83
Izirayɛli woolo pe yɛn
na Yɛnŋɛlɛ li yɛnri li yiri
pe juguye pe kɔrɔgɔ
1 Yurugo. Asafu Yɛnŋɛlɛ gbɔgɔyurugo.
2 E, Yɛnŋɛlɛ, maga ka koro na mɛɛ para,
maga ka pyeri,
maga ka koro kapyegele fu.
3 Wele, ma juguye pe yɛn na tinni mbe kala la pye,
ma yɛn ma mbele mbɛn, pe yɛn na yɛgɛ tungu.
4 Pe yɛn na yɔn lemɛ tipee nii ma woolo pe na,
pe yɛn na pe yɛɛ gbogolo na pe yɛɛ yaan ma woolo mbele ma yɛn na pe go singi pe na.
5 Pe yɛn na pe yɛɛ piin fɔ: «Ye pan we pe tɔngɔ we pe wɔ cɛngɛlɛ sanŋgala ke sɔgɔwɔ,
jaŋgo lere ka ka nawa to Izirayɛli mɛgɛ ki na naa.»
6 Pe yɛn na yɔn nii jatere nuŋgba ni,
na yɔn finliwɛ nii pe yɛɛ ni ma mɛgɛ ni.
7 Poro pe yɛn Edɔmu cɛnlɛ woolo, naa Ishimayɛli setirige piile pe ni,
naa Mowabu tara woolo, naa Hagari setirige piile pe ni,
8 naa Gebali cɛnlɛ woolo, naa Amɔ cɛnlɛ woolo, naa Amalɛki setirige piile,
naa Filisiti tara fɛnnɛ konaa Tiri ca fɛnnɛ pe ni.
9 Asiri tara fɛnnɛ pè taga wa pe na fun,
poro fun pàa Lɔti setirige piile pe saga.
Wɔnmatigiwɛn laga.
10 Ki yaga ma pe pye paa yɛgɛ ŋga na màa Madiyan tara fɛnnɛ pe pye we,
paa yɛgɛ ŋga na màa Sisera naa Yabini pe pye wa Kishɔn lafogo ki yɔn na we!
11 Màa pe tɔngɔ wa Eni Dɔri wasege ki ni,
ma pe gboolo pe pye fyɔngɔ wa tara ti na.
12 Pe fanŋga fɛnnɛ pe pye paa yɛgɛ ŋga na màa Orɛbu naa Zɛɛbu pe pye we;
pe kundigile pe ni fuun pe pye paa yɛgɛ ŋga na màa Zeba naa Salimuna pe pye we!
13 Poro wɛlɛ pàa pye na yuun fɔ: «We yaa Yɛnŋɛlɛ li tara laga ki shɔ
mbege pye we yɛɛ wogo!»
14 E, na Yɛnŋɛlɛ, pe pye paa tifɛlinjolo gbanŋgban yɛn,
pe pye paa yan sigire yɛn, nda tifɛlɛgɛ ki mari lɛ ma kari ti ni we!
15 Yɛgɛ ŋga na kasɔn ma kaa to kɔlɔgɔ maga sogo,
yɛgɛ ŋga na kasɔn yinnɛ maa yanwira lara sori,
16 tisaga tifɛlɛgɛ ki yirige ma pe purɔ ma,
ma tifɛliŋgbɔgɔ yirige ma sunndo kɔngɔ wa pe na!
17 Yawe Yɛnŋɛlɛ, fɛrɛ gbɔrɔ wa pe na,
jaŋgo paa ma lagajaa!
18 Ti fɛrɛ mbe pe yigi, pe sunndo wila kɔɔn pe na sanga pyew,
ti pe fɛrɛ shɔ, pe tɔngɔ pe wɔ wa!
19 Pege jɛn fɔ ma mɛgɛ koyi ŋga Yawe Yɛnŋɛlɛ,
fɔ mboro nuŋgba ma yɛn Yɛnŋɛlɛ na yaara ti ni fuun ti go na tara ti laga ki ni fuun ni.