6
Yinsa ti mwennyewe saapatu
Saapatu moote, Yinsa eetta ovira nshini wa nshapa la tiriku. Anakhiyoni awe khusala avurula asusuraka na makhono arafunaka phunje zaya. Mafwarizeewu khusala awoozela yoori: “Mwaasa aya niini mwirettaka vitthu ziiyiye mwiikho orettiwa saapatu?”
Ye khuwaajipu araka: “Khamwinasome etthu aarettiyeeyo Daawuuda wakathi yankholiyeevo jala na ashirikha awe? Ye aaviriye Nnyupa wa Nnyizinku khuthuula phaawu zoohalaalishiwa khurafuna kiina khuwenkha ashirikhaawe, ila alupa aarina ruhusa yoorafuna aari mahaakhimu a tiini paasi.” Yinsa khulupa araka: “Mwaana wa pinaatamu ti Mbwana mwennyewe saapatu.”
Mwinyi woorakala nkhono
Saapatu kiina, Yinsa khuvira nnyupa woosifwiwamo Nnyizinku khusala awaanozela, aarimo mwinyi mmote waarakaliyeeyo nkhono nlume. Anamanozela a kano na mafwarizeewu eetta omweekesela yoori amoone Yinsa nkhama aari onvonisa siikhu ya saapatu, yoori ankwisele paathuli. Ila ye aari ojuwa etthu aari wuupuwelaaye atthu apale. Khumuuza mwinyi otule woorakala nkhono nlume yoori: “Olankhe ote vakatthi apha.” Mwinyi khulankha khweemela.
Aphano Yinsa khuwoozela yoori: “Ensuhaaye orettiwa saapatu ti tiivi? Yooshapweya ama yootakhala, wuusuru ama wuula?”
10 Khuweekesa atthu ooshi apale aariivo khumuuza mwinyi otule yoori: “Wookole nkhono awo.” Ye khookola, khuvona. 11 Anamanozela a kano na mafwarizeewu khwiiphiiriwa khusala awaza etthu yonrettela Yinsa.
Othawuliwa wa anakhiyoni khumi na awiri
12 Siikhu zaya epile Yinsa khulankha khusala alawa omwaako olompa, khwiisha osikhu wooshi eettaka olompa. 13 N'oocha khuwaakhuwela anakhiyoni awe khuwaathawula khumi na awiri, atthaapo theenya khuwenkha nzina la owaaswihaapa. 14 Simawu antthajiye nzina la Pheeturu, Antere ttwiiye Simawu, Yaakhumpa, Yaahaya, Filiipe, Paturumeewu. 15 Mateewuzhu, Tome, Yaakhumpa mwaana wa Alufayo na Simawu aniitthiwaaye Zelooti, 16 Yuuda mwaana wa Yaakhumpa, na Yuuda Iskariyooti otule aari weettelaaye onkholisa Yinsa.
Onozela na ovonisa wa Yinsa
17 Yinsa khwiishukha vamwaako na maaswihaapa awe khweemela nshini wa mwaakho vahali aariivo anakhiyoni awe na khuntti ya atthu a Yudeya yooshi na a Yeruzaleemu, mpakha apale a miti za waattamela pahari, Tiiro na Sitooni. 18 Apale aateeliyeeyo osiila na ovonisiwa moolwele aya, mpakha na apale aari wantipwiwaaye ti masheethwani aari ovonisiwa. 19 Atthu ooshi aari otakha onsapa Yinsa mwaasa yoori waari onsaruwa owahi khusala owaavonisa ooshi.
20 Aphano Yinsa khulansa maasho khuweekesa anakhiyoni awe khuwooza yoori:
 
“Ananshapweyiwa ti mweyo mwiiyiye asikhini,
maana Ofwalume wa Nnyizinku pu weenu.
21 Ananshapweyiwa ti mweyo enuukholaanini jala aphano,
maana mwinlawa mwarupale.
Ananshapweyiwa ti mweyo mwinlilaaye aphano,
maana mwinteela otheya.
22 Ananshapweyiwa ti mweyo,
mmana atthu eephiiriwaka ti mweyo, awiikarani, oottukhanani
na khuwoonani ohifwayi mwaasa wonlotta Mwaana wa Pinaatamu.
 
23 Wakathi aya otthuupo, mwiiye woofurahi na mwitthape, maana tthuvo yenu eniiya khuluyeene pinkuuni. Maana wa nanna etthiipi, apapa zaya na-yo aawaaretteliye manapiyu.
 
24 Ila olaanikha pu weenu mweeyo mwaamathaajiri,
maana mwapokhera tthuvo yenu vathi attaapha.
25 Olaanikha pu weenu mweeyo ziwiitaaleliyeenini vitthu-zoojiwa,
maana mwinteela okholiwa ti jala.
Olaanikha pu weenu mweeyo mwiriina furaha eleelo eti,
maana mwinteela ojikhupanyera na olila.
26 Olaanikha pu weenu mweeyo
mmana mwittottopeliwaka pi atthu ooshi,
maana apapa zaya aawaaretteliye etthiipo manapiyu oojipanka.
 
27 Nakataalikha mweeyo mwinikisiilaaye, kiniwuuzani yoori mwiwaaphete maatuwi enu, mwiwaarettele saana apale aniiphiiriwaaye ti mweyo. 28 Mwiwaaparikhiye apale anuulaanaanini na mwiwaalompele apale anuurettelaanini zootakhala. 29 Nkhama ntthu oopwakula nlaku limote, na ntthi likina ontheteezele. Nkhama ntthu oovula juupa yawo, ohinkhattaze othuula hempe yawo. 30 Omwinkhe wakhula otule anuuvekelaaye, nkhama ntthu athuula etile yiiyiye yaawo, ohinkhanyarele wuurutisela. 31 Epile mweeyo zinuutuvelaanini oretteliwa pi azeenu, na-mweyo mwiwaarettele azeenu etthiipo.
32 Amana mwiwaaphetaka apale anuuphetaanini paasi, fwayita-ni mwineekeselaaye mmakhono wa Nnyizinku? Hatha anatwampi atthaapo aniwaapheta apale na-yo aniwaaphetaayo. 33 Amana mwiwaarettelaka saana apale na-yo anuurettelaanini saana paasi, fwayita-ni mwinteelaaye wiiyana? Hatha anatwampi atthaapo na-yo anretta etthiipo. 34 Amana mwiweepaashaka paasi apale mwinkhupalaaye wuurutiselani, fwayita-ni mwinteelaaye wiiyana? Hatha anatwampi atthaapo aniipaashana aroromelaka orutiselana. 35 Mwiwaaphete maatuwi enu, mwiwaarettele zooshapweya, mwiweepaashe mwiheekeselaka wuurutiselani. Toowo tthuvo yenu enttela wiiya khuluyeene na mwinttela wiiya aana a Nnyizinku Wooziti, maana Nnyizinku oniwaashapweyela rooho hatha na apale ahininshukhurwaaye na alupa ootakhala rooho. 36 Mwiiye woohurumiya nkhama etthiipi Papeenu wa pinkuuni na-ye eeyiye wa huruma.
37 Mwihimphuke ntthu nzeenu na Nnyizinku khanuuphukani, mwihinhukhumu ntthu nzeenu na Nnyizinku khanuuhukhumuni. Mwinswaamihi ntthu nzeenu na Nnyizinku ontta wuuswaamihini. 38 Mwiwenkhe azeenu na Nnyizinku ontta owinkhani: na mphimo khwaamili, wookhitteleliwa na wa wiitaala mpakha wiittikha. Maana mphimo otthuupo mwimphimanaaye na-mweyo mwinteela ophimeliwa otthuupo.”
39 Yinsa khulupa nlikaniso mmote araka: “Atthu oohooni khanlokozana, antta okwiselana nliphotto. 40 Nakhiyoni khaninziti mwanliimu awe, ila wakhula otule ansomiseyaaye saana oniiya nkhama mwanliimu awe.
41 Onri je woona etutu eriiye mmaasho wa nzaawo ohoonaka muutthi opule oriiye mmaasho mwawo? 42 Enrettikhana toovi weeyo omuuzaka nzaawo yoori: ‘Ttwiiyaku, nkankaani kuulaze etutu eto eriiye mmaasho mwawo,’ na khupe weeyo ohiwahaka woona muutthi opule oriiye mmaasho mwawo? Naafikhi! Olazemo khapula muutthi oriiye mmaasho mwawo, toowo ontta woona saana, na phi onlazaamo etutu eriiye mmaasho wa nzaawo.”
Muutthi na mishumo zaya
43 “Khawiivo muutthi wooshapweya oniimaaye mishumo zootakhala, wala muutthi wootakhala oniimaaye mishumo zooshapweya. 44 Maana wakhula muutthi onjuweya mwaasa wa mishumo zaya; nnyiiwa khinshumiwamo mishumo za muuyu, mmutthalala khanshumiwamo wuuva. 45 Ntthu wookemaani, nroho mwawe onsarulamo vitthu zooshapweya, na ntthu wootakhala rooho, nroho mwawe onsarulamo vitthu zootakhala, maana milomo zawe zinttakhula etthiipile ziitaaliyeeyo nroho mwawe.
46 Mwinkikhuwelela-ni yoori ‘Mbwana, Mbwana’, mwihirettaka epile kiniwuuzaanini? 47 Miiyo kinuuthoonyezani ntthu anlikananaaye otule ansiilaaye mattakhuzi aka na khushututela. 48 Onlikanana ntthu ajekaka nyuupa yawe khuthipa khwiichisa saaneene khutha vanchina la mawe woozivalavo. Khuta nnyeri khupiya nyuupa etile ila khuhisakhinyeyi mwaasa woozivalisiwa. 49 Ila otule ansiilaaye mattakhuzi aka khuhishututeli onlikanana ntthu ajekiye nyuupa yawe vanshaka woohizivalivo. Khuta nnyeri khupiya nyuupa etile nasaapiru khukwa, khupwecheya khuhisali hatha etthu.”