ!
Mi yɛn nala yɛɛ lara le ma tanla!
10 Na kara mbaa ma nandanwa kala li piin,
katugu mboro ma yɛn na Yɛnŋɛlɛ le!
Ki yaga ma yinnɛ jɛnnɛ laa na yɛgɛ sinni wa konɔ na li yɛn ma yɔn yala li ni!
11 Yawe Yɛnŋɛlɛ, ki yaga ma yinwege kan na yeri ma mɛgɛ ko kala na;
naa ma yɛn sinŋɛ ki kala na, na tile mala wɔ wa na jɔlɔgɔ ki ni!
12 Ma kagbaraga ki kala na, ma yaa na juguye pe kɔ mbe pe wɔ wa,
mbanla winfɛnnɛ pe ni fuun pe tɔngɔ mbe pe wɔ wa,
katugu mi yɛn ma tunmbyee.