7
Amini ya namalokozela wa anajanka
1 Eeshiyeevo mattakhuzi apale aari owoozaaye atthu, khweetta sitate ya Kafaranawu.
2 Ottuukho aariwo namalokozela mmote wa anajanka w'eerooma, aariina karumeyaawe wompheta aari olwaaziwaaye khusala asaleela ofwa.
3 Wakathi namalokozela wa anajanka otule asiiliyeevo monkoni wa Yinsa, khuwaaperekha attunkhulu akina amayaahuuti yoori anvekele Yinsa ate anvonise.
4 Yo n'onsikana khunvekela wookhanyarelavo araka: “Mwinyi oto onsuhi waawuniwa,
5 mwaasa yoori oniiya owaapheta atthu etthu na anijekela nyuupa yoosifwiwamo Nnyizinku.”
6 Aphano Yinsa khulankha khusala alawa vamote na-yo, asaleelaka ofiya, namalokozela otule khuwaaruma ashirikha awe olawa omuuza yoori: “Mbwana, ohijantipu khinsuhi weeyo ovira nnyupa mwaka.
7 Ti eto miiyo kinoona yoori akinsuhi okutthanana weeyo, ila olupe nttakhuzi limote paasi karumeyaaka ontta ovona.
8 Miiyo kinaaye afwalume akizitiyeeyo, ila na miiyo theenya kinaaye anajanka ankishututelaaye. Kinimuuza najanka mmote yoori: ‘Olawe’, khulawa; nkina yoori: ‘Aruti’, khuruti. Kinimuuza karumeyaaka yoori: ‘Retta eti’, ye khuretta.”
9 Yinsa asiiliyeevo mattakhuzi apale khwiiya wooshanka, khuzukuluwa khuwooza atthu apale aari omperekhaaye yoori: “Hatha Ezirayeele ottuukho akooneeniwo amini nkhama eti.”
10 Ashirikha apale aarumiweeyo khurutela owawe namalokozela otule, khunsikana karumeya otule avoniye.
Yinsa oninsisimula mwaana wa nunu mmote woofweliwa ti mannawe
11 Mmeesho mwaya Yinsa khulankha khusala alawa sitati ya Nayiini, anakhiyoni awe na khuntti ya atthu a waatta khusala enlotta.
12 Asaleelaka ofiya vanlako wa sitati etile, khusala asaruwa atthu aari weettelaaye ozikha. Otule aari weettelaaye ozikhiwa aari mwaana wa nunu mmote woofweliwa ti mannawe, ye aarina mwaana mmote othuuto paasi; atthu a waatta aari olawa vamote na-ye.
13 Wakathi Mbwana Yinsa amooniyeevo nunu otule, khumoonela huruma khunkhuwela khumuuza yoori: “Ohilile!”
14 Aphano khuwaasusela khusapa janaayiza, apale aathuuliyeeyo khweemela. Yinsa khulupa araka: “Shapu! Kinuuruma yoori olankhe!”
15 Shapu otule khulankha khwiikhala khusala attakhula; Yinsa khumwinkha mamaawe.
16 Atthu ooshi khwiiya awoova khusala ansifu Nnyizinku araka: “Napiyu nwulweene aniteela, ninoona yoori Nnyizinku aateeliye owuusuru atthu awe.”
17 Hapari epile za Yinsa khumwazeyela Yudeya yooshi mpakha miti epile zaattamananiyeeyo.
Yaahaya oniwaaruma anakhiyoni awe wa Yinsa
18 Yaahaya khuuziwa pi anakhiyoni awe vitthu epile zooshi. Ye khuwaakhuwela awiri,
19 khuwaaruma yoori alawe amuuzele Mbwana yoori: “Weeyo ti otu naari onwejaaye ama ninweje nkina?”
20 Yo khulawa mpakha ottuukhule aariiwo Yinsa khumuuza yoori: “Neetta orumiwa ti Yaahaya yoori nite niwuuzele nkhama otule naari onwejaaye ti weyo, ama nivire ninwejaka nkina?”
21 Wakathi otthuupule Yinsa khuwaavonisa alwele a waatta, anamarakala, apale aariina masheethwani, khuwaafunula maasho apale oohooni.
22 Aphano Yinsa khuwaajipu yoori: “Mwilawe mwamuuze Yaahaya etthiipo mooniyeezo na mwisiiliyeezo; apale oohooni antta woona, apale oorakala antta weettetta, anamakuttula antta otwahareshiwa, apale oohisiili ansiila, anamfwa asisimuliwa, na hapari zooshapweya antta olaleyeliwa asikhini.
23 Wooshapweyiwa ti otule ahiniphiiriwaaye ti miiyo.”
24 Anakhiyoni a Yaahaya n'oolaavo, Yinsa khusala owoozaka atthu monkoni wa Yaahaya yoori: “Makuluttu mweetteliye woona niini? Tteetthe yiinisiwaka ti pheevo?
25 Ama moona niini? Mwinyi mmote awaliye kuwo zooshapweya? Apale anwalaaye kuwo zootafikhana aniiya nraaha na aniikhala nkorofwa y'oofwalume.
26 Khi moona niini? Napiyu? Pi etthiipo kiniwuuzani yoori, Yaahaya awaaziti manapiyu akinoko aya.
27 Otu ti otule laari onlupaaye Nttakhuzi la Nnyizinku yoori:
‘Kinlawa kamperekhe karumeyaaka omaasho wawo
yoori aattalele tarikhi yawo.’
28 Miiyo kiniwuuzani yoori vakatthi wa apale avokoliweeyo pi aakha, khina mmote anzitiyeeyo Yaahaya; ila otule eeyiye nttitthiiru muufwalume wa Nnyizinku, nwulweene zayita ye.”
29 Atthu ooshi mpakha anamariphisa lumpuru khusiila mattakhuzi a Yinsa. Yo khukhupalela shariya ya Nnyizinku, maana aari awoosiwa ti Yaahaya.
30 Ila mafwarizeewu na anamanozela a kano khukhijilela matakhelo a Nnyizinku khuhoosiwi ti Yaahaya.
31 “Anaatamu apa a leelo eti kiwaalattisane niini?
32 Alattanana khuntti ya asimaana eekhaliye vaparasa akhuwelanaka araka. ‘Fweeyo n'oovumiselani phivi za vaharusi mweeyo khuhiini; khwiipa liipo la huzuni mweeyo khuhilili.’
33 Khuta Yaahaya Namoosa woofuka na ahinnywaaye viinyu, mweeyo mwinri: ‘Ye onaaye masheethwani.’
34 Ata Mwaana wa Pinaatamu onja na onnywa, mweeyo mwinri: ‘Mmoone nsokho otu! Nanhapaliwa, nshirikha wa anamariphisa lumpuru na anatwampi.’
35 Apale anlottaaye ojuwa wa Nnyizinku, anthoonyeza yoori pi wookhweeli.”
Natwampi aavaaziyeeyo mafuttha moolu a Yinsa
36 Mfwarizeewu mmote anvekeliye Yinsa yoori alawe aje owawe. N'oofiya Yinsa khwiikhala yoori aje.
37 Omuuta otthuupule muukha mmote wa natwampi wa sitati ethiitile, khujuwa yoori Yinsa ontta oja wa mfwarizeewu, khuthuula suupha yawe ya mafuttha oonukhela.
38 Khulawa khweemela onyoko wa Yinsa nshini wa moolu awe khusala alila. Mishozi zawe khusala zittonkela moolu a Yinsa. Khusala akukuttha na nyuuli zawe na opejari moolu a Yinsa avaazaka mafuttha oonukhela.
39 Aphano mfwarizeewu otule nawoona vitthu epile khusala alupa nroho mwawe araka: “Otu eriwaka aari napiyu eetta ojuwa yoori mwanankha otu aninsapaaye natwampi.”
40 Yinsa khumuuza Simawu yoori: “Kintakha owuuza etthu.”
Simawu khujipu yoori: “Kuuzeni mwanliimu.”
41 Yinsa khumuuza yoori: “Atthu awiri eetta wiiliwa nzurukhu ti mwinyi mmote aari wiipaashisakaaye, otu mmote aari wiiliwa miiya thaanu, otu nkina aari wiiliwa hamusiini.
42 Ila oowiiri khuhiivo mmote aawahiyeeyo onripha, ye khuwaaswaamihi oowiiri. Atthu apa awiri amphetachiyeeyo ti tuuvi?”
43 Simawu khujipu araka: “Kinoona yoori ti otule aswaamihiweeyo wa waattavo.”
Yinsa khumuuza yoori: “Walikanisa.”
44 Ye khumuuza Simawu anthoonyezaka muukha otule araka: “Onimoona mwanankha otu? Miiyo kata vaje vawo apha khuhikinkhi hatha maati yoori koose moolu aka, ila ye oosa moolu aka na mishozi zawe khukukuttha na nyuuli zawe.
45 Khukipokhereleeni na peeju, ila ye khalikheleleeni opejari moolu aka.
46 Khukivaazeeni mafuttha oonukhela mmwishwa mwaka, ila otu avaaza mafuttha moolu aka.
47 Pi apho kiniwuuzaaye yoori twampi zawe epile za waatta ariinaazo za swaamihiwa; mwaasa woophetacha wawe. Ila otule aswaamihiweeyo vattitthiiru opheta wawe vattitthiiru.”
48 Yinsa khumuuza mwanankha otule yoori: “Twampi zawo za swaamihiwa.”
49 Apale eekhaliyeeyo khusala oozelana yoori: “Otu paani anwahaaye owaaswaamihi twampi atthu.”
50 Ila Yinsa khumuuza muukha otule yoori: “Waamini wawo wa wuusuru: olawe na heeri.”