16
Ãcõrẽba cadjirua quĩrãdoabari ewari
1 Ãcõrẽba jarad̶a awara idji quĩrãpita quera babʌda carea Aaroʌ̃ warrarãra umé beusid̶aa. Beuped̶ad̶acarea Ãcõrẽra Moise ume bed̶easia.
2 Nãwã jarasia:
–Bʌ djaba Aaroʌ̃a jaradua mʌ̃ ded̶e wua eatʌ jira b̶ʌ jẽdaare mʌ̃ itea biara b̶ʌ dejãne baridua ewarid̶e ed̶a wãrãmãrẽã. Baridua ewarid̶e ed̶a wãsira beuya, mʌ̃ra baurude ʌ̃rʌ̃ jʌ̃rãrãne b̶ʌ bẽrã. Ab̶abe mʌ̃a b̶ʌd̶a ewarid̶e ed̶a wãida b̶ʌa.
3 Maʌ̃ ewarid̶e Aaroʌ̃ba nãwã oida b̶ʌa: idjia cadjirua od̶a carea paca dji umaquĩrã zaqueda eneida b̶ʌa babue diai carea. Idjab̶a oveja dji umaquĩrãda eneida b̶ʌa jũma babue diai carea.
4 Maʌ̃be cuiped̶a idjia edre jʌ̃bari lino wua od̶ada jʌ̃ida b̶ʌa. Maʌ̃ ʌ̃rʌ̃ idjia jʌ̃bari lino wua od̶a torroa b̶ʌda jʌ̃ped̶a cʌrrʌ trãjʌ̃bari lino od̶aba trãjʌ̃ cob̶ʌida b̶ʌa. Idji borod̶e jʌ̃bari lino od̶a sid̶a jʌ̃ida b̶ʌa. Maʌ̃gʌra idjia jʌ̃ida b̶ʌa mʌ̃ quĩrãpita ne obʌrʌd̶e.
5 Maʌ̃ awara israelerãba cadjirua oped̶ad̶a carea idjía chiwatu dji umaquĩrãda umé diad̶ida panʌa dji draga babue diamãrẽã. Idjab̶a oveja dji umaquĩrãda diad̶ida panʌa jũma babue diamãrẽã.
6 Aaroʌ̃ba cadjirua od̶a carea, idji ẽberãrãba cadjirua oped̶ad̶a carea bid̶a paca umaquĩrã zaquera eneya babue diai carea.
7 Chiwatura umena mʌ̃ quĩrãpita eneida b̶ʌa mʌ̃ wua ded̶e ed̶a wãbada caita.
8 Maʌ̃be bãrãba cawad̶i carea jemenebada quĩrãca Aaroʌ̃ba oya cawai carea sãʌ̃gʌ chiwatuda mʌ̃ itea b̶aida idjab̶a sãʌ̃gʌda ẽjũã põãsa ewaraga b̶ʌd̶e ẽrãbueida.
9 Chiwatu mʌ̃ itea b̶ed̶ara Aaroʌ̃ba babue diai carea b̶ʌya israelerãba cadjirua oped̶ad̶a carea.
10 Chiwatu ẽrãbuei carea b̶ed̶ara Aaroʌ̃ba mʌ̃ quĩrãpita zocai erob̶aya israelerãba cadjirua oped̶ad̶ara ãyã edemãrẽã ẽjũã põãsa ewaraga b̶ʌd̶aa.
11 Aaroʌ̃ba paca zaquera o ʌrrãgo beaida b̶ʌa idjia cadjirua od̶a carea idjab̶a idji ẽberãrãba cadjirua oped̶ad̶a carea bid̶a.
12 Maʌ̃be quera babada eped̶ecoda edaped̶a tʌbʌdau mʌ̃ quĩrãpita b̶ʌ animarã babue diabadad̶ebemaba biraida b̶ʌa. Idjab̶a incienso quera dji ʌrabad̶ada jʌwa baratʌma umé edaida b̶ʌa. Maʌ̃ra jũma edeida b̶ʌa mʌ̃ ded̶e wua eatʌ jira b̶ʌ jẽdaare.
13 Mama mʌ̃ quĩrãpita querada tʌbʌdau ʌ̃rʌ̃ cuaida b̶ʌa cowa nũmemãrẽã. Maʌ̃ cowaaba mʌ̃ baurude ʌ̃rʌ̃ cob̶ʌra ãnã edaya. Mãwãbʌrʌ Aaroʌ̃ra beuẽ́a.
14 Maʌ̃be paca oada edaped̶a idji jʌwa jĩwĩnĩba maãrĩ jĩãpoida b̶ʌa baurude ʌ̃rʌ̃ iquid̶a. Idjab̶a baurude quĩrãpe egode b̶arima siete jĩãpoida b̶ʌa.
15 Maʌ̃be dajadaa wãped̶a chiwatu mʌ̃ itea b̶ed̶ara o ʌrrãgo beaida b̶ʌa israelerãba cadjirua oped̶ad̶a carea. Chiwatu oara mʌ̃ wua ded̶e eatʌ jira b̶ʌ jẽdaare edeped̶a baurude ʌ̃rʌ̃, baurude quĩrãpe egode bid̶a jĩãpoida b̶ʌa idjia naãrã paca oa jĩãpod̶a quĩrãca.
16 Mʌ̃ wua dera bãrã dji cadjirua obadarã tãẽna b̶ʌ bẽrã Aaroʌ̃ba mãwã oaba jĩãpoida b̶ʌa. Mãwã mʌ̃ itea biara b̶ʌ dejãda mʌ̃ quĩrãpita bia b̶ʌya israelerãba cadjirua o panʌnebemada, mʌ̃ quĩrãpita biẽ́ panʌnebemada, idjab̶a mʌ̃ bed̶ea ĩjã od̶aẽ́ panʌnebema sid̶a. Mʌ̃ itea b̶ʌ dejãra ara maʌ̃ quĩrãca oida b̶ʌa mʌ̃ quĩrãpita bia b̶emãrẽã.
17 Aaroʌ̃ba cadjirua carea mʌ̃ itea biara b̶ʌ dejãne oa jĩãpod̶e wãbʌrʌd̶e ab̶a ẽdrʌbʌrʌd̶aa ni ab̶aʌda mʌ̃ wua ded̶e b̶acara b̶ʌa. Mama ed̶a b̶ʌd̶e Aaroʌ̃ba oara jĩãpoya idjia cadjirua od̶a carea, idji ẽberãrãba cadjirua oped̶ad̶a carea, idjab̶a israelerãba cadjirua oped̶ad̶a carea bid̶a.
18 Mʌ̃ wua ded̶eba dajadaa zeped̶a mʌ̃ quĩrãpita b̶ʌ animarã babue diabadamaa wãida b̶ʌa bia b̶ʌi carea. Idjia paca oara, chiwatu oa sid̶a maãrĩ edaped̶a animarã babue diabadad̶e cachu quĩrãca b̶eara soaida b̶ʌa.
19 Maʌ̃be animarã babue diabada ʌ̃rʌ̃ idji jʌwa jĩwĩnĩba oada b̶arima siete jĩãpoida b̶ʌa animarã babue diabadara mʌ̃ quĩrãpita bia b̶ʌi carea. Mãwã oida b̶ʌa animarã babue diabadara israelerã mʌ̃ quĩrãpita biẽ́ panʌneba biẽ́ b̶ebari bẽrã.
20 Mʌ̃ itea biara b̶ʌ dejã, mʌ̃ itea b̶ʌ dejã, animarã babue diabada sid̶a mʌ̃ quĩrãpita bia b̶ʌd̶acarea Aaroʌ̃ba chiwatu wad̶i zocai erob̶ʌra caita eneida b̶ʌa.
21 Idji jʌwara chiwatu boro ʌ̃rʌ̃ b̶ʌped̶a jũma israelerãba cadjirua oped̶ad̶ara, mʌ̃ bed̶ea ĩjã od̶aẽ́ panana sid̶a Aaroʌ̃ba ebud̶a jaraida b̶ʌa maʌ̃ cadjiruara chiwatu ʌ̃rʌ̃ b̶ʌi carea. Maʌ̃be ab̶aʌda b̶ʌya chiwatura ẽjũã põãsa ewaraga b̶ʌd̶aa edemãrẽã.
22 Maʌ̃ chiwatuba jũma bãrã cadjiruara ãyã edeya ẽberãrã neẽ́maa. Mama ẽjũã põãsa ewaraga b̶ʌd̶e dji eded̶aba chiwatura ẽrãbueida b̶ʌa.
23 Maʌ̃misa Aaroʌ̃ra mʌ̃ wua ded̶e ed̶a wãped̶a idjia jʌ̃ b̶ʌ lino wua od̶ara ẽrãped̶a mama ameida b̶ʌa. Maʌ̃ra idjia jʌ̃baria mʌ̃ itea biara b̶ʌ dejãne wãi carea.
24 Maʌ̃be arima cuiped̶a idjia ewariza jʌ̃barida jʌ̃ida b̶ʌa. Maʌ̃be dajadaa wãped̶a idjia enena ovejada, israelerãba diaped̶ad̶a oveja sid̶a beaped̶a jũma babue diaida b̶ʌa idjia cadjirua od̶a carea, israelerãba cadjirua oped̶ad̶a carea bid̶a.
25 Maʌ̃be cadjirua carea paca, chiwatu sid̶a bead̶a dragada animarã babue diabadad̶e jũma babueida b̶ʌa.
26 Chiwatu ẽjũã põãsa ewaraga b̶ʌd̶e ẽrãbued̶ara jẽda zebʌrʌd̶e cuida b̶ʌa idjab̶a idjia cacuad̶e jʌ̃ b̶ʌra tãtoida b̶ʌa. Maʌ̃bebʌrʌ bãrã duanʌmaa zeida b̶ʌa.
27 Bãrã cadjirua carea bead̶a pacara, chiwatu sid̶a israelerã duanʌmaʌba ãyã edeida b̶ʌa babuei carea. Dji era, dji djarara, dji ã sid̶a jũma babueida b̶ʌa. Aaroʌ̃ba maʌ̃ animarã oara mʌ̃ itea biara b̶ʌ dejãne jĩãposia.
28 Ẽberã maʌ̃ animarã ãyã bád̶e wã b̶ad̶ara jẽda zebʌrʌd̶e cuida b̶ʌa idjab̶a idjia cacuad̶e jʌ̃ b̶ʌra tãtoida b̶ʌa. Maʌ̃bebʌrʌ bãrã duanʌmaa zeida b̶ʌa.
29 Id̶iba ʌ̃taa bãrã israelerãba naʌ̃ bed̶eada ĩjã od̶ida panʌa. Poaza sietebema jed̶ecod̶e die ewari b̶ʌd̶e bãrãba ne cod̶aca ewarida od̶ida panʌa. Maʌ̃ ewarid̶e trajacara panʌa. Ãĩbemarã bãrã tãẽna panʌ sid̶a trajacara panʌa.
30 Poaza maʌ̃ ewarid̶e sacerdote dji dromaara b̶ʌba mʌ̃a jarad̶a quĩrãca oya bãrãba cadjirua oped̶ad̶a carea. Mãwã bãrãra mʌ̃ quĩrãpita bia b̶ead̶ia.
31 Maʌ̃ ewarira ʌ̃nãũbada ewari dromaa. Maʌ̃ne bãrãra ne cod̶acara panʌa. Id̶iba ʌ̃taa poaza maʌ̃ ewarid̶e mãwã od̶ida panʌa.
32 Sacerdote dji dromaara b̶ʌ jaid̶abʌrʌd̶e idji warra boro ʌ̃rʌ̃ olivo dragada wead̶ida panʌa idji zeza cacuabari b̶emãrẽã. Maʌ̃ warraba israelerãba cadjirua oped̶ad̶a carea oida b̶ʌ quĩrãca oya. Maʌ̃ ewarid̶e sacerdoteba lino wua od̶a jʌ̃ida b̶ʌra jʌ̃ya.
33 Maʌ̃ne oa jĩãpo b̶ʌd̶eba idjia mʌ̃ itea biara b̶ʌ dejãda, mʌ̃ itea b̶ʌ dejãda, animarã babue diabada sid̶a bia b̶ʌya. Idjab̶a sacerdoterãba cadjirua oped̶ad̶a carea, jũma bãrãba cadjirua oped̶ad̶a carea bid̶a idjia oida b̶ʌ quĩrãca oya.
34 Id̶iba ʌ̃taa mʌ̃a naʌ̃ra ĩjã obi b̶ʌa: poaza b̶arima ab̶a sacerdote dji dromaara b̶ʌba mʌ̃a jarad̶a quĩrãca oida b̶ʌa jũma israelerãba cadjirua oped̶ad̶a carea.
Maʌ̃be Ãcõrẽba Moisea jarad̶a quĩrãca o panesid̶aa.