94
Leele pe kambasinnde
ti kayaŋga wɔ pe ni, Yɛnŋɛlɛ
1 Yawe Yɛnŋɛlɛ, kayaŋga wɔfɔ Yɛnŋɛlɛ,
kayaŋga wɔfɔ Yɛnŋɛlɛ, ma yɛɛ naga!
2 Mboro ŋa dunruya kiti kɔnfɔ, yiri ma yere,
mbele pe maa pe yɛɛ gbogo, ma pe sara ma yala pe kapyegele ke ni!
3 Yawe Yɛnŋɛlɛ, naga yɛn ma, lepeele pe yaa koro mbaa yɔgɔri fɔ sa gbɔn wagati wiwiin?
Ɛnhɛn, pe yaa koro mbaa yɔgɔri fɔ sa gbɔn wagati wiwiin?
4 Pe maa yɔngbɔgɔwɔ sɛnrɛ yuun na leele pe tifaga,
ki tipere pyefɛnnɛ pe ni fuun pe maa pe yɛɛ gbogo.
5 E, Yawe Yɛnŋɛlɛ, pe yɛn nɔɔ woolo pe jɔlɔ,
poro mbele ma kɔrɔgɔ ye, pè pe yigilɔmɔ pi tisaw.
6 Pe yɛn na naŋgunjaala naa nambannjɛɛnlɛ pe kuun,
na pijiriwele pe kuun.
7 Pe ma yo fɔ: «Yawe Yɛnŋɛlɛ li woro na yaraga ka yaan.
Zhakɔbu Yɛnŋɛlɛ lii kala la kpɛ jɛn wa ki ni.»
8 Ye ye yɛɛ yingiwɛ jɛn, yoro lembire re,
yoro tijinliwɛ fu fɛnnɛ, ye yaa tijinliwɛ ta wagati wiwiin?
9 Yɛnŋɛlɛ na lì nuŋgbolo li kan sɛnwee wi yeri, naga yɛn ma, laa la nuru wi le?
Yɛnŋɛlɛ na lì yɛnmbyɔ wi gbegele sɛnwee wi na, laa la yaan wi le?
10 Yɛnŋɛlɛ na li maa cɛngɛlɛ ke koro na ke nii konɔ, naga yɛn ma, li se ka ye le jɔlɔgɔ wi le?
Lo na li maa leele pe nari jɛnmɛ pi ni, li mbe ya pye tijinliwɛ fu fɔ wi le?
11 Yawe Yɛnŋɛlɛ li sɛnweele pe jatere wi jɛn,
lìgi jɛn ma yo wi yɛn wagafe.
12 Yawe Yɛnŋɛlɛ, mboro ka lere ŋa koro mboo le konɔ, fɛrɛwɛ yɛn ki fɔ wi woo,
na maga ma lasiri wi naga lere ŋa na, fɛrɛwɛ yɛn ki fɔ wi woo!
13 Na jɔlɔgɔ sanga ka gbɔn wi na, ma maa kotogo ki sogo wi na,
ma si yala, wege ki yɛn na kɔɔn lepee wo mɛgɛ ni.
14 Katugu Yawe Yɛnŋɛlɛ laa li woolo pe wa,
poro mbele pe yɛn li kɔrɔgɔ ye, laa si je pe na.
15 Kiti wi yaa kaa kɔɔn naa kaselege ni,
mbele fuun pe nawa pi yɛn ma sin pe na, pe yaa yɛnlɛ wi na.
16 Ambɔ wi yaa yere na kala li ni lepeele pe yɛgɛ na, wa kiti kɔnsaga?
Ambɔ wi yaa taga na puŋgo na mbe yiri ki kapege pyefɛnnɛ mbele pe kɔrɔgɔ?
17 Ndɛɛ Yawe Yɛnŋɛlɛ li sila na saga,
anmɛ mìla ku makɔ.
18 Sanga o sanga mìla yo fɔ: «Na tɔɔrɔ ti yɛn na wɔnri;»
ko sanga wo ni, ma kagbaraga ki ma fanŋga le na ni Yawe Yɛnŋɛlɛ.
19 Na na jatere wi ka lɛgɛ na na sanga ŋa ni,
ma mala kotogo ki sogo na na, mbe nayinmɛ kan na yeri.
20 Naga yɛn ma, mboro mbe yɛnlɛ mbe gbogolo ki kiti kɔnfɛnnɛ legboleele pe ni,
poro mbele pe ma Yɛnŋɛlɛ li kondɛgɛŋgɛlɛ ke wa, mbe si jɔlɔgɔ wa leele pe na?
21 Pe ma pe yɛɛ gbogolo ma yiri lesinŋɛ wi kɔrɔgɔ,
pe ma kiti wi kɔn mboo jan lere ŋa wi yɛn jɛrɛgisaga fu wi na, mboo gbo jaga.
22 Ɛɛn fɔ Yawe Yɛnŋɛlɛ lo li yɛn paa na malaga sigeca yɛn nala go singi,
na Yɛnŋɛlɛ li yɛn walaga ŋga ki yɛn na larasaga.
23 Li yaa ti pe kapere ti go kala li to pe na,
li yaa pe tɔngɔ pe tipewe pi kala na.
Ee, Yawe Yɛnŋɛlɛ, we Yɛnŋɛlɛ li yaa ka pe tɔngɔ.