10
Nadába, Abiu bid̶a cadjirua oped̶ad̶a
1 Aaroʌ̃ warrarã Nadába, Abiu bid̶a ãdji quera babada eped̶ecoda edad̶aped̶a tʌbʌdauda quera sid̶a maʌ̃ eped̶ecod̶e b̶ʌsid̶aa. Maʌ̃da Ãcõrẽba jarad̶a awara idji quĩrãpita básid̶aa.
2 Maʌ̃ carea Ãcõrẽba tʌbʌ uruada idji b̶ʌmaʌba eradrʌbisia. Maʌ̃ uruaba ãdjira bá beasia. Mãwã idji quĩrãpita beusid̶aa.
3 Maʌ̃be Moiseba Aaroʌ̃a jarasia:
–Naʌ̃ra jãwãsia Ãcõrẽba jarad̶a quĩrãca oped̶ad̶aẽ́ bẽrã. Ãcõrẽba nãwã jarasia:
Mʌ̃ caita zebʌdaba mʌ̃ra waya pananida panʌa. Mʌ̃drʌ jũmarã quĩrãpita bia jarad̶ida panʌa.
Maʌ̃da ũrĩped̶a Aaroʌ̃ra chupea b̶esia.
4 Maʌ̃be Moiseba Aaroʌ̃ djabadrõã Uziel warrarã Misaelda, Elzapaʌ̃ sid̶a trʌ̃ped̶a jarasia:
–Zed̶adua. Bãrã ẽberãrã beuped̶ad̶ara Ãcõrẽ wua de caitabemada puru jĩga eded̶adua.–
5 Ara maʌ̃da zed̶aped̶a Moiseba jarad̶a quĩrãca dji beuped̶ad̶ara ãdji djio jʌ̃ panʌ bara puru jĩga edesid̶aa.