82
Yɛnŋɛlɛ li yɛn na kiti kɔɔn
dunruya kiti kɔnfɛnnɛ pe na
1 Asafu Yɛnŋɛlɛ gbɔgɔyurugo.
Yɛnŋɛlɛ li yɛn ma cɛn wa li kiti kɔnfɛnnɛ janwa wi sɔgɔwɔ,
li yɛn na kiti wi kɔɔn wa yɛngɛŋgɛlɛ sanŋgala ke sɔgɔwɔ.
2 Lì yo fɔ: «Naga yɛn ma, ye yaa koro mbaa kiti mbasinŋɛ kɔɔn,
mbaa tanga ki kaan lepeele pe yeri fɔ sa gbɔn wagati wiwiin?
Wɔnmatigiwɛn laga.
3 Yaa mbele pe yɛn tege ni poro naa pijiriwele pe tanga ki kaan pe yeri,
yaa fyɔnwɔ fɛnnɛ poro naa yuŋgbɔgɔrɔ fɛnnɛ pe kiti wi kɔɔn kasinŋge ni.
4 Yaa mbele pe yɛn tege ni poro naa fyɔnwɔ fɛnnɛ pe shoo,
yaa pe shoo lepeele pe kɛɛ.
5 «Ɛɛn fɔ, pee yaraga ka kpɛ jɛn, pee kala la kɔrɔ jɛn;
pe yɛn na tanri wa wɔwɔ pi ni,
katugu dunruya wi ni, kasinŋge ki nɔgɔna cɛnyaara ti yɛn na yɛri na woo wa ti yɔnlɔ li ni.
6 Mìla ki yo ye kan fɔ ye yɛn yɛngɛŋgɛlɛ kele,
ye ni fuun ye yɛn Yɛnŋɛlɛ na yaara ti ni fuun ti go na li piile.
7 Konaa ki ni fuun, ye yaa ka ku paa sɛnwee piile pe yɛn,
ye yaa ka sinlɛ paa dunruya teele sanmbala pe yɛn.»
8 E, Yɛnŋɛlɛ, yiri ma kiti kɔn dunruya woolo pe na,
katugu cɛngɛlɛ ke ni fuun ke yɛn ma wogolo!